dn34:1.1.1 Evaṁ me sutaṁ—
BAGIAN 1
dn34:1.1.2 ekaṁ samayaṁ bhagavā campāyaṁ viharati gaggarāya pokkharaṇiyā tīre mahatā bhikkhusaṅghena saddhiṁ pañcamattehi bhikkhusatehi.
dn34:1.1.3 Tatra kho āyasmā sāriputto bhikkhū āmantesi:
dn34:1.1.4 “āvuso bhikkhave”ti.
dn34:1.1.5 “Āvuso”ti kho te bhikkhū āyasmato sāriputtassa paccassosuṁ.
dn34:1.1.6 Āyasmā sāriputto etadavoca:
dn34:1.1.7 “Dasuttaraṁ pavakkhāmi,
dn34:1.1.8 dhammaṁ nibbānapattiyā;
dn34:1.1.9 Dukkhassantakiriyāya,
dn34:1.1.10 sabbaganthappamocanaṁ.
dn34:1.2.0 1. Eko dhammo
dn34:1.2.1 Eko, āvuso, dhammo bahukāro, eko dhammo bhāvetabbo, eko dhammo pariññeyyo, eko dhammo pahātabbo, eko dhammo hānabhāgiyo, eko dhammo visesabhāgiyo, eko dhammo duppaṭivijjho, eko dhammo uppādetabbo, eko dhammo abhiññeyyo, eko dhammo sacchikātabbo.
dn34:1.2.2 Katamo eko dhammo bahukāro?
dn34:1.2.3 Appamādo kusalesu dhammesu.
dn34:1.2.4 Ayaṁ eko dhammo bahukāro.
dn34:1.2.5 Katamo eko dhammo bhāvetabbo?
dn34:1.2.6 Kāyagatāsati sātasahagatā.
dn34:1.2.7 Ayaṁ eko dhammo bhāvetabbo.
dn34:1.2.8 Katamo eko dhammo pariññeyyo?
dn34:1.2.9 Phasso sāsavo upādāniyo.
dn34:1.2.10 Ayaṁ eko dhammo pariññeyyo.
dn34:1.2.11 Katamo eko dhammo pahātabbo?
dn34:1.2.12 Asmimāno.
dn34:1.2.13 Ayaṁ eko dhammo pahātabbo.
dn34:1.2.14 Katamo eko dhammo hānabhāgiyo?
dn34:1.2.15 Ayoniso manasikāro.
dn34:1.2.16 Ayaṁ eko dhammo hānabhāgiyo.
dn34:1.2.17 Katamo eko dhammo visesabhāgiyo?
dn34:1.2.18 Yoniso manasikāro.
dn34:1.2.19 Ayaṁ eko dhammo visesabhāgiyo.
dn34:1.2.20 Katamo eko dhammo duppaṭivijjho?
dn34:1.2.21 Ānantariko cetosamādhi.
dn34:1.2.22 Ayaṁ eko dhammo duppaṭivijjho.
dn34:1.2.23 Katamo eko dhammo uppādetabbo?
dn34:1.2.24 Akuppaṁ ñāṇaṁ.
dn34:1.2.25 Ayaṁ eko dhammo uppādetabbo.
dn34:1.2.26 Katamo eko dhammo abhiññeyyo?
dn34:1.2.27 Sabbe sattā āhāraṭṭhitikā.
dn34:1.2.28 Ayaṁ eko dhammo abhiññeyyo.
dn34:1.2.29 Katamo eko dhammo sacchikātabbo?
dn34:1.2.30 Akuppā cetovimutti.
dn34:1.2.31 Ayaṁ eko dhammo sacchikātabbo.
dn34:1.2.32 Iti ime dasa dhammā bhūtā tacchā tathā avitathā anaññathā sammā tathāgatena abhisambuddhā.
dn34:1.3.0 2. Dve dhammā
dn34:1.3.1 Dve dhammā bahukārā, dve dhammā bhāvetabbā, dve dhammā pariññeyyā, dve dhammā pahātabbā, dve dhammā hānabhāgiyā, dve dhammā visesabhāgiyā, dve dhammā duppaṭivijjhā, dve dhammā uppādetabbā, dve dhammā abhiññeyyā, dve dhammā sacchikātabbā.
dn34:1.3.2 Katame dve dhammā bahukārā?
dn34:1.3.3 Sati ca sampajaññañca.
dn34:1.3.4 Ime dve dhammā bahukārā.
dn34:1.3.5 Katame dve dhammā bhāvetabbā?
dn34:1.3.6 Samatho ca vipassanā ca.
dn34:1.3.7 Ime dve dhammā bhāvetabbā.
dn34:1.3.8 Katame dve dhammā pariññeyyā?
dn34:1.3.9 Nāmañca rūpañca.
dn34:1.3.10 Ime dve dhammā pariññeyyā.
dn34:1.3.11 Katame dve dhammā pahātabbā?
dn34:1.3.12 Avijjā ca bhavataṇhā ca.
dn34:1.3.13 Ime dve dhammā pahātabbā.
dn34:1.3.14 Katame dve dhammā hānabhāgiyā?
dn34:1.3.15 Dovacassatā ca pāpamittatā ca.
dn34:1.3.16 Ime dve dhammā hānabhāgiyā.
dn34:1.3.17 Katame dve dhammā visesabhāgiyā?
dn34:1.3.18 Sovacassatā ca kalyāṇamittatā ca.
dn34:1.3.19 Ime dve dhammā visesabhāgiyā.
dn34:1.3.20 Katame dve dhammā duppaṭivijjhā?
dn34:1.3.21 Yo ca hetu yo ca paccayo sattānaṁ saṅkilesāya, yo ca hetu yo ca paccayo sattānaṁ visuddhiyā.
dn34:1.3.22 Ime dve dhammā duppaṭivijjhā.
dn34:1.3.23 Katame dve dhammā uppādetabbā?
dn34:1.3.24 Dve ñāṇāni—
dn34:1.3.25 khaye ñāṇaṁ, anuppāde ñāṇaṁ.
dn34:1.3.26 Ime dve dhammā uppādetabbā.
dn34:1.3.27 Katame dve dhammā abhiññeyyā?
dn34:1.3.28 Dve dhātuyo—
dn34:1.3.29 saṅkhatā ca dhātu asaṅkhatā ca dhātu.
dn34:1.3.30 Ime dve dhammā abhiññeyyā.
dn34:1.3.31 Katame dve dhammā sacchikātabbā?
dn34:1.3.32 Vijjā ca vimutti ca.
dn34:1.3.33 Ime dve dhammā sacchikātabbā.
dn34:1.3.34 Iti ime vīsati dhammā bhūtā tacchā tathā avitathā anaññathā sammā tathāgatena abhisambuddhā.
dn34:1.4.0 3. Tayo dhammā
dn34:1.4.1 Tayo dhammā bahukārā, tayo dhammā bhāvetabbā …pe… tayo dhammā sacchikātabbā.
dn34:1.4.2 Katame tayo dhammā bahukārā?
dn34:1.4.3 Sappurisasaṁsevo, saddhammassavanaṁ, dhammānudhammappaṭipatti.
dn34:1.4.4 Ime tayo dhammā bahukārā.
dn34:1.4.5 Katame tayo dhammā bhāvetabbā?
dn34:1.4.6 Tayo samādhī—
dn34:1.4.7 savitakko savicāro samādhi, avitakko vicāramatto samādhi, avitakko avicāro samādhi.
dn34:1.4.8 Ime tayo dhammā bhāvetabbā.
dn34:1.4.9 Katame tayo dhammā pariññeyyā?
dn34:1.4.10 Tisso vedanā—
dn34:1.4.11 sukhā vedanā, dukkhā vedanā, adukkhamasukhā vedanā.
dn34:1.4.12 Ime tayo dhammā pariññeyyā.
dn34:1.4.13 Katame tayo dhammā pahātabbā?
dn34:1.4.14 Tisso taṇhā—
dn34:1.4.15 kāmataṇhā, bhavataṇhā, vibhavataṇhā.
dn34:1.4.16 Ime tayo dhammā pahātabbā.
dn34:1.4.17 Katame tayo dhammā hānabhāgiyā?
dn34:1.4.18 Tīṇi akusalamūlāni—
dn34:1.4.19 lobho akusalamūlaṁ, doso akusalamūlaṁ, moho akusalamūlaṁ.
dn34:1.4.20 Ime tayo dhammā hānabhāgiyā.
dn34:1.4.21 Katame tayo dhammā visesabhāgiyā?
dn34:1.4.22 Tīṇi kusalamūlāni—
dn34:1.4.23 alobho kusalamūlaṁ, adoso kusalamūlaṁ, amoho kusalamūlaṁ.
dn34:1.4.24 Ime tayo dhammā visesabhāgiyā.
dn34:1.4.25 Katame tayo dhammā duppaṭivijjhā?
dn34:1.4.26 Tisso nissaraṇiyā dhātuyo—
dn34:1.4.27 kāmānametaṁ nissaraṇaṁ yadidaṁ nekkhammaṁ, rūpānametaṁ nissaraṇaṁ yadidaṁ arūpaṁ, yaṁ kho pana kiñci bhūtaṁ saṅkhataṁ paṭiccasamuppannaṁ, nirodho tassa nissaraṇaṁ.
dn34:1.4.28 Ime tayo dhammā duppaṭivijjhā.
dn34:1.4.29 Katame tayo dhammā uppādetabbā?
dn34:1.4.30 Tīṇi ñāṇāni—
dn34:1.4.31 atītaṁse ñāṇaṁ, anāgataṁse ñāṇaṁ, paccuppannaṁse ñāṇaṁ.
dn34:1.4.32 Ime tayo dhammā uppādetabbā.
dn34:1.4.33 Katame tayo dhammā abhiññeyyā?
dn34:1.4.34 Tisso dhātuyo—
dn34:1.4.35 kāmadhātu, rūpadhātu, arūpadhātu.
dn34:1.4.36 Ime tayo dhammā abhiññeyyā.
dn34:1.4.37 Katame tayo dhammā sacchikātabbā?
dn34:1.4.38 Tisso vijjā—
dn34:1.4.39 pubbenivāsānussatiñāṇaṁ vijjā, sattānaṁ cutūpapāte ñāṇaṁ vijjā, āsavānaṁ khaye ñāṇaṁ vijjā.
dn34:1.4.40 Ime tayo dhammā sacchikātabbā.
dn34:1.4.41 Iti ime tiṁsa dhammā bhūtā tacchā tathā avitathā anaññathā sammā tathāgatena abhisambuddhā.
dn34:1.5.0 4. Cattāro dhammā
dn34:1.5.1 Cattāro dhammā bahukārā, cattāro dhammā bhāvetabbā …pe… cattāro dhammā sacchikātabbā.
dn34:1.5.2 Katame cattāro dhammā bahukārā?
dn34:1.5.3 Cattāri cakkāni—
dn34:1.5.4 patirūpadesavāso, sappurisūpanissayo, attasammāpaṇidhi, pubbe ca katapuññatā.
dn34:1.5.5 Ime cattāro dhammā bahukārā.
dn34:1.5.6 Katame cattāro dhammā bhāvetabbā?
dn34:1.5.7 Cattāro satipaṭṭhānā—
dn34:1.5.8 idhāvuso, bhikkhu kāye kāyānupassī viharati ātāpī sampajāno satimā vineyya loke abhijjhādomanassaṁ.
dn34:1.5.9 Vedanāsu …pe…
dn34:1.5.10 citte …
dn34:1.5.11 dhammesu dhammānupassī viharati ātāpī sampajāno satimā vineyya loke abhijjhādomanassaṁ.
dn34:1.5.12 Ime cattāro dhammā bhāvetabbā.
dn34:1.5.13 Katame cattāro dhammā pariññeyyā?
dn34:1.5.14 Cattāro āhārā—
dn34:1.5.15 kabaḷīkāro āhāro oḷāriko vā sukhumo vā, phasso dutiyo, manosañcetanā tatiyā, viññāṇaṁ catutthaṁ.
dn34:1.5.16 Ime cattāro dhammā pariññeyyā.
dn34:1.5.17 Katame cattāro dhammā pahātabbā?
dn34:1.5.18 Cattāro oghā—
dn34:1.5.19 kāmogho, bhavogho, diṭṭhogho, avijjogho.
dn34:1.5.20 Ime cattāro dhammā pahātabbā.
dn34:1.5.21 Katame cattāro dhammā hānabhāgiyā?
dn34:1.5.22 Cattāro yogā—
dn34:1.5.23 kāmayogo, bhavayogo, diṭṭhiyogo, avijjāyogo.
dn34:1.5.24 Ime cattāro dhammā hānabhāgiyā.
dn34:1.5.25 Katame cattāro dhammā visesabhāgiyā?
dn34:1.5.26 Cattāro visaṁyogā—
dn34:1.5.27 kāmayogavisaṁyogo, bhavayogavisaṁyogo, diṭṭhiyogavisaṁyogo, avijjāyogavisaṁyogo.
dn34:1.5.28 Ime cattāro dhammā visesabhāgiyā.
dn34:1.5.29 Katame cattāro dhammā duppaṭivijjhā?
dn34:1.5.30 Cattāro samādhī—
dn34:1.5.31 hānabhāgiyo samādhi, ṭhitibhāgiyo samādhi, visesabhāgiyo samādhi, nibbedhabhāgiyo samādhi.
dn34:1.5.32 Ime cattāro dhammā duppaṭivijjhā.
dn34:1.5.33 Katame cattāro dhammā uppādetabbā?
dn34:1.5.34 Cattāri ñāṇāni—
dn34:1.5.35 dhamme ñāṇaṁ, anvaye ñāṇaṁ, pariye ñāṇaṁ, sammutiyā ñāṇaṁ.
dn34:1.5.36 Ime cattāro dhammā uppādetabbā.
dn34:1.5.37 Katame cattāro dhammā abhiññeyyā?
dn34:1.5.38 Cattāri ariyasaccāni—
dn34:1.5.39 dukkhaṁ ariyasaccaṁ, dukkhasamudayaṁ ariyasaccaṁ, dukkhanirodhaṁ ariyasaccaṁ, dukkhanirodhagāminī paṭipadā ariyasaccaṁ.
dn34:1.5.40 Ime cattāro dhammā abhiññeyyā.
dn34:1.5.41 Katame cattāro dhammā sacchikātabbā?
dn34:1.5.42 Cattāri sāmaññaphalāni—
dn34:1.5.43 sotāpattiphalaṁ, sakadāgāmiphalaṁ, anāgāmiphalaṁ, arahattaphalaṁ.
dn34:1.5.44 Ime cattāro dhammā sacchikātabbā.
dn34:1.5.45 Iti ime cattārīsadhammā bhūtā tacchā tathā avitathā anaññathā sammā tathāgatena abhisambuddhā.
dn34:1.6.0 5. Pañca dhammā
dn34:1.6.1 Pañca dhammā bahukārā …pe… pañca dhammā sacchikātabbā.
dn34:1.6.2 Katame pañca dhammā bahukārā?
dn34:1.6.3 Pañca padhāniyaṅgāni—
dn34:1.6.4 idhāvuso, bhikkhu saddho hoti, saddahati tathāgatassa bodhiṁ:
dn34:1.6.5 ‘itipi so bhagavā arahaṁ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṁ buddho bhagavā’ti.
dn34:1.6.6 Appābādho hoti appātaṅko samavepākiniyā gahaṇiyā samannāgato nātisītāya nāccuṇhāya majjhimāya padhānakkhamāya.
dn34:1.6.7 Asaṭho hoti amāyāvī yathābhūtamattānaṁ āvīkattā satthari vā viññūsu vā sabrahmacārīsu.
dn34:1.6.8 Āraddhavīriyo viharati akusalānaṁ dhammānaṁ pahānāya, kusalānaṁ dhammānaṁ upasampadāya, thāmavā daḷhaparakkamo anikkhittadhuro kusalesu dhammesu.
dn34:1.6.9 Paññavā hoti udayatthagāminiyā paññāya samannāgato ariyāya nibbedhikāya sammā dukkhakkhayagāminiyā.
dn34:1.6.10 Ime pañca dhammā bahukārā.
dn34:1.6.11 Katame pañca dhammā bhāvetabbā?
dn34:1.6.12 Pañcaṅgiko sammāsamādhi—
dn34:1.6.13 pītipharaṇatā, sukhapharaṇatā, cetopharaṇatā, ālokapharaṇatā, paccavekkhaṇanimittaṁ.
dn34:1.6.14 Ime pañca dhammā bhāvetabbā.
dn34:1.6.15 Katame pañca dhammā pariññeyyā?
dn34:1.6.16 Pañcupādānakkhandhā—
dn34:1.6.17 rūpupādānakkhandho, vedanupādānakkhandho, saññupādānakkhandho, saṅkhārupādānakkhandho viññāṇupādānakkhandho.
dn34:1.6.18 Ime pañca dhammā pariññeyyā.
dn34:1.6.19 Katame pañca dhammā pahātabbā?
dn34:1.6.20 Pañca nīvaraṇāni—
dn34:1.6.21 kāmacchandanīvaraṇaṁ, byāpādanīvaraṇaṁ, thinamiddhanīvaraṇaṁ, uddhaccakukkuccanīvaraṇaṁ, vicikicchānīvaraṇaṁ.
dn34:1.6.22 Ime pañca dhammā pahātabbā.
dn34:1.6.23 Katame pañca dhammā hānabhāgiyā?
dn34:1.6.24 Pañca cetokhilā—
dn34:1.6.25 idhāvuso, bhikkhu satthari kaṅkhati vicikicchati nādhimuccati na sampasīdati.
dn34:1.6.26 Yo so, āvuso, bhikkhu satthari kaṅkhati vicikicchati nādhimuccati na sampasīdati, tassa cittaṁ na namati ātappāya anuyogāya sātaccāya padhānāya.
dn34:1.6.27 Yassa cittaṁ na namati ātappāya anuyogāya sātaccāya padhānāya.
dn34:1.6.28 Ayaṁ paṭhamo cetokhilo.
dn34:1.6.29 Puna caparaṁ, āvuso, bhikkhu dhamme kaṅkhati vicikicchati …pe…
dn34:1.6.30 saṅghe kaṅkhati vicikicchati …pe…
dn34:1.6.31 sikkhāya kaṅkhati vicikicchati …pe…
dn34:1.6.32 sabrahmacārīsu kupito hoti anattamano āhatacitto khilajāto, yo so, āvuso, bhikkhu sabrahmacārīsu kupito hoti anattamano āhatacitto khilajāto, tassa cittaṁ na namati ātappāya anuyogāya sātaccāya padhānāya.
dn34:1.6.33 Yassa cittaṁ na namati ātappāya anuyogāya sātaccāya padhānāya.
dn34:1.6.34 Ayaṁ pañcamo cetokhilo.
dn34:1.6.35 Ime pañca dhammā hānabhāgiyā.
dn34:1.6.36 Katame pañca dhammā visesabhāgiyā?
dn34:1.6.37 Pañcindriyāni—
dn34:1.6.38 saddhindriyaṁ, vīriyindriyaṁ, satindriyaṁ, samādhindriyaṁ, paññindriyaṁ.
dn34:1.6.39 Ime pañca dhammā visesabhāgiyā.
dn34:1.6.40 Katame pañca dhammā duppaṭivijjhā?
dn34:1.6.41 Pañca nissaraṇiyā dhātuyo—
dn34:1.6.42 idhāvuso, bhikkhuno kāme manasikaroto kāmesu cittaṁ na pakkhandati na pasīdati na santiṭṭhati na vimuccati.
dn34:1.6.43 Nekkhammaṁ kho panassa manasikaroto nekkhamme cittaṁ pakkhandati pasīdati santiṭṭhati vimuccati.
dn34:1.6.44 Tassa taṁ cittaṁ sugataṁ subhāvitaṁ suvuṭṭhitaṁ suvimuttaṁ visaṁyuttaṁ kāmehi.
dn34:1.6.45 Ye ca kāmapaccayā uppajjanti āsavā vighātā pariḷāhā, mutto so tehi. Na so taṁ vedanaṁ vedeti.
dn34:1.6.46 Idamakkhātaṁ kāmānaṁ nissaraṇaṁ.
dn34:1.6.47 Puna caparaṁ, āvuso, bhikkhuno byāpādaṁ manasikaroto byāpāde cittaṁ na pakkhandati na pasīdati na santiṭṭhati na vimuccati.
dn34:1.6.48 Abyāpādaṁ kho panassa manasikaroto abyāpāde cittaṁ pakkhandati pasīdati santiṭṭhati vimuccati.
dn34:1.6.49 Tassa taṁ cittaṁ sugataṁ subhāvitaṁ suvuṭṭhitaṁ suvimuttaṁ visaṁyuttaṁ byāpādena.
dn34:1.6.50 Ye ca byāpādapaccayā uppajjanti āsavā vighātā pariḷāhā, mutto so tehi. Na so taṁ vedanaṁ vedeti.
dn34:1.6.51 Idamakkhātaṁ byāpādassa nissaraṇaṁ.
dn34:1.6.52 Puna caparaṁ, āvuso, bhikkhuno vihesaṁ manasikaroto vihesāya cittaṁ na pakkhandati na pasīdati na santiṭṭhati na vimuccati.
dn34:1.6.53 Avihesaṁ kho panassa manasikaroto avihesāya cittaṁ pakkhandati pasīdati santiṭṭhati vimuccati.
dn34:1.6.54 Tassa taṁ cittaṁ sugataṁ subhāvitaṁ suvuṭṭhitaṁ suvimuttaṁ visaṁyuttaṁ vihesāya.
dn34:1.6.55 Ye ca vihesāpaccayā uppajjanti āsavā vighātā pariḷāhā, mutto so tehi. Na so taṁ vedanaṁ vedeti.
dn34:1.6.56 Idamakkhātaṁ vihesāya nissaraṇaṁ.
dn34:1.6.57 Puna caparaṁ, āvuso, bhikkhuno rūpe manasikaroto rūpesu cittaṁ na pakkhandati na pasīdati na santiṭṭhati na vimuccati.
dn34:1.6.58 Arūpaṁ kho panassa manasikaroto arūpe cittaṁ pakkhandati pasīdati santiṭṭhati vimuccati.
dn34:1.6.59 Tassa taṁ cittaṁ sugataṁ subhāvitaṁ suvuṭṭhitaṁ suvimuttaṁ visaṁyuttaṁ rūpehi.
dn34:1.6.60 Ye ca rūpapaccayā uppajjanti āsavā vighātā pariḷāhā, mutto so tehi. Na so taṁ vedanaṁ vedeti.
dn34:1.6.61 Idamakkhātaṁ rūpānaṁ nissaraṇaṁ.
dn34:1.6.62 Puna caparaṁ, āvuso, bhikkhuno sakkāyaṁ manasikaroto sakkāye cittaṁ na pakkhandati na pasīdati na santiṭṭhati na vimuccati.
dn34:1.6.63 Sakkāyanirodhaṁ kho panassa manasikaroto sakkāyanirodhe cittaṁ pakkhandati pasīdati santiṭṭhati vimuccati.
dn34:1.6.64 Tassa taṁ cittaṁ sugataṁ subhāvitaṁ suvuṭṭhitaṁ suvimuttaṁ visaṁyuttaṁ sakkāyena.
dn34:1.6.65 Ye ca sakkāyapaccayā uppajjanti āsavā vighātā pariḷāhā, mutto so tehi. Na so taṁ vedanaṁ vedeti.
dn34:1.6.66 Idamakkhātaṁ sakkāyassa nissaraṇaṁ.
dn34:1.6.67 Ime pañca dhammā duppaṭivijjhā.
dn34:1.6.68 Katame pañca dhammā uppādetabbā?
dn34:1.6.69 Pañca ñāṇiko sammāsamādhi:
dn34:1.6.70 ‘ayaṁ samādhi paccuppannasukho ceva āyatiñca sukhavipāko’ti paccattaṁyeva ñāṇaṁ uppajjati.
dn34:1.6.71 ‘Ayaṁ samādhi ariyo nirāmiso’ti paccattaññeva ñāṇaṁ uppajjati.
dn34:1.6.72 ‘Ayaṁ samādhi akāpurisasevito’ti paccattaṁyeva ñāṇaṁ uppajjati.
dn34:1.6.73 ‘Ayaṁ samādhi santo paṇīto paṭippassaddhaladdho ekodibhāvādhigato, na sasaṅkhāraniggayhavāritagato’ti paccattaṁyeva ñāṇaṁ uppajjati.
dn34:1.6.74 ‘So kho panāhaṁ imaṁ samādhiṁ satova samāpajjāmi sato vuṭṭhahāmī’ti paccattaṁyeva ñāṇaṁ uppajjati.
dn34:1.6.75 Ime pañca dhammā uppādetabbā.
dn34:1.6.76 Katame pañca dhammā abhiññeyyā?
dn34:1.6.77 Pañca vimuttāyatanāni—
dn34:1.6.78 idhāvuso, bhikkhuno satthā dhammaṁ deseti aññataro vā garuṭṭhāniyo sabrahmacārī.
dn34:1.6.79 Yathā yathā, āvuso, bhikkhuno satthā dhammaṁ deseti, aññataro vā garuṭṭhāniyo sabrahmacārī tathā tathā so tasmiṁ dhamme atthappaṭisaṁvedī ca hoti dhammapaṭisaṁvedī ca.
dn34:1.6.80 Tassa atthappaṭisaṁvedino dhammapaṭisaṁvedino pāmojjaṁ jāyati, pamuditassa pīti jāyati, pītimanassa kāyo passambhati, passaddhakāyo sukhaṁ vedeti, sukhino cittaṁ samādhiyati.
dn34:1.6.81 Idaṁ paṭhamaṁ vimuttāyatanaṁ.
dn34:1.6.82 Puna caparaṁ, āvuso, bhikkhuno na heva kho satthā dhammaṁ deseti, aññataro vā garuṭṭhāniyo sabrahmacārī, api ca kho yathāsutaṁ yathāpariyattaṁ dhammaṁ vitthārena paresaṁ deseti
dn34:1.6.83 yathā yathā, āvuso, bhikkhu yathāsutaṁ yathāpariyattaṁ dhammaṁ vitthārena paresaṁ deseti tathā tathā so tasmiṁ dhamme atthappaṭisaṁvedī ca hoti dhammapaṭisaṁvedī ca.
dn34:1.6.84 Tassa atthappaṭisaṁvedino dhammapaṭisaṁvedino pāmojjaṁ jāyati, pamuditassa pīti jāyati, pītimanassa kāyo passambhati, passaddhakāyo sukhaṁ vedeti, sukhino cittaṁ samādhiyati.
dn34:1.6.85 Idaṁ dutiyaṁ vimuttāyatanaṁ.
dn34:1.6.86 Puna caparaṁ, āvuso, bhikkhuno na heva kho satthā dhammaṁ deseti, aññataro vā garuṭṭhāniyo sabrahmacārī, nāpi yathāsutaṁ yathāpariyattaṁ dhammaṁ vitthārena paresaṁ deseti. Api ca kho yathāsutaṁ yathāpariyattaṁ dhammaṁ vitthārena sajjhāyaṁ karoti.
dn34:1.6.87 Yathā yathā, āvuso, bhikkhu yathāsutaṁ yathāpariyattaṁ dhammaṁ vitthārena sajjhāyaṁ karoti tathā tathā so tasmiṁ dhamme atthappaṭisaṁvedī ca hoti dhammapaṭisaṁvedī ca.
dn34:1.6.88 Tassa atthappaṭisaṁvedino dhammapaṭisaṁvedino pāmojjaṁ jāyati, pamuditassa pīti jāyati, pītimanassa kāyo passambhati, passaddhakāyo sukhaṁ vedeti, sukhino cittaṁ samādhiyati.
dn34:1.6.89 Idaṁ tatiyaṁ vimuttāyatanaṁ.
dn34:1.6.90 Puna caparaṁ, āvuso, bhikkhuno na heva kho satthā dhammaṁ deseti, aññataro vā garuṭṭhāniyo sabrahmacārī, nāpi yathāsutaṁ yathāpariyattaṁ dhammaṁ vitthārena paresaṁ deseti, nāpi yathāsutaṁ yathāpariyattaṁ dhammaṁ vitthārena sajjhāyaṁ karoti.
dn34:1.6.91 Api ca kho yathāsutaṁ yathāpariyattaṁ dhammaṁ cetasā anuvitakketi anuvicāreti manasānupekkhati.
dn34:1.6.92 Yathā yathā, āvuso, bhikkhu yathāsutaṁ yathāpariyattaṁ dhammaṁ cetasā anuvitakketi anuvicāreti manasānupekkhati tathā tathā so tasmiṁ dhamme atthappaṭisaṁvedī ca hoti dhammapaṭisaṁvedī ca.
dn34:1.6.93 Tassa atthappaṭisaṁvedino dhammapaṭisaṁvedino pāmojjaṁ jāyati, pamuditassa pīti jāyati, pītimanassa kāyo passambhati, passaddhakāyo sukhaṁ vedeti, sukhino cittaṁ samādhiyati.
dn34:1.6.94 Idaṁ catutthaṁ vimuttāyatanaṁ.
dn34:1.6.95 Puna caparaṁ, āvuso, bhikkhuno na heva kho satthā dhammaṁ deseti, aññataro vā garuṭṭhāniyo sabrahmacārī, nāpi yathāsutaṁ yathāpariyattaṁ dhammaṁ vitthārena paresaṁ deseti, nāpi yathāsutaṁ yathāpariyattaṁ dhammaṁ vitthārena sajjhāyaṁ karoti, nāpi yathāsutaṁ yathāpariyattaṁ dhammaṁ cetasā anuvitakketi anuvicāreti manasānupekkhati;
dn34:1.6.96 api ca khvassa aññataraṁ samādhinimittaṁ suggahitaṁ hoti sumanasikataṁ sūpadhāritaṁ suppaṭividdhaṁ paññāya.
dn34:1.6.97 Yathā yathā, āvuso, bhikkhuno aññataraṁ samādhinimittaṁ suggahitaṁ hoti sumanasikataṁ sūpadhāritaṁ suppaṭividdhaṁ paññāya tathā tathā so tasmiṁ dhamme atthappaṭisaṁvedī ca hoti dhammappaṭisaṁvedī ca.
dn34:1.6.98 Tassa atthappaṭisaṁvedino dhammappaṭisaṁvedino pāmojjaṁ jāyati, pamuditassa pīti jāyati, pītimanassa kāyo passambhati, passaddhakāyo sukhaṁ vedeti, sukhino cittaṁ samādhiyati.
dn34:1.6.99 Idaṁ pañcamaṁ vimuttāyatanaṁ.
dn34:1.6.100 Ime pañca dhammā abhiññeyyā.
dn34:1.6.101 Katame pañca dhammā sacchikātabbā?
dn34:1.6.102 Pañca dhammakkhandhā—
dn34:1.6.103 sīlakkhandho, samādhikkhandho, paññākkhandho, vimuttikkhandho, vimuttiñāṇadassanakkhandho.
dn34:1.6.104 Ime pañca dhammā sacchikātabbā.
dn34:1.6.105 Iti ime paññāsa dhammā bhūtā tacchā tathā avitathā anaññathā sammā tathāgatena abhisambuddhā.
dn34:1.7.0 6. Cha dhammā
dn34:1.7.1 Cha dhammā bahukārā …pe… cha dhammā sacchikātabbā.
dn34:1.7.2 Katame cha dhammā bahukārā?
dn34:1.7.3 Cha sāraṇīyā dhammā.
dn34:1.7.4 Idhāvuso, bhikkhuno mettaṁ kāyakammaṁ paccupaṭṭhitaṁ hoti sabrahmacārīsu āvi ceva raho ca,
dn34:1.7.5 ayampi dhammo sāraṇīyo piyakaraṇo garukaraṇo saṅgahāya avivādāya sāmaggiyā ekībhāvāya saṁvattati.
dn34:1.7.6 Puna caparaṁ, āvuso, bhikkhuno mettaṁ vacīkammaṁ …pe… ekībhāvāya saṁvattati.
dn34:1.7.7 Puna caparaṁ, āvuso, bhikkhuno mettaṁ manokammaṁ …pe… ekībhāvāya saṁvattati.
dn34:1.7.8 Puna caparaṁ, āvuso, bhikkhu ye te lābhā dhammikā dhammaladdhā antamaso pattapariyāpannamattampi, tathārūpehi lābhehi appaṭivibhattabhogī hoti sīlavantehi sabrahmacārīhi sādhāraṇabhogī, ayampi dhammo sāraṇīyo …pe… ekībhāvāya saṁvattati.
dn34:1.7.9 Puna caparaṁ, āvuso, bhikkhu, yāni tāni sīlāni akhaṇḍāni acchiddāni asabalāni akammāsāni bhujissāni viññuppasatthāni aparāmaṭṭhāni samādhisaṁvattanikāni, tathārūpesu sīlesu sīlasāmaññagato viharati sabrahmacārīhi āvi ceva raho ca, ayampi dhammo sāraṇīyo …pe… ekībhāvāya saṁvattati.
dn34:1.7.10 Puna caparaṁ, āvuso, bhikkhu yāyaṁ diṭṭhi ariyā niyyānikā niyyāti takkarassa sammā dukkhakkhayāya, tathārūpāya diṭṭhiyā diṭṭhi sāmaññagato viharati sabrahmacārīhi āvi ceva raho ca,
dn34:1.7.11 ayampi dhammo sāraṇīyo piyakaraṇo garukaraṇo, saṅgahāya avivādāya sāmaggiyā ekībhāvāya saṁvattati.
dn34:1.7.12 Ime cha dhammā bahukārā.
dn34:1.7.13 Katame cha dhammā bhāvetabbā?
dn34:1.7.14 Cha anussatiṭṭhānāni—
dn34:1.7.15 buddhānussati, dhammānussati, saṅghānussati, sīlānussati, cāgānussati, devatānussati.
dn34:1.7.16 Ime cha dhammā bhāvetabbā.
dn34:1.7.17 Katame cha dhammā pariññeyyā?
dn34:1.7.18 Cha ajjhattikāni āyatanāni—
dn34:1.7.19 cakkhāyatanaṁ, sotāyatanaṁ, ghānāyatanaṁ, jivhāyatanaṁ, kāyāyatanaṁ, manāyatanaṁ.
dn34:1.7.20 Ime cha dhammā pariññeyyā.
dn34:1.7.21 Katame cha dhammā pahātabbā?
dn34:1.7.22 Cha taṇhākāyā—
dn34:1.7.23 rūpataṇhā, saddataṇhā, gandhataṇhā, rasataṇhā, phoṭṭhabbataṇhā, dhammataṇhā.
dn34:1.7.24 Ime cha dhammā pahātabbā.
dn34:1.7.25 Katame cha dhammā hānabhāgiyā?
dn34:1.7.26 Cha agāravā—
dn34:1.7.27 idhāvuso, bhikkhu satthari agāravo viharati appatisso. Dhamme …pe… saṅghe … sikkhāya … appamāde … paṭisanthāre agāravo viharati appatisso.
dn34:1.7.28 Ime cha dhammā hānabhāgiyā.
dn34:1.7.29 Katame cha dhammā visesabhāgiyā?
dn34:1.7.30 Cha gāravā—
dn34:1.7.31 idhāvuso, bhikkhu satthari sagāravo viharati sappatisso. Dhamme …pe… saṅghe … sikkhāya … appamāde … paṭisanthāre sagāravo viharati sappatisso.
dn34:1.7.32 Ime cha dhammā visesabhāgiyā.
dn34:1.7.33 Katame cha dhammā duppaṭivijjhā?
dn34:1.7.34 Cha nissaraṇiyā dhātuyo—
dn34:1.7.35 idhāvuso, bhikkhu evaṁ vadeyya:
dn34:1.7.36 ‘mettā hi kho me, cetovimutti bhāvitā bahulīkatā yānīkatā vatthukatā anuṭṭhitā paricitā susamāraddhā,
dn34:1.7.37 atha ca pana me byāpādo cittaṁ pariyādāya tiṭṭhatī’ti.
dn34:1.7.38 So ‘mā hevan’tissa vacanīyo ‘māyasmā evaṁ avaca, mā bhagavantaṁ abbhācikkhi. Na hi sādhu bhagavato abbhakkhānaṁ, na hi bhagavā evaṁ vadeyya.
dn34:1.7.39 Aṭṭhānametaṁ āvuso anavakāso yaṁ mettāya cetovimuttiyā bhāvitāya bahulīkatāya yānīkatāya vatthukatāya anuṭṭhitāya paricitāya susamāraddhāya.
dn34:1.7.40 Atha ca panassa byāpādo cittaṁ pariyādāya ṭhassatīti, netaṁ ṭhānaṁ vijjati.
dn34:1.7.41 Nissaraṇaṁ hetaṁ, āvuso, byāpādassa, yadidaṁ mettācetovimuttī’ti.
dn34:1.7.42 Idha panāvuso, bhikkhu evaṁ vadeyya:
dn34:1.7.43 ‘karuṇā hi kho me cetovimutti bhāvitā bahulīkatā yānīkatā vatthukatā anuṭṭhitā paricitā susamāraddhā.
dn34:1.7.44 Atha ca pana me vihesā cittaṁ pariyādāya tiṭṭhatī’ti.
dn34:1.7.45 So: ‘mā hevan’tissa vacanīyo, ‘māyasmā evaṁ avaca, mā bhagavantaṁ abbhācikkhi …pe…
dn34:1.7.46 nissaraṇaṁ hetaṁ, āvuso, vihesāya, yadidaṁ karuṇācetovimuttī’ti.
dn34:1.7.47 Idha panāvuso, bhikkhu evaṁ vadeyya:
dn34:1.7.48 ‘muditā hi kho me cetovimutti bhāvitā …pe…
dn34:1.7.49 atha ca pana me arati cittaṁ pariyādāya tiṭṭhatī’ti.
dn34:1.7.50 So: ‘mā hevan’tissa vacanīyo ‘māyasmā evaṁ avaca …pe…
dn34:1.7.51 nissaraṇaṁ hetaṁ, āvuso, aratiyā, yadidaṁ muditācetovimuttī’ti.
dn34:1.7.52 Idha panāvuso, bhikkhu evaṁ vadeyya:
dn34:1.7.53 ‘upekkhā hi kho me cetovimutti bhāvitā …pe…
dn34:1.7.54 atha ca pana me rāgo cittaṁ pariyādāya tiṭṭhatī’ti.
dn34:1.7.55 So: ‘mā hevan’tissa vacanīyo ‘māyasmā evaṁ avaca …pe…
dn34:1.7.56 nissaraṇaṁ hetaṁ, āvuso, rāgassa yadidaṁ upekkhācetovimuttī’ti.
dn34:1.7.57 Idha panāvuso, bhikkhu evaṁ vadeyya:
dn34:1.7.58 ‘animittā hi kho me cetovimutti bhāvitā …pe…
dn34:1.7.59 atha ca pana me nimittānusāri viññāṇaṁ hotī’ti.
dn34:1.7.60 So: ‘mā hevan’tissa vacanīyo ‘māyasmā evaṁ avaca …pe…
dn34:1.7.61 nissaraṇaṁ hetaṁ, āvuso, sabbanimittānaṁ yadidaṁ animittā cetovimuttī’ti.
dn34:1.7.62 Idha panāvuso, bhikkhu evaṁ vadeyya:
dn34:1.7.63 ‘asmīti kho me vigataṁ, ayamahamasmīti na samanupassāmi,
dn34:1.7.64 atha ca pana me vicikicchākathaṅkathāsallaṁ cittaṁ pariyādāya tiṭṭhatī’ti.
dn34:1.7.65 So: ‘mā hevan’tissa vacanīyo ‘māyasmā evaṁ avaca, mā bhagavantaṁ abbhācikkhi, na hi sādhu bhagavato abbhakkhānaṁ, na hi bhagavā evaṁ vadeyya.
dn34:1.7.66 Aṭṭhānametaṁ, āvuso, anavakāso yaṁ asmīti vigate ayamahamasmīti asamanupassato.
dn34:1.7.67 Atha ca panassa vicikicchākathaṅkathāsallaṁ cittaṁ pariyādāya ṭhassati, netaṁ ṭhānaṁ vijjati.
dn34:1.7.68 Nissaraṇaṁ hetaṁ, āvuso, vicikicchākathaṅkathāsallassa, yadidaṁ asmimānasamugghāto’ti.
dn34:1.7.69 Ime cha dhammā duppaṭivijjhā.
dn34:1.7.70 Katame cha dhammā uppādetabbā?
dn34:1.7.71 Cha satatavihārā.
dn34:1.7.72 Idhāvuso, bhikkhu cakkhunā rūpaṁ disvā neva sumano hoti na dummano, upekkhako viharati sato sampajāno.
dn34:1.7.73 Sotena saddaṁ sutvā …pe…
dn34:1.7.74 ghānena gandhaṁ ghāyitvā …
dn34:1.7.75 jivhāya rasaṁ sāyitvā …
dn34:1.7.76 kāyena phoṭṭhabbaṁ phusitvā …
dn34:1.7.77 manasā dhammaṁ viññāya neva sumano hoti na dummano, upekkhako viharati sato sampajāno.
dn34:1.7.78 Ime cha dhammā uppādetabbā.
dn34:1.7.79 Katame cha dhammā abhiññeyyā?
dn34:1.7.80 Cha anuttariyāni—
dn34:1.7.81 dassanānuttariyaṁ, savanānuttariyaṁ, lābhānuttariyaṁ, sikkhānuttariyaṁ, pāricariyānuttariyaṁ, anussatānuttariyaṁ.
dn34:1.7.82 Ime cha dhammā abhiññeyyā.
dn34:1.7.83 Katame cha dhammā sacchikātabbā?
dn34:1.7.84 Cha abhiññā—
dn34:1.7.85 idhāvuso, bhikkhu anekavihitaṁ iddhividhaṁ paccanubhoti—ekopi hutvā bahudhā hoti, bahudhāpi hutvā eko hoti; āvibhāvaṁ tirobhāvaṁ; tirokuṭṭaṁ tiropākāraṁ tiropabbataṁ asajjamāno gacchati seyyathāpi ākāse; pathaviyāpi ummujjanimujjaṁ karoti seyyathāpi udake; udakepi abhijjamāne gacchati seyyathāpi pathaviyaṁ; ākāsepi pallaṅkena kamati seyyathāpi pakkhī sakuṇo; imepi candimasūriye evaṁmahiddhike evaṁmahānubhāve pāṇinā parāmasati parimajjati; yāva brahmalokāpi kāyena vasaṁ vatteti.
dn34:1.7.86 Dibbāya sotadhātuyā visuddhāya atikkantamānusikāya ubho sadde suṇāti dibbe ca mānuse ca, ye dūre santike ca.
dn34:1.7.87 Parasattānaṁ parapuggalānaṁ cetasā ceto paricca pajānāti,
dn34:1.7.88 sarāgaṁ vā cittaṁ sarāgaṁ cittanti pajānāti …pe…
dn34:1.7.89 avimuttaṁ vā cittaṁ avimuttaṁ cittanti pajānāti.
dn34:1.7.90 So anekavihitaṁ pubbenivāsaṁ anussarati, seyyathidaṁ—ekampi jātiṁ …pe… iti sākāraṁ sauddesaṁ anekavihitaṁ pubbenivāsaṁ anussarati.
dn34:1.7.91 Dibbena cakkhunā visuddhena atikkantamānusakena satte passati cavamāne upapajjamāne hīne paṇīte suvaṇṇe dubbaṇṇe sugate duggate yathākammūpage satte pajānāti …pe…
dn34:1.7.92 Āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati.
dn34:1.7.93 Ime cha dhammā sacchikātabbā.
dn34:1.7.94 Iti ime saṭṭhi dhammā bhūtā tacchā tathā avitathā anaññathā sammā tathāgatena abhisambuddhā.
dn34:1.8.0 7. Satta dhammā
dn34:1.8.1 Satta dhammā bahukārā …pe… satta dhammā sacchikātabbā.
dn34:1.8.2 Katame satta dhammā bahukārā?
dn34:1.8.3 Satta ariyadhanāni—
dn34:1.8.4 saddhādhanaṁ, sīladhanaṁ, hiridhanaṁ, ottappadhanaṁ, sutadhanaṁ, cāgadhanaṁ, paññādhanaṁ.
dn34:1.8.5 Ime satta dhammā bahukārā.
dn34:1.8.6 Katame satta dhammā bhāvetabbā?
dn34:1.8.7 Satta sambojjhaṅgā—
dn34:1.8.8 satisambojjhaṅgo, dhammavicayasambojjhaṅgo, vīriyasambojjhaṅgo, pītisambojjhaṅgo, passaddhisambojjhaṅgo, samādhisambojjhaṅgo, upekkhāsambojjhaṅgo.
dn34:1.8.9 Ime satta dhammā bhāvetabbā.
dn34:1.8.10 Katame satta dhammā pariññeyyā?
dn34:1.8.11 Satta viññāṇaṭṭhitiyo—
dn34:1.8.12 santāvuso, sattā nānattakāyā nānattasaññino, seyyathāpi manussā ekacce ca devā ekacce ca vinipātikā.
dn34:1.8.13 Ayaṁ paṭhamā viññāṇaṭṭhiti.
dn34:1.8.14 Santāvuso, sattā nānattakāyā ekattasaññino, seyyathāpi devā brahmakāyikā paṭhamābhinibbattā.
dn34:1.8.15 Ayaṁ dutiyā viññāṇaṭṭhiti.
dn34:1.8.16 Santāvuso, sattā ekattakāyā nānattasaññino, seyyathāpi devā ābhassarā.
dn34:1.8.17 Ayaṁ tatiyā viññāṇaṭṭhiti.
dn34:1.8.18 Santāvuso, sattā ekattakāyā ekattasaññino, seyyathāpi devā subhakiṇhā.
dn34:1.8.19 Ayaṁ catutthī viññāṇaṭṭhiti.
dn34:1.8.20 Santāvuso, sattā sabbaso rūpasaññānaṁ samatikkamā …pe… ‘ananto ākāso’ti ākāsānañcāyatanūpagā.
dn34:1.8.21 Ayaṁ pañcamī viññāṇaṭṭhiti.
dn34:1.8.22 Santāvuso, sattā sabbaso ākāsānañcāyatanaṁ samatikkamma ‘anantaṁ viññāṇan’ti viññāṇañcāyatanūpagā.
dn34:1.8.23 Ayaṁ chaṭṭhī viññāṇaṭṭhiti.
dn34:1.8.24 Santāvuso, sattā sabbaso viññāṇañcāyatanaṁ samatikkamma ‘natthi kiñcī’ti ākiñcaññāyatanūpagā.
dn34:1.8.25 Ayaṁ sattamī viññāṇaṭṭhiti.
dn34:1.8.26 Ime satta dhammā pariññeyyā.
dn34:1.8.27 Katame satta dhammā pahātabbā?
dn34:1.8.28 Sattānusayā—
dn34:1.8.29 kāmarāgānusayo, paṭighānusayo, diṭṭhānusayo, vicikicchānusayo, mānānusayo, bhavarāgānusayo, avijjānusayo.
dn34:1.8.30 Ime satta dhammā pahātabbā.
dn34:1.8.31 Katame satta dhammā hānabhāgiyā?
dn34:1.8.32 Satta asaddhammā—
dn34:1.8.33 idhāvuso, bhikkhu assaddho hoti, ahiriko hoti, anottappī hoti, appassuto hoti, kusīto hoti, muṭṭhassati hoti, duppañño hoti.
dn34:1.8.34 Ime satta dhammā hānabhāgiyā.
dn34:1.8.35 Katame satta dhammā visesabhāgiyā?
dn34:1.8.36 Satta saddhammā—
dn34:1.8.37 idhāvuso, bhikkhu saddho hoti, hirimā hoti, ottappī hoti, bahussuto hoti, āraddhavīriyo hoti, upaṭṭhitassati hoti, paññavā hoti.
dn34:1.8.38 Ime satta dhammā visesabhāgiyā.
dn34:1.8.39 Katame satta dhammā duppaṭivijjhā?
dn34:1.8.40 Satta sappurisadhammā—
dn34:1.8.41 idhāvuso, bhikkhu dhammaññū ca hoti atthaññū ca attaññū ca mattaññū ca kālaññū ca parisaññū ca puggalaññū ca.
dn34:1.8.42 Ime satta dhammā duppaṭivijjhā.
dn34:1.8.43 Katame satta dhammā uppādetabbā?
dn34:1.8.44 Satta saññā—
dn34:1.8.45 aniccasaññā, anattasaññā, asubhasaññā, ādīnavasaññā, pahānasaññā, virāgasaññā, nirodhasaññā.
dn34:1.8.46 Ime satta dhammā uppādetabbā.
dn34:1.8.47 Katame satta dhammā abhiññeyyā?
dn34:1.8.48 Satta niddasavatthūni—
dn34:1.8.49 idhāvuso, bhikkhu sikkhāsamādāne tibbacchando hoti, āyatiñca sikkhāsamādāne avigatapemo.
dn34:1.8.50 Dhammanisantiyā tibbacchando hoti, āyatiñca dhammanisantiyā avigatapemo.
dn34:1.8.51 Icchāvinaye tibbacchando hoti, āyatiñca icchāvinaye avigatapemo.
dn34:1.8.52 Paṭisallāne tibbacchando hoti, āyatiñca paṭisallāne avigatapemo.
dn34:1.8.53 Vīriyārambhe tibbacchando hoti, āyatiñca vīriyārambhe avigatapemo.
dn34:1.8.54 Satinepakke tibbacchando hoti, āyatiñca satinepakke avigatapemo.
dn34:1.8.55 Diṭṭhipaṭivedhe tibbacchando hoti, āyatiñca diṭṭhipaṭivedhe avigatapemo.
dn34:1.8.56 Ime satta dhammā abhiññeyyā.
dn34:1.8.57 Katame satta dhammā sacchikātabbā?
dn34:1.8.58 Satta khīṇāsavabalāni—
dn34:1.8.59 idhāvuso, khīṇāsavassa bhikkhuno aniccato sabbe saṅkhārā yathābhūtaṁ sammappaññāya sudiṭṭhā honti.
dn34:1.8.60 Yaṁpāvuso, khīṇāsavassa bhikkhuno aniccato sabbe saṅkhārā yathābhūtaṁ sammappaññāya sudiṭṭhā honti, idampi khīṇāsavassa bhikkhuno balaṁ hoti, yaṁ balaṁ āgamma khīṇāsavo bhikkhu āsavānaṁ khayaṁ paṭijānāti: ‘khīṇā me āsavā’ti.
dn34:1.8.61 Puna caparaṁ, āvuso, khīṇāsavassa bhikkhuno aṅgārakāsūpamā kāmā yathābhūtaṁ sammappaññāya sudiṭṭhā honti.
dn34:1.8.62 Yaṁpāvuso …pe… ‘khīṇā me āsavā’ti.
dn34:1.8.63 Puna caparaṁ, āvuso, khīṇāsavassa bhikkhuno vivekaninnaṁ cittaṁ hoti vivekapoṇaṁ vivekapabbhāraṁ vivekaṭṭhaṁ nekkhammābhirataṁ byantībhūtaṁ sabbaso āsavaṭṭhāniyehi dhammehi.
dn34:1.8.64 Yaṁpāvuso …pe… ‘khīṇā me āsavā’ti.
dn34:1.8.65 Puna caparaṁ, āvuso, khīṇāsavassa bhikkhuno cattāro satipaṭṭhānā bhāvitā honti subhāvitā.
dn34:1.8.66 Yaṁpāvuso …pe… ‘khīṇā me āsavā’ti.
dn34:1.8.67 Puna caparaṁ, āvuso, khīṇāsavassa bhikkhuno pañcindriyāni bhāvitāni honti subhāvitāni.
dn34:1.8.68 Yaṁpāvuso …pe… ‘khīṇā me āsavā’ti.
dn34:1.8.69 Puna caparaṁ, āvuso, khīṇāsavassa bhikkhuno satta bojjhaṅgā bhāvitā honti subhāvitā.
dn34:1.8.70 Yaṁpāvuso …pe… ‘khīṇā me āsavā’ti.
dn34:1.8.71 Puna caparaṁ, āvuso, khīṇāsavassa bhikkhuno ariyo aṭṭhaṅgiko maggo bhāvito hoti subhāvito.
dn34:1.8.72 Yaṁpāvuso, khīṇāsavassa bhikkhuno ariyo aṭṭhaṅgiko maggo bhāvito hoti subhāvito, idampi khīṇāsavassa bhikkhuno balaṁ hoti, yaṁ balaṁ āgamma khīṇāsavo bhikkhu āsavānaṁ khayaṁ paṭijānāti:
dn34:1.8.73 ‘khīṇā me āsavā’ti.
dn34:1.8.74 Ime satta dhammā sacchikātabbā.
dn34:1.8.75 Itime sattati dhammā bhūtā tacchā tathā avitathā anaññathā sammā tathāgatena abhisambuddhā.
dn34:1.8.76 Paṭhamabhāṇavāro niṭṭhito.