dn34:2.1.0 8. Aṭṭha dhammā
BAGIAN 2
dn34:2.1.1 Aṭṭha dhammā bahukārā …pe… aṭṭha dhammā sacchikātabbā.
dn34:2.1.2 Katame aṭṭha dhammā bahukārā?
dn34:2.1.3 Aṭṭha hetū aṭṭha paccayā ādibrahmacariyikāya paññāya appaṭiladdhāya paṭilābhāya paṭiladdhāya bhiyyobhāvāya vepullāya bhāvanāya pāripūriyā saṁvattanti.
dn34:2.1.4 Katame aṭṭha?
dn34:2.1.5 Idhāvuso, bhikkhu satthāraṁ upanissāya viharati aññataraṁ vā garuṭṭhāniyaṁ sabrahmacāriṁ, yatthassa tibbaṁ hirottappaṁ paccupaṭṭhitaṁ hoti pemañca gāravo ca.
dn34:2.1.6 Ayaṁ paṭhamo hetu paṭhamo paccayo ādibrahmacariyikāya paññāya appaṭiladdhāya paṭilābhāya, paṭiladdhāya bhiyyobhāvāya vepullāya bhāvanāya pāripūriyā saṁvattati.
dn34:2.1.7 Taṁ kho pana satthāraṁ upanissāya viharati aññataraṁ vā garuṭṭhāniyaṁ sabrahmacāriṁ, yatthassa tibbaṁ hirottappaṁ paccupaṭṭhitaṁ hoti pemañca gāravo ca. Te kālena kālaṁ upasaṅkamitvā paripucchati paripañhati:
dn34:2.1.8 ‘idaṁ, bhante, kathaṁ?
dn34:2.1.9 Imassa ko attho’ti?
dn34:2.1.10 Tassa te āyasmanto avivaṭañceva vivaranti, anuttānīkatañca uttānīkaronti, anekavihitesu ca kaṅkhāṭṭhāniyesu dhammesu kaṅkhaṁ paṭivinodenti.
dn34:2.1.11 Ayaṁ dutiyo hetu dutiyo paccayo ādibrahmacariyikāya paññāya appaṭiladdhāya paṭilābhāya, paṭiladdhāya bhiyyobhāvāya, vepullāya bhāvanāya pāripūriyā saṁvattati.
dn34:2.1.12 Taṁ kho pana dhammaṁ sutvā dvayena vūpakāsena sampādeti—kāyavūpakāsena ca cittavūpakāsena ca.
dn34:2.1.13 Ayaṁ tatiyo hetu tatiyo paccayo ādibrahmacariyikāya paññāya appaṭiladdhāya paṭilābhāya, paṭiladdhāya bhiyyobhāvāya vepullāya bhāvanāya pāripūriyā saṁvattati.
dn34:2.1.14 Puna caparaṁ, āvuso, bhikkhu sīlavā hoti, pātimokkhasaṁvarasaṁvuto viharati ācāragocarasampanno, aṇumattesu vajjesu bhayadassāvī samādāya sikkhati sikkhāpadesu.
dn34:2.1.15 Ayaṁ catuttho hetu catuttho paccayo ādibrahmacariyikāya paññāya appaṭiladdhāya paṭilābhāya, paṭiladdhāya bhiyyobhāvāya vepullāya bhāvanāya pāripūriyā saṁvattati.
dn34:2.1.16 Puna caparaṁ, āvuso, bhikkhu bahussuto hoti sutadharo sutasannicayo. Ye te dhammā ādikalyāṇā majjhekalyāṇā pariyosānakalyāṇā sātthā sabyañjanā kevalaparipuṇṇaṁ parisuddhaṁ brahmacariyaṁ abhivadanti, tathārūpāssa dhammā bahussutā honti dhātā vacasā paricitā manasānupekkhitā diṭṭhiyā suppaṭividdhā.
dn34:2.1.17 Ayaṁ pañcamo hetu pañcamo paccayo ādibrahmacariyikāya paññāya appaṭiladdhāya paṭilābhāya, paṭiladdhāya bhiyyobhāvāya vepullāya bhāvanāya pāripūriyā saṁvattati.
dn34:2.1.18 Puna caparaṁ, āvuso, bhikkhu āraddhavīriyo viharati akusalānaṁ dhammānaṁ pahānāya, kusalānaṁ dhammānaṁ upasampadāya, thāmavā daḷhaparakkamo anikkhittadhuro kusalesu dhammesu.
dn34:2.1.19 Ayaṁ chaṭṭho hetu chaṭṭho paccayo ādibrahmacariyikāya paññāya appaṭiladdhāya paṭilābhāya, paṭiladdhāya bhiyyobhāvāya vepullāya bhāvanāya pāripūriyā saṁvattati.
dn34:2.1.20 Puna caparaṁ, āvuso, bhikkhu satimā hoti paramena satinepakkena samannāgato. Cirakatampi cirabhāsitampi saritā anussaritā.
dn34:2.1.21 Ayaṁ sattamo hetu sattamo paccayo ādibrahmacariyikāya paññāya appaṭiladdhāya paṭilābhāya, paṭiladdhāya bhiyyobhāvāya vepullāya bhāvanāya pāripūriyā saṁvattati.
dn34:2.1.22 Puna caparaṁ, āvuso, bhikkhu pañcasu upādānakkhandhesu, udayabbayānupassī viharati:
dn34:2.1.23 ‘iti rūpaṁ iti rūpassa samudayo iti rūpassa atthaṅgamo;
dn34:2.1.24 iti vedanā iti vedanāya samudayo iti vedanāya atthaṅgamo;
dn34:2.1.25 iti saññā iti saññāya samudayo iti saññāya atthaṅgamo;
dn34:2.1.26 iti saṅkhārā iti saṅkhārānaṁ samudayo iti saṅkhārānaṁ atthaṅgamo;
dn34:2.1.27 iti viññāṇaṁ iti viññāṇassa samudayo iti viññāṇassa atthaṅgamo’ti.
dn34:2.1.28 Ayaṁ aṭṭhamo hetu aṭṭhamo paccayo ādibrahmacariyikāya paññāya appaṭiladdhāya paṭilābhāya, paṭiladdhāya bhiyyobhāvāya vepullāya bhāvanāya pāripūriyā saṁvattati.
dn34:2.1.29 Ime aṭṭha dhammā bahukārā.
dn34:2.1.30 Katame aṭṭha dhammā bhāvetabbā?
dn34:2.1.31 Ariyo aṭṭhaṅgiko maggo seyyathidaṁ—
dn34:2.1.32 sammādiṭṭhi, sammāsaṅkappo, sammāvācā, sammākammanto, sammāājīvo, sammāvāyāmo, sammāsati, sammāsamādhi.
dn34:2.1.33 Ime aṭṭha dhammā bhāvetabbā.
dn34:2.1.34 Katame aṭṭha dhammā pariññeyyā?
dn34:2.1.35 Aṭṭha lokadhammā—
dn34:2.1.36 lābho ca, alābho ca, yaso ca, ayaso ca, nindā ca, pasaṁsā ca, sukhañca, dukkhañca.
dn34:2.1.37 Ime aṭṭha dhammā pariññeyyā.
dn34:2.1.38 Katame aṭṭha dhammā pahātabbā?
dn34:2.1.39 Aṭṭha micchattā—
dn34:2.1.40 micchādiṭṭhi, micchāsaṅkappo, micchāvācā, micchākammanto, micchāājīvo, micchāvāyāmo, micchāsati, micchāsamādhi.
dn34:2.1.41 Ime aṭṭha dhammā pahātabbā.
dn34:2.1.42 Katame aṭṭha dhammā hānabhāgiyā?
dn34:2.1.43 Aṭṭha kusītavatthūni.
dn34:2.1.44 Idhāvuso, bhikkhunā kammaṁ kātabbaṁ hoti,
dn34:2.1.45 tassa evaṁ hoti:
dn34:2.1.46 ‘kammaṁ kho me kātabbaṁ bhavissati, kammaṁ kho pana me karontassa kāyo kilamissati, handāhaṁ nipajjāmī’ti.
dn34:2.1.47 So nipajjati, na vīriyaṁ ārabhati appattassa pattiyā anadhigatassa adhigamāya asacchikatassa sacchikiriyāya.
dn34:2.1.48 Idaṁ paṭhamaṁ kusītavatthu.
dn34:2.1.49 Puna caparaṁ, āvuso, bhikkhunā kammaṁ kataṁ hoti.
dn34:2.1.50 Tassa evaṁ hoti:
dn34:2.1.51 ‘ahaṁ kho kammaṁ akāsiṁ, kammaṁ kho pana me karontassa kāyo kilanto, handāhaṁ nipajjāmī’ti.
dn34:2.1.52 So nipajjati, na vīriyaṁ ārabhati …pe…
dn34:2.1.53 idaṁ dutiyaṁ kusītavatthu.
dn34:2.1.54 Puna caparaṁ, āvuso, bhikkhunā maggo gantabbo hoti.
dn34:2.1.55 Tassa evaṁ hoti:
dn34:2.1.56 ‘maggo kho me gantabbo bhavissati, maggaṁ kho pana me gacchantassa kāyo kilamissati, handāhaṁ nipajjāmī’ti.
dn34:2.1.57 So nipajjati, na vīriyaṁ ārabhati …pe…
dn34:2.1.58 idaṁ tatiyaṁ kusītavatthu.
dn34:2.1.59 Puna caparaṁ, āvuso, bhikkhunā maggo gato hoti.
dn34:2.1.60 Tassa evaṁ hoti:
dn34:2.1.61 ‘ahaṁ kho maggaṁ agamāsiṁ, maggaṁ kho pana me gacchantassa kāyo kilanto, handāhaṁ nipajjāmī’ti.
dn34:2.1.62 So nipajjati, na vīriyaṁ ārabhati …pe…
dn34:2.1.63 idaṁ catutthaṁ kusītavatthu.
dn34:2.1.64 Puna caparaṁ, āvuso, bhikkhu gāmaṁ vā nigamaṁ vā piṇḍāya caranto na labhati lūkhassa vā paṇītassa vā bhojanassa yāvadatthaṁ pāripūriṁ.
dn34:2.1.65 Tassa evaṁ hoti:
dn34:2.1.66 ‘ahaṁ kho gāmaṁ vā nigamaṁ vā piṇḍāya caranto nālatthaṁ lūkhassa vā paṇītassa vā bhojanassa yāvadatthaṁ pāripūriṁ, tassa me kāyo kilanto akammañño, handāhaṁ nipajjāmī’ti …pe…
dn34:2.1.67 idaṁ pañcamaṁ kusītavatthu.
dn34:2.1.68 Puna caparaṁ, āvuso, bhikkhu gāmaṁ vā nigamaṁ vā piṇḍāya caranto labhati lūkhassa vā paṇītassa vā bhojanassa yāvadatthaṁ pāripūriṁ.
dn34:2.1.69 Tassa evaṁ hoti:
dn34:2.1.70 ‘ahaṁ kho gāmaṁ vā nigamaṁ vā piṇḍāya caranto alatthaṁ lūkhassa vā paṇītassa vā bhojanassa yāvadatthaṁ pāripūriṁ, tassa me kāyo garuko akammañño, māsācitaṁ maññe, handāhaṁ nipajjāmī’ti.
dn34:2.1.71 So nipajjati …pe…
dn34:2.1.72 idaṁ chaṭṭhaṁ kusītavatthu.
dn34:2.1.73 Puna caparaṁ, āvuso, bhikkhuno uppanno hoti appamattako ābādho, tassa evaṁ hoti:
dn34:2.1.74 ‘uppanno kho me ayaṁ appamattako ābādho atthi kappo nipajjituṁ, handāhaṁ nipajjāmī’ti.
dn34:2.1.75 So nipajjati …pe…
dn34:2.1.76 idaṁ sattamaṁ kusītavatthu.
dn34:2.1.77 Puna caparaṁ, āvuso, bhikkhu gilānāvuṭṭhito hoti aciravuṭṭhito gelaññā.
dn34:2.1.78 Tassa evaṁ hoti:
dn34:2.1.79 ‘ahaṁ kho gilānāvuṭṭhito aciravuṭṭhito gelaññā.
dn34:2.1.80 Tassa me kāyo dubbalo akammañño, handāhaṁ nipajjāmī’ti.
dn34:2.1.81 So nipajjati …pe…
dn34:2.1.82 idaṁ aṭṭhamaṁ kusītavatthu.
dn34:2.1.83 Ime aṭṭha dhammā hānabhāgiyā.
dn34:2.1.84 Katame aṭṭha dhammā visesabhāgiyā?
dn34:2.1.85 Aṭṭha ārambhavatthūni.
dn34:2.1.86 Idhāvuso, bhikkhunā kammaṁ kātabbaṁ hoti, tassa evaṁ hoti:
dn34:2.1.87 ‘kammaṁ kho me kātabbaṁ bhavissati, kammaṁ kho pana me karontena na sukaraṁ buddhānaṁ sāsanaṁ manasikātuṁ, handāhaṁ vīriyaṁ ārabhāmi appattassa pattiyā anadhigatassa adhigamāya asacchikatassa sacchikiriyāyā’ti.
dn34:2.1.88 So vīriyaṁ ārabhati appattassa pattiyā anadhigatassa adhigamāya asacchikatassa sacchikiriyāya.
dn34:2.1.89 Idaṁ paṭhamaṁ ārambhavatthu.
dn34:2.1.90 Puna caparaṁ, āvuso, bhikkhunā kammaṁ kataṁ hoti.
dn34:2.1.91 Tassa evaṁ hoti:
dn34:2.1.92 ‘ahaṁ kho kammaṁ akāsiṁ, kammaṁ kho panāhaṁ karonto nāsakkhiṁ buddhānaṁ sāsanaṁ manasikātuṁ, handāhaṁ vīriyaṁ ārabhāmi …pe…
dn34:2.1.93 idaṁ dutiyaṁ ārambhavatthu.
dn34:2.1.94 Puna caparaṁ, āvuso, bhikkhunā maggo gantabbo hoti.
dn34:2.1.95 Tassa evaṁ hoti:
dn34:2.1.96 ‘maggo kho me gantabbo bhavissati, maggaṁ kho pana me gacchantena na sukaraṁ buddhānaṁ sāsanaṁ manasikātuṁ, handāhaṁ vīriyaṁ ārabhāmi …pe…
dn34:2.1.97 idaṁ tatiyaṁ ārambhavatthu.
dn34:2.1.98 Puna caparaṁ, āvuso, bhikkhunā maggo gato hoti.
dn34:2.1.99 Tassa evaṁ hoti:
dn34:2.1.100 ‘ahaṁ kho maggaṁ agamāsiṁ, maggaṁ kho panāhaṁ gacchanto nāsakkhiṁ buddhānaṁ sāsanaṁ manasikātuṁ, handāhaṁ vīriyaṁ ārabhāmi …pe…
dn34:2.1.101 idaṁ catutthaṁ ārambhavatthu.
dn34:2.1.102 Puna caparaṁ, āvuso, bhikkhu gāmaṁ vā nigamaṁ vā piṇḍāya caranto na labhati lūkhassa vā paṇītassa vā bhojanassa yāvadatthaṁ pāripūriṁ.
dn34:2.1.103 Tassa evaṁ hoti:
dn34:2.1.104 ‘ahaṁ kho gāmaṁ vā nigamaṁ vā piṇḍāya caranto nālatthaṁ lūkhassa vā paṇītassa vā bhojanassa yāvadatthaṁ pāripūriṁ, tassa me kāyo lahuko kammañño, handāhaṁ vīriyaṁ ārabhāmi …pe…
dn34:2.1.105 idaṁ pañcamaṁ ārambhavatthu.
dn34:2.1.106 Puna caparaṁ, āvuso, bhikkhu gāmaṁ vā nigamaṁ vā piṇḍāya caranto labhati lūkhassa vā paṇītassa vā bhojanassa yāvadatthaṁ pāripūriṁ.
dn34:2.1.107 Tassa evaṁ hoti:
dn34:2.1.108 ‘ahaṁ kho gāmaṁ vā nigamaṁ vā piṇḍāya caranto alatthaṁ lūkhassa vā paṇītassa vā bhojanassa yāvadatthaṁ pāripūriṁ.
dn34:2.1.109 Tassa me kāyo balavā kammañño, handāhaṁ vīriyaṁ ārabhāmi …pe…
dn34:2.1.110 idaṁ chaṭṭhaṁ ārambhavatthu.
dn34:2.1.111 Puna caparaṁ, āvuso, bhikkhuno uppanno hoti appamattako ābādho.
dn34:2.1.112 Tassa evaṁ hoti:
dn34:2.1.113 ‘uppanno kho me ayaṁ appamattako ābādho ṭhānaṁ kho panetaṁ vijjati, yaṁ me ābādho pavaḍḍheyya, handāhaṁ vīriyaṁ ārabhāmi …pe…
dn34:2.1.114 idaṁ sattamaṁ ārambhavatthu.
dn34:2.1.115 Puna caparaṁ, āvuso, bhikkhu gilānā vuṭṭhito hoti aciravuṭṭhito gelaññā.
dn34:2.1.116 Tassa evaṁ hoti:
dn34:2.1.117 ‘ahaṁ kho gilānā vuṭṭhito aciravuṭṭhito gelaññā, ṭhānaṁ kho panetaṁ vijjati, yaṁ me ābādho paccudāvatteyya, handāhaṁ vīriyaṁ ārabhāmi appattassa pattiyā anadhigatassa adhigamāya asacchikatassa sacchikiriyāyā’ti.
dn34:2.1.118 So vīriyaṁ ārabhati appattassa pattiyā anadhigatassa adhigamāya asacchikatassa sacchikiriyāya.
dn34:2.1.119 Idaṁ aṭṭhamaṁ ārambhavatthu.
dn34:2.1.120 Ime aṭṭha dhammā visesabhāgiyā.
dn34:2.1.121 Katame aṭṭha dhammā duppaṭivijjhā?
dn34:2.1.122 Aṭṭha akkhaṇā asamayā brahmacariyavāsāya.
dn34:2.1.123 Idhāvuso, tathāgato ca loke uppanno hoti arahaṁ sammāsambuddho, dhammo ca desiyati opasamiko parinibbāniko sambodhagāmī sugatappavedito.
dn34:2.1.124 Ayañca puggalo nirayaṁ upapanno hoti.
dn34:2.1.125 Ayaṁ paṭhamo akkhaṇo asamayo brahmacariyavāsāya.
dn34:2.1.126 Puna caparaṁ, āvuso, tathāgato ca loke uppanno hoti arahaṁ sammāsambuddho, dhammo ca desiyati opasamiko parinibbāniko sambodhagāmī sugatappavedito.
dn34:2.1.127 Ayañca puggalo tiracchānayoniṁ upapanno hoti.
dn34:2.1.128 Ayaṁ dutiyo akkhaṇo asamayo brahmacariyavāsāya.
dn34:2.1.129 Puna caparaṁ …pe…
dn34:2.1.130 pettivisayaṁ upapanno hoti.
dn34:2.1.131 Ayaṁ tatiyo akkhaṇo asamayo brahmacariyavāsāya.
dn34:2.1.132 Puna caparaṁ …pe…
dn34:2.1.133 aññataraṁ dīghāyukaṁ devanikāyaṁ upapanno hoti.
dn34:2.1.134 Ayaṁ catuttho akkhaṇo asamayo brahmacariyavāsāya.
dn34:2.1.135 Puna caparaṁ …pe…
dn34:2.1.136 paccantimesu janapadesu paccājāto hoti milakkhesu aviññātāresu, yattha natthi gati bhikkhūnaṁ bhikkhunīnaṁ upāsakānaṁ upāsikānaṁ.
dn34:2.1.137 Ayaṁ pañcamo akkhaṇo asamayo brahmacariyavāsāya.
dn34:2.1.138 Puna caparaṁ …pe…
dn34:2.1.139 ayañca puggalo majjhimesu janapadesu paccājāto hoti, so ca hoti micchādiṭṭhiko viparītadassano:
dn34:2.1.140 ‘natthi dinnaṁ, natthi yiṭṭhaṁ, natthi hutaṁ, natthi sukatadukkaṭānaṁ kammānaṁ phalaṁ vipāko, natthi ayaṁ loko, natthi paro loko, natthi mātā, natthi pitā, natthi sattā opapātikā, natthi loke samaṇabrāhmaṇā sammaggatā sammāpaṭipannā ye imañca lokaṁ parañca lokaṁ sayaṁ abhiññā sacchikatvā pavedentī’ti.
dn34:2.1.141 Ayaṁ chaṭṭho akkhaṇo asamayo brahmacariyavāsāya.
dn34:2.1.142 Puna caparaṁ …pe…
dn34:2.1.143 ayañca puggalo majjhimesu janapadesu paccājāto hoti, so ca hoti duppañño jaḷo eḷamūgo, nappaṭibalo subhāsitadubbhāsitānamatthamaññātuṁ.
dn34:2.1.144 Ayaṁ sattamo akkhaṇo asamayo brahmacariyavāsāya.
dn34:2.1.145 Puna caparaṁ …pe…
dn34:2.1.146 ayañca puggalo majjhimesu janapadesu paccājāto hoti, so ca hoti paññavā ajaḷo aneḷamūgo, paṭibalo subhāsitadubbhāsitānamatthamaññātuṁ.
dn34:2.1.147 Ayaṁ aṭṭhamo akkhaṇo asamayo brahmacariyavāsāya.
dn34:2.1.148 Ime aṭṭha dhammā duppaṭivijjhā.
dn34:2.1.149 Katame aṭṭha dhammā uppādetabbā?
dn34:2.1.150 Aṭṭha mahāpurisavitakkā—
dn34:2.1.151 appicchassāyaṁ dhammo, nāyaṁ dhammo mahicchassa.
dn34:2.1.152 Santuṭṭhassāyaṁ dhammo, nāyaṁ dhammo asantuṭṭhassa.
dn34:2.1.153 Pavivittassāyaṁ dhammo, nāyaṁ dhammo saṅgaṇikārāmassa.
dn34:2.1.154 Āraddhavīriyassāyaṁ dhammo, nāyaṁ dhammo kusītassa.
dn34:2.1.155 Upaṭṭhitasatissāyaṁ dhammo, nāyaṁ dhammo muṭṭhassatissa.
dn34:2.1.156 Samāhitassāyaṁ dhammo, nāyaṁ dhammo asamāhitassa.
dn34:2.1.157 Paññavato ayaṁ dhammo, nāyaṁ dhammo duppaññassa.
dn34:2.1.158 Nippapañcassāyaṁ dhammo, nāyaṁ dhammo papañcārāmassāti ime aṭṭha dhammā uppādetabbā.
dn34:2.1.159 Katame aṭṭha dhammā abhiññeyyā?
dn34:2.1.160 Aṭṭha abhibhāyatanāni—
dn34:2.1.161 ajjhattaṁ rūpasaññī eko bahiddhā rūpāni passati parittāni suvaṇṇadubbaṇṇāni, ‘tāni abhibhuyya jānāmi passāmī’ti—
dn34:2.1.162 evaṁsaññī hoti.
dn34:2.1.163 Idaṁ paṭhamaṁ abhibhāyatanaṁ.
dn34:2.1.164 Ajjhattaṁ rūpasaññī eko bahiddhā rūpāni passati appamāṇāni suvaṇṇadubbaṇṇāni, ‘tāni abhibhuyya jānāmi passāmī’ti—
dn34:2.1.165 evaṁsaññī hoti.
dn34:2.1.166 Idaṁ dutiyaṁ abhibhāyatanaṁ.
dn34:2.1.167 Ajjhattaṁ arūpasaññī eko bahiddhā rūpāni passati parittāni suvaṇṇadubbaṇṇāni, ‘tāni abhibhuyya jānāmi passāmī’ti—
dn34:2.1.168 evaṁsaññī hoti.
dn34:2.1.169 Idaṁ tatiyaṁ abhibhāyatanaṁ.
dn34:2.1.170 Ajjhattaṁ arūpasaññī eko bahiddhā rūpāni passati appamāṇāni suvaṇṇadubbaṇṇāni, ‘tāni abhibhuyya jānāmi passāmī’ti—
dn34:2.1.171 evaṁsaññī hoti.
dn34:2.1.172 Idaṁ catutthaṁ abhibhāyatanaṁ.
dn34:2.1.173 Ajjhattaṁ arūpasaññī eko bahiddhā rūpāni passati nīlāni nīlavaṇṇāni nīlanidassanāni nīlanibhāsāni.
dn34:2.1.174 Seyyathāpi nāma umāpupphaṁ nīlaṁ nīlavaṇṇaṁ nīlanidassanaṁ nīlanibhāsaṁ, seyyathā vā pana taṁ vatthaṁ bārāṇaseyyakaṁ ubhatobhāgavimaṭṭhaṁ nīlaṁ nīlavaṇṇaṁ nīlanidassanaṁ nīlanibhāsaṁ;
dn34:2.1.175 evameva ajjhattaṁ arūpasaññī eko bahiddhā rūpāni passati nīlāni nīlavaṇṇāni nīlanidassanāni nīlanibhāsāni, ‘tāni abhibhuyya jānāmi passāmī’ti evaṁsaññī hoti.
dn34:2.1.176 Idaṁ pañcamaṁ abhibhāyatanaṁ.
dn34:2.1.177 Ajjhattaṁ arūpasaññī eko bahiddhā rūpāni passati pītāni pītavaṇṇāni pītanidassanāni pītanibhāsāni.
dn34:2.1.178 Seyyathāpi nāma kaṇikārapupphaṁ pītaṁ pītavaṇṇaṁ pītanidassanaṁ pītanibhāsaṁ, seyyathā vā pana taṁ vatthaṁ bārāṇaseyyakaṁ ubhatobhāgavimaṭṭhaṁ pītaṁ pītavaṇṇaṁ pītanidassanaṁ pītanibhāsaṁ;
dn34:2.1.179 evameva ajjhattaṁ arūpasaññī eko bahiddhā rūpāni passati pītāni pītavaṇṇāni pītanidassanāni pītanibhāsāni, ‘tāni abhibhuyya jānāmi passāmī’ti evaṁsaññī hoti.
dn34:2.1.180 Idaṁ chaṭṭhaṁ abhibhāyatanaṁ.
dn34:2.1.181 Ajjhattaṁ arūpasaññī eko bahiddhā rūpāni passati lohitakāni lohitakavaṇṇāni lohitakanidassanāni lohitakanibhāsāni.
dn34:2.1.182 Seyyathāpi nāma bandhujīvakapupphaṁ lohitakaṁ lohitakavaṇṇaṁ lohitakanidassanaṁ lohitakanibhāsaṁ, seyyathā vā pana taṁ vatthaṁ bārāṇaseyyakaṁ ubhatobhāgavimaṭṭhaṁ lohitakaṁ lohitakavaṇṇaṁ lohitakanidassanaṁ lohitakanibhāsaṁ;
dn34:2.1.183 evameva ajjhattaṁ arūpasaññī eko bahiddhā rūpāni passati lohitakāni lohitakavaṇṇāni lohitakanidassanāni lohitakanibhāsāni, ‘tāni abhibhuyya jānāmi passāmī’ti evaṁsaññī hoti.
dn34:2.1.184 Idaṁ sattamaṁ abhibhāyatanaṁ.
dn34:2.1.185 Ajjhattaṁ arūpasaññī eko bahiddhā rūpāni passati odātāni odātavaṇṇāni odātanidassanāni odātanibhāsāni.
dn34:2.1.186 Seyyathāpi nāma osadhitārakā odātā odātavaṇṇā odātanidassanā odātanibhāsā, seyyathā vā pana taṁ vatthaṁ bārāṇaseyyakaṁ ubhatobhāgavimaṭṭhaṁ odātaṁ odātavaṇṇaṁ odātanidassanaṁ odātanibhāsaṁ;
dn34:2.1.187 evameva ajjhattaṁ arūpasaññī eko bahiddhā rūpāni passati odātāni odātavaṇṇāni odātanidassanāni odātanibhāsāni, ‘tāni abhibhuyya jānāmi passāmī’ti evaṁsaññī hoti.
dn34:2.1.188 Idaṁ aṭṭhamaṁ abhibhāyatanaṁ.
dn34:2.1.189 Ime aṭṭha dhammā abhiññeyyā.
dn34:2.1.190 Katame aṭṭha dhammā sacchikātabbā?
dn34:2.1.191 Aṭṭha vimokkhā—
dn34:2.1.192 rūpī rūpāni passati.
dn34:2.1.193 Ayaṁ paṭhamo vimokkho.
dn34:2.1.194 Ajjhattaṁ arūpasaññī eko bahiddhā rūpāni passati.
dn34:2.1.195 Ayaṁ dutiyo vimokkho.
dn34:2.1.196 Subhanteva adhimutto hoti.
dn34:2.1.197 Ayaṁ tatiyo vimokkho.
dn34:2.1.198 Sabbaso rūpasaññānaṁ samatikkamā paṭighasaññānaṁ atthaṅgamā nānattasaññānaṁ amanasikārā ‘ananto ākāso’ti ākāsānañcāyatanaṁ upasampajja viharati.
dn34:2.1.199 Ayaṁ catuttho vimokkho.
dn34:2.1.200 Sabbaso ākāsānañcāyatanaṁ samatikkamma ‘anantaṁ viññāṇan’ti viññāṇañcāyatanaṁ upasampajja viharati.
dn34:2.1.201 Ayaṁ pañcamo vimokkho.
dn34:2.1.202 Sabbaso viññāṇañcāyatanaṁ samatikkamma ‘natthi kiñcī’ti ākiñcaññāyatanaṁ upasampajja viharati.
dn34:2.1.203 Ayaṁ chaṭṭho vimokkho.
dn34:2.1.204 Sabbaso ākiñcaññāyatanaṁ samatikkamma nevasaññānāsaññāyatanaṁ upasampajja viharati.
dn34:2.1.205 Ayaṁ sattamo vimokkho.
dn34:2.1.206 Sabbaso nevasaññānāsaññāyatanaṁ samatikkamma saññāvedayitanirodhaṁ upasampajja viharati.
dn34:2.1.207 Ayaṁ aṭṭhamo vimokkho.
dn34:2.1.208 Ime aṭṭha dhammā sacchikātabbā.
dn34:2.1.209 Iti ime asīti dhammā bhūtā tacchā tathā avitathā anaññathā sammā tathāgatena abhisambuddhā.
dn34:2.2.0 9. Nava dhammā
dn34:2.2.1 Nava dhammā bahukārā …pe… nava dhammā sacchikātabbā.
dn34:2.2.2 Katame nava dhammā bahukārā?
dn34:2.2.3 Nava yonisomanasikāramūlakā dhammā, yonisomanasikaroto pāmojjaṁ jāyati, pamuditassa pīti jāyati, pītimanassa kāyo passambhati, passaddhakāyo sukhaṁ vedeti, sukhino cittaṁ samādhiyati, samāhite citte yathābhūtaṁ jānāti passati, yathābhūtaṁ jānaṁ passaṁ nibbindati, nibbindaṁ virajjati, virāgā vimuccati.
dn34:2.2.4 Ime nava dhammā bahukārā.
dn34:2.2.5 Katame nava dhammā bhāvetabbā?
dn34:2.2.6 Nava pārisuddhipadhāniyaṅgāni—
dn34:2.2.7 sīlavisuddhi pārisuddhipadhāniyaṅgaṁ, cittavisuddhi pārisuddhipadhāniyaṅgaṁ, diṭṭhivisuddhi pārisuddhipadhāniyaṅgaṁ, kaṅkhāvitaraṇavisuddhi pārisuddhipadhāniyaṅgaṁ, maggāmaggañāṇadassanavisuddhi pārisuddhipadhāniyaṅgaṁ, paṭipadāñāṇadassanavisuddhi pārisuddhipadhāniyaṅgaṁ, ñāṇadassanavisuddhi pārisuddhipadhāniyaṅgaṁ, paññāvisuddhi pārisuddhipadhāniyaṅgaṁ, vimuttivisuddhi pārisuddhipadhāniyaṅgaṁ.
dn34:2.2.8 Ime nava dhammā bhāvetabbā.
dn34:2.2.9 Katame nava dhammā pariññeyyā?
dn34:2.2.10 Nava sattāvāsā—
dn34:2.2.11 santāvuso, sattā nānattakāyā nānattasaññino, seyyathāpi manussā ekacce ca devā ekacce ca vinipātikā.
dn34:2.2.12 Ayaṁ paṭhamo sattāvāso.
dn34:2.2.13 Santāvuso, sattā nānattakāyā ekattasaññino, seyyathāpi devā brahmakāyikā paṭhamābhinibbattā.
dn34:2.2.14 Ayaṁ dutiyo sattāvāso.
dn34:2.2.15 Santāvuso, sattā ekattakāyā nānattasaññino, seyyathāpi devā ābhassarā.
dn34:2.2.16 Ayaṁ tatiyo sattāvāso.
dn34:2.2.17 Santāvuso, sattā ekattakāyā ekattasaññino, seyyathāpi devā subhakiṇhā.
dn34:2.2.18 Ayaṁ catuttho sattāvāso.
dn34:2.2.19 Santāvuso, sattā asaññino appaṭisaṁvedino, seyyathāpi devā asaññasattā.
dn34:2.2.20 Ayaṁ pañcamo sattāvāso.
dn34:2.2.21 Santāvuso, sattā sabbaso rūpasaññānaṁ samatikkamā paṭighasaññānaṁ atthaṅgamā nānattasaññānaṁ amanasikārā ‘ananto ākāso’ti ākāsānañcāyatanūpagā.
dn34:2.2.22 Ayaṁ chaṭṭho sattāvāso.
dn34:2.2.23 Santāvuso, sattā sabbaso ākāsānañcāyatanaṁ samatikkamma ‘anantaṁ viññāṇan’ti viññāṇañcāyatanūpagā.
dn34:2.2.24 Ayaṁ sattamo sattāvāso.
dn34:2.2.25 Santāvuso, sattā sabbaso viññāṇañcāyatanaṁ samatikkamma ‘natthi kiñcī’ti ākiñcaññāyatanūpagā.
dn34:2.2.26 Ayaṁ aṭṭhamo sattāvāso.
dn34:2.2.27 Santāvuso, sattā sabbaso ākiñcaññāyatanaṁ samatikkamma nevasaññānāsaññāyatanūpagā.
dn34:2.2.28 Ayaṁ navamo sattāvāso.
dn34:2.2.29 Ime nava dhammā pariññeyyā.
dn34:2.2.30 Katame nava dhammā pahātabbā?
dn34:2.2.31 Nava taṇhāmūlakā dhammā—
dn34:2.2.32 taṇhaṁ paṭicca pariyesanā, pariyesanaṁ paṭicca lābho, lābhaṁ paṭicca vinicchayo, vinicchayaṁ paṭicca chandarāgo, chandarāgaṁ paṭicca ajjhosānaṁ, ajjhosānaṁ paṭicca pariggaho, pariggahaṁ paṭicca macchariyaṁ, macchariyaṁ paṭicca ārakkho, ārakkhādhikaraṇaṁ daṇḍādānasatthādānakalahaviggahavivādatuvaṁtuvaṁpesuññamusāvādā aneke pāpakā akusalā dhammā sambhavanti.
dn34:2.2.33 Ime nava dhammā pahātabbā.
dn34:2.2.34 Katame nava dhammā hānabhāgiyā?
dn34:2.2.35 Nava āghātavatthūni:
dn34:2.2.36 ‘anatthaṁ me acarī’ti āghātaṁ bandhati,
dn34:2.2.37 ‘anatthaṁ me caratī’ti āghātaṁ bandhati,
dn34:2.2.38 ‘anatthaṁ me carissatī’ti āghātaṁ bandhati;
dn34:2.2.39 ‘piyassa me manāpassa anatthaṁ acarī’ti āghātaṁ bandhati …pe…
dn34:2.2.40 ‘anatthaṁ caratī’ti āghātaṁ bandhati …pe…
dn34:2.2.41 ‘anatthaṁ carissatī’ti āghātaṁ bandhati;
dn34:2.2.42 ‘appiyassa me amanāpassa atthaṁ acarī’ti āghātaṁ bandhati …pe…
dn34:2.2.43 ‘atthaṁ caratī’ti āghātaṁ bandhati …pe…
dn34:2.2.44 ‘atthaṁ carissatī’ti āghātaṁ bandhati.
dn34:2.2.45 Ime nava dhammā hānabhāgiyā.
dn34:2.2.46 Katame nava dhammā visesabhāgiyā?
dn34:2.2.47 Nava āghātapaṭivinayā:
dn34:2.2.48 ‘anatthaṁ me acari, taṁ kutettha labbhā’ti āghātaṁ paṭivineti;
dn34:2.2.49 ‘anatthaṁ me carati, taṁ kutettha labbhā’ti āghātaṁ paṭivineti;
dn34:2.2.50 ‘anatthaṁ me carissati, taṁ kutettha labbhā’ti āghātaṁ paṭivineti;
dn34:2.2.51 ‘piyassa me manāpassa anatthaṁ acari …pe…
dn34:2.2.52 anatthaṁ carati …pe…
dn34:2.2.53 anatthaṁ carissati, taṁ kutettha labbhā’ti āghātaṁ paṭivineti;
dn34:2.2.54 ‘appiyassa me amanāpassa atthaṁ acari …pe…
dn34:2.2.55 atthaṁ carati …pe…
dn34:2.2.56 atthaṁ carissati, taṁ kutettha labbhā’ti āghātaṁ paṭivineti.
dn34:2.2.57 Ime nava dhammā visesabhāgiyā.
dn34:2.2.58 Katame nava dhammā duppaṭivijjhā?
dn34:2.2.59 Nava nānattā—
dn34:2.2.60 dhātunānattaṁ paṭicca uppajjati phassanānattaṁ, phassanānattaṁ paṭicca uppajjati vedanānānattaṁ, vedanānānattaṁ paṭicca uppajjati saññānānattaṁ, saññānānattaṁ paṭicca uppajjati saṅkappanānattaṁ, saṅkappanānattaṁ paṭicca uppajjati chandanānattaṁ, chandanānattaṁ paṭicca uppajjati pariḷāhanānattaṁ, pariḷāhanānattaṁ paṭicca uppajjati pariyesanānānattaṁ, pariyesanānānattaṁ paṭicca uppajjati lābhanānattaṁ (…).
dn34:2.2.61 Ime nava dhammā duppaṭivijjhā.
dn34:2.2.62 Katame nava dhammā uppādetabbā?
dn34:2.2.63 Nava saññā—
dn34:2.2.64 asubhasaññā, maraṇasaññā, āhāre paṭikūlasaññā, sabbaloke anabhiratisaññā, aniccasaññā, anicce dukkhasaññā, dukkhe anattasaññā, pahānasaññā, virāgasaññā.
dn34:2.2.65 Ime nava dhammā uppādetabbā.
dn34:2.2.66 Katame nava dhammā abhiññeyyā?
dn34:2.2.67 Nava anupubbavihārā—
dn34:2.2.68 idhāvuso, bhikkhu vivicceva kāmehi vivicca akusalehi dhammehi savitakkaṁ savicāraṁ vivekajaṁ pītisukhaṁ paṭhamaṁ jhānaṁ upasampajja viharati.
dn34:2.2.69 Vitakkavicārānaṁ vūpasamā …pe… dutiyaṁ jhānaṁ upasampajja viharati.
dn34:2.2.70 Pītiyā ca virāgā …pe… tatiyaṁ jhānaṁ upasampajja viharati.
dn34:2.2.71 Sukhassa ca pahānā …pe… catutthaṁ jhānaṁ upasampajja viharati.
dn34:2.2.72 Sabbaso rūpasaññānaṁ samatikkamā …pe… ākāsānañcāyatanaṁ upasampajja viharati.
dn34:2.2.73 Sabbaso ākāsānañcāyatanaṁ samatikkamma ‘anantaṁ viññāṇan’ti viññāṇañcāyatanaṁ upasampajja viharati.
dn34:2.2.74 Sabbaso viññāṇañcāyatanaṁ samatikkamma ‘natthi kiñcī’ti ākiñcaññāyatanaṁ upasampajja viharati.
dn34:2.2.75 Sabbaso ākiñcaññāyatanaṁ samatikkamma nevasaññānāsaññāyatanaṁ upasampajja viharati.
dn34:2.2.76 Sabbaso nevasaññānāsaññāyatanaṁ samatikkamma saññāvedayitanirodhaṁ upasampajja viharati.
dn34:2.2.77 Ime nava dhammā abhiññeyyā.
dn34:2.2.78 Katame nava dhammā sacchikātabbā?
dn34:2.2.79 Nava anupubbanirodhā—
dn34:2.2.80 paṭhamaṁ jhānaṁ samāpannassa kāmasaññā niruddhā hoti,
dn34:2.2.81 dutiyaṁ jhānaṁ samāpannassa vitakkavicārā niruddhā honti,
dn34:2.2.82 tatiyaṁ jhānaṁ samāpannassa pīti niruddhā hoti,
dn34:2.2.83 catutthaṁ jhānaṁ samāpannassa assāsapassāssā niruddhā honti,
dn34:2.2.84 ākāsānañcāyatanaṁ samāpannassa rūpasaññā niruddhā hoti,
dn34:2.2.85 viññāṇañcāyatanaṁ samāpannassa ākāsānañcāyatanasaññā niruddhā hoti,
dn34:2.2.86 ākiñcaññāyatanaṁ samāpannassa viññāṇañcāyatanasaññā niruddhā hoti,
dn34:2.2.87 nevasaññānāsaññāyatanaṁ samāpannassa ākiñcaññāyatanasaññā niruddhā hoti,
dn34:2.2.88 saññāvedayitanirodhaṁ samāpannassa saññā ca vedanā ca niruddhā honti.
dn34:2.2.89 Ime nava dhammā sacchikātabbā.
dn34:2.2.90 Iti ime navuti dhammā bhūtā tacchā tathā avitathā anaññathā sammā tathāgatena abhisambuddhā.
dn34:2.3.0 10. Dasa dhammā
dn34:2.3.1 Dasa dhammā bahukārā …pe… dasa dhammā sacchikātabbā.
dn34:2.3.2 Katame dasa dhammā bahukārā?
dn34:2.3.3 Dasa nāthakaraṇā dhammā—
dn34:2.3.4 idhāvuso, bhikkhu sīlavā hoti, pātimokkhasaṁvarasaṁvuto viharati ācāragocarasampanno, aṇumattesu vajjesu bhayadassāvī samādāya sikkhati sikkhāpadesu.
dn34:2.3.5 Yaṁpāvuso, bhikkhu sīlavā hoti …pe… sikkhati sikkhāpadesu.
dn34:2.3.6 Ayampi dhammo nāthakaraṇo.
dn34:2.3.7 Puna caparaṁ, āvuso, bhikkhu bahussuto …pe… diṭṭhiyā suppaṭividdhā.
dn34:2.3.8 Yaṁpāvuso, bhikkhu bahussuto …pe…
dn34:2.3.9 ayampi dhammo nāthakaraṇo.
dn34:2.3.10 Puna caparaṁ, āvuso, bhikkhu kalyāṇamitto hoti kalyāṇasahāyo kalyāṇasampavaṅko.
dn34:2.3.11 Yaṁpāvuso, bhikkhu …pe… kalyāṇasampavaṅko.
dn34:2.3.12 Ayampi dhammo nāthakaraṇo.
dn34:2.3.13 Puna caparaṁ, āvuso, bhikkhu suvaco hoti sovacassakaraṇehi dhammehi samannāgato, khamo padakkhiṇaggāhī anusāsaniṁ.
dn34:2.3.14 Yaṁpāvuso, bhikkhu …pe… anusāsaniṁ.
dn34:2.3.15 Ayampi dhammo nāthakaraṇo.
dn34:2.3.16 Puna caparaṁ, āvuso, bhikkhu yāni tāni sabrahmacārīnaṁ uccāvacāni kiṅkaraṇīyāni tattha dakkho hoti analaso tatrupāyāya vīmaṁsāya samannāgato, alaṁ kātuṁ, alaṁ saṁvidhātuṁ.
dn34:2.3.17 Yaṁpāvuso, bhikkhu …pe… alaṁ saṁvidhātuṁ.
dn34:2.3.18 Ayampi dhammo nāthakaraṇo.
dn34:2.3.19 Puna caparaṁ, āvuso, bhikkhu dhammakāmo hoti piyasamudāhāro abhidhamme abhivinaye uḷārapāmojjo.
dn34:2.3.20 Yaṁpāvuso, bhikkhu …pe… uḷārapāmojjo.
dn34:2.3.21 Ayampi dhammo nāthakaraṇo.
dn34:2.3.22 Puna caparaṁ, āvuso, bhikkhu santuṭṭho hoti itarītarehi cīvarapiṇḍapātasenāsanagilānappaccayabhesajjaparikkhārehi.
dn34:2.3.23 Yaṁpāvuso, bhikkhu …pe…
dn34:2.3.24 ayampi dhammo nāthakaraṇo.
dn34:2.3.25 Puna caparaṁ, āvuso, bhikkhu āraddhavīriyo viharati …pe… kusalesu dhammesu.
dn34:2.3.26 Yaṁpāvuso, bhikkhu …pe…
dn34:2.3.27 ayampi dhammo nāthakaraṇo.
dn34:2.3.28 Puna caparaṁ, āvuso, bhikkhu satimā hoti, paramena satinepakkena samannāgato, cirakatampi cirabhāsitampi saritā anussaritā.
dn34:2.3.29 Yaṁpāvuso, bhikkhu …pe…
dn34:2.3.30 ayampi dhammo nāthakaraṇo.
dn34:2.3.31 Puna caparaṁ, āvuso, bhikkhu paññavā hoti udayatthagāminiyā paññāya samannāgato, ariyāya nibbedhikāya sammā dukkhakkhayagāminiyā.
dn34:2.3.32 Yaṁpāvuso, bhikkhu …pe…
dn34:2.3.33 ayampi dhammo nāthakaraṇo.
dn34:2.3.34 Ime dasa dhammā bahukārā.
dn34:2.3.35 Katame dasa dhammā bhāvetabbā?
dn34:2.3.36 Dasa kasiṇāyatanāni—
dn34:2.3.37 pathavīkasiṇameko sañjānāti uddhaṁ adho tiriyaṁ advayaṁ appamāṇaṁ.
dn34:2.3.38 Āpokasiṇameko sañjānāti …pe…
dn34:2.3.39 tejokasiṇameko sañjānāti …
dn34:2.3.40 vāyokasiṇameko sañjānāti …
dn34:2.3.41 nīlakasiṇameko sañjānāti …
dn34:2.3.42 pītakasiṇameko sañjānāti …
dn34:2.3.43 lohitakasiṇameko sañjānāti …
dn34:2.3.44 odātakasiṇameko sañjānāti …
dn34:2.3.45 ākāsakasiṇameko sañjānāti …
dn34:2.3.46 viññāṇakasiṇameko sañjānāti uddhaṁ adho tiriyaṁ advayaṁ appamāṇaṁ.
dn34:2.3.47 Ime dasa dhammā bhāvetabbā.
dn34:2.3.48 Katame dasa dhammā pariññeyyā?
dn34:2.3.49 Dasāyatanāni—
dn34:2.3.50 cakkhāyatanaṁ, rūpāyatanaṁ, sotāyatanaṁ, saddāyatanaṁ, ghānāyatanaṁ, gandhāyatanaṁ, jivhāyatanaṁ, rasāyatanaṁ, kāyāyatanaṁ, phoṭṭhabbāyatanaṁ.
dn34:2.3.51 Ime dasa dhammā pariññeyyā.
dn34:2.3.52 Katame dasa dhammā pahātabbā?
dn34:2.3.53 Dasa micchattā—
dn34:2.3.54 micchādiṭṭhi, micchāsaṅkappo, micchāvācā, micchākammanto, micchāājīvo, micchāvāyāmo, micchāsati, micchāsamādhi, micchāñāṇaṁ, micchāvimutti.
dn34:2.3.55 Ime dasa dhammā pahātabbā.
dn34:2.3.56 Katame dasa dhammā hānabhāgiyā?
dn34:2.3.57 Dasa akusalakammapathā—
dn34:2.3.58 pāṇātipāto, adinnādānaṁ, kāmesumicchācāro, musāvādo, pisuṇā vācā, pharusā vācā, samphappalāpo, abhijjhā, byāpādo, micchādiṭṭhi.
dn34:2.3.59 Ime dasa dhammā hānabhāgiyā.
dn34:2.3.60 Katame dasa dhammā visesabhāgiyā?
dn34:2.3.61 Dasa kusalakammapathā—
dn34:2.3.62 pāṇātipātā veramaṇī, adinnādānā veramaṇī, kāmesumicchācārā veramaṇī, musāvādā veramaṇī, pisuṇāya vācāya veramaṇī, pharusāya vācāya veramaṇī, samphappalāpā veramaṇī, anabhijjhā, abyāpādo, sammādiṭṭhi.
dn34:2.3.63 Ime dasa dhammā visesabhāgiyā.
dn34:2.3.64 Katame dasa dhammā duppaṭivijjhā?
dn34:2.3.65 Dasa ariyavāsā—
dn34:2.3.66 idhāvuso, bhikkhu pañcaṅgavippahīno hoti, chaḷaṅgasamannāgato, ekārakkho, caturāpasseno, paṇunnapaccekasacco, samavayasaṭṭhesano, anāvilasaṅkappo, passaddhakāyasaṅkhāro, suvimuttacitto, suvimuttapañño.
dn34:2.3.67 Kathañcāvuso, bhikkhu pañcaṅgavippahīno hoti?
dn34:2.3.68 Idhāvuso, bhikkhuno kāmacchando pahīno hoti, byāpādo pahīno hoti, thinamiddhaṁ pahīnaṁ hoti, uddhaccakukkuccaṁ pahīnaṁ hoti, vicikicchā pahīnā hoti.
dn34:2.3.69 Evaṁ kho, āvuso, bhikkhu pañcaṅgavippahīno hoti.
dn34:2.3.70 Kathañcāvuso, bhikkhu chaḷaṅgasamannāgato hoti?
dn34:2.3.71 Idhāvuso, bhikkhu cakkhunā rūpaṁ disvā neva sumano hoti na dummano, upekkhako viharati sato sampajāno.
dn34:2.3.72 Sotena saddaṁ sutvā …pe…
dn34:2.3.73 ghānena gandhaṁ ghāyitvā …
dn34:2.3.74 jivhāya rasaṁ sāyitvā …
dn34:2.3.75 kāyena phoṭṭhabbaṁ phusitvā …
dn34:2.3.76 manasā dhammaṁ viññāya neva sumano hoti na dummano, upekkhako viharati sato sampajāno.
dn34:2.3.77 Evaṁ kho, āvuso, bhikkhu chaḷaṅgasamannāgato hoti.
dn34:2.3.78 Kathañcāvuso, bhikkhu ekārakkho hoti?
dn34:2.3.79 Idhāvuso, bhikkhu satārakkhena cetasā samannāgato hoti.
dn34:2.3.80 Evaṁ kho, āvuso, bhikkhu ekārakkho hoti.
dn34:2.3.81 Kathañcāvuso, bhikkhu caturāpasseno hoti?
dn34:2.3.82 Idhāvuso, bhikkhu saṅkhāyekaṁ paṭisevati, saṅkhāyekaṁ adhivāseti, saṅkhāyekaṁ parivajjeti, saṅkhāyekaṁ vinodeti.
dn34:2.3.83 Evaṁ kho, āvuso, bhikkhu caturāpasseno hoti.
dn34:2.3.84 Kathañcāvuso, bhikkhu paṇunnapaccekasacco hoti?
dn34:2.3.85 Idhāvuso, bhikkhuno yāni tāni puthusamaṇabrāhmaṇānaṁ puthupaccekasaccāni, sabbāni tāni nunnāni honti paṇunnāni cattāni vantāni muttāni pahīnāni paṭinissaṭṭhāni.
dn34:2.3.86 Evaṁ kho, āvuso, bhikkhu paṇunnapaccekasacco hoti.
dn34:2.3.87 Kathañcāvuso, bhikkhu samavayasaṭṭhesano hoti?
dn34:2.3.88 Idhāvuso, bhikkhuno kāmesanā pahīnā hoti, bhavesanā pahīnā hoti, brahmacariyesanā paṭippassaddhā.
dn34:2.3.89 Evaṁ kho, āvuso, bhikkhu samavayasaṭṭhesano hoti.
dn34:2.3.90 Kathañcāvuso, bhikkhu anāvilasaṅkappā hoti?
dn34:2.3.91 Idhāvuso, bhikkhuno kāmasaṅkappo pahīno hoti, byāpādasaṅkappo pahīno hoti, vihiṁsāsaṅkappo pahīno hoti.
dn34:2.3.92 Evaṁ kho, āvuso, bhikkhu anāvilasaṅkappo hoti.
dn34:2.3.93 Kathañcāvuso, bhikkhu passaddhakāyasaṅkhāro hoti?
dn34:2.3.94 Idhāvuso, bhikkhu sukhassa ca pahānā dukkhassa ca pahānā pubbeva somanassadomanassānaṁ atthaṅgamā adukkhamasukhaṁ upekkhāsatipārisuddhiṁ catutthaṁ jhānaṁ upasampajja viharati.
dn34:2.3.95 Evaṁ kho, āvuso, bhikkhu passaddhakāyasaṅkhāro hoti.
dn34:2.3.96 Kathañcāvuso, bhikkhu suvimuttacitto hoti?
dn34:2.3.97 Idhāvuso, bhikkhuno rāgā cittaṁ vimuttaṁ hoti, dosā cittaṁ vimuttaṁ hoti, mohā cittaṁ vimuttaṁ hoti.
dn34:2.3.98 Evaṁ kho, āvuso, bhikkhu suvimuttacitto hoti.
dn34:2.3.99 Kathañcāvuso, bhikkhu suvimuttapañño hoti?
dn34:2.3.100 Idhāvuso, bhikkhu ‘rāgo me pahīno ucchinnamūlo tālāvatthukato anabhāvaṅkato āyatiṁ anuppādadhammo’ti pajānāti.
dn34:2.3.101 ‘Doso me pahīno …pe…
dn34:2.3.102 āyatiṁ anuppādadhammo’ti pajānāti.
dn34:2.3.103 ‘Moho me pahīno …pe…
dn34:2.3.104 āyatiṁ anuppādadhammo’ti pajānāti.
dn34:2.3.105 Evaṁ kho, āvuso, bhikkhu suvimuttapañño hoti.
dn34:2.3.106 Ime dasa dhammā duppaṭivijjhā.
dn34:2.3.107 Katame dasa dhammā uppādetabbā?
dn34:2.3.108 Dasa saññā—
dn34:2.3.109 asubhasaññā, maraṇasaññā, āhāre paṭikūlasaññā, sabbaloke anabhiratisaññā, aniccasaññā, anicce dukkhasaññā, dukkhe anattasaññā, pahānasaññā, virāgasaññā, nirodhasaññā.
dn34:2.3.110 Ime dasa dhammā uppādetabbā.
dn34:2.3.111 Katame dasa dhammā abhiññeyyā?
dn34:2.3.112 Dasa nijjaravatthūni—
dn34:2.3.113 sammādiṭṭhissa micchādiṭṭhi nijjiṇṇā hoti.
dn34:2.3.114 Ye ca micchādiṭṭhipaccayā aneke pāpakā akusalā dhammā sambhavanti, te cassa nijjiṇṇā honti.
dn34:2.3.115 Sammāsaṅkappassa micchāsaṅkappo …pe…
dn34:2.3.116 sammāvācassa micchāvācā …
dn34:2.3.117 sammākammantassa micchākammanto …
dn34:2.3.118 sammāājīvassa micchāājīvo …
dn34:2.3.119 sammāvāyāmassa micchāvāyāmo …
dn34:2.3.120 sammāsatissa micchāsati …
dn34:2.3.121 sammāsamādhissa micchāsamādhi …
dn34:2.3.122 sammāñāṇassa micchāñāṇaṁ nijjiṇṇaṁ hoti.
dn34:2.3.123 Sammāvimuttissa micchāvimutti nijjiṇṇā hoti.
dn34:2.3.124 Ye ca micchāvimuttipaccayā aneke pāpakā akusalā dhammā sambhavanti, te cassa nijjiṇṇā honti.
dn34:2.3.125 Ime dasa dhammā abhiññeyyā.
dn34:2.3.126 Katame dasa dhammā sacchikātabbā?
dn34:2.3.127 Dasa asekkhā dhammā—
dn34:2.3.128 asekkhā sammādiṭṭhi, asekkho sammāsaṅkappo, asekkhā sammāvācā, asekkho sammākammanto, asekkho sammāājīvo, asekkho sammāvāyāmo, asekkhā sammāsati, asekkho sammāsamādhi, asekkhaṁ sammāñāṇaṁ, asekkhā sammāvimutti.
dn34:2.3.129 Ime dasa dhammā sacchikātabbā.
dn34:2.3.130 Iti ime satadhammā bhūtā tacchā tathā avitathā anaññathā sammā tathāgatena abhisambuddhā”ti.
dn34:2.3.131 Idamavocāyasmā sāriputto.
dn34:2.3.132 Attamanā te bhikkhū āyasmato sāriputtassa bhāsitaṁ abhinandunti.
dn34:2.3.133 Dasuttarasuttaṁ niṭṭhitaṁ ekādasamaṁ.
dn34:2.3.134 Pāthikavaggo niṭṭhito.
dn34:2.4.0 Tassuddānaṁ
dn34:2.4.1 Pāthiko ca udumbaraṁ,
dn34:2.4.2 cakkavatti aggaññakaṁ;
dn34:2.4.3 Sampasādanapāsādaṁ,
dn34:2.4.4 mahāpurisalakkhaṇaṁ.
dn34:2.4.5 Siṅgālāṭānāṭiyakaṁ,
dn34:2.4.6 saṅgīti ca dasuttaraṁ;
dn34:2.4.7 Ekādasahi suttehi,
dn34:2.4.8 pāthikavaggoti vuccati.
dn34:2.4.9 Pāthikavaggapāḷi niṭṭhitā.
dn34:2.4.10 Tīhi vaggehi paṭimaṇḍito sakalo
dn34:2.4.11 dīghanikāyo samatto.