Saṅgītisutta

dn33:2.1.0 5. Pañcaka

dn33:2.1.1 Atthi kho, āvuso, tena bhagavatā jānatā passatā arahatā sammāsambuddhena pañca dhammā sammadakkhātā.

dn33:2.1.2 Tattha sabbeheva saṅgāyitabbaṁ …pe… atthāya hitāya sukhāya devamanussānaṁ.

dn33:2.1.3 Katame pañca?

dn33:2.1.4 Pañcakkhandhā.

dn33:2.1.5 Rūpakkhandho vedanākkhandho saññākkhandho saṅkhārakkhandho viññāṇakkhandho.

dn33:2.1.6 Pañcupādānakkhandhā.

dn33:2.1.7 Rūpupādānakkhandho vedanupādānakkhandho saññupādānakkhandho saṅkhārupādānakkhandho viññāṇupādānakkhandho.

dn33:2.1.8 Pañca kāmaguṇā.

dn33:2.1.9 Cakkhuviññeyyā rūpā iṭṭhā kantā manāpā piyarūpā kāmūpasañhitā rajanīyā,

dn33:2.1.10 sotaviññeyyā saddā …

dn33:2.1.11 ghānaviññeyyā gandhā …

dn33:2.1.12 jivhāviññeyyā rasā …

dn33:2.1.13 kāyaviññeyyā phoṭṭhabbā iṭṭhā kantā manāpā piyarūpā kāmūpasañhitā rajanīyā.

dn33:2.1.14 Pañca gatiyo—

dn33:2.1.15 nirayo, tiracchānayoni, pettivisayo, manussā, devā.

dn33:2.1.16 Pañca macchariyāni—

dn33:2.1.17 āvāsamacchariyaṁ, kulamacchariyaṁ, lābhamacchariyaṁ, vaṇṇamacchariyaṁ, dhammamacchariyaṁ.

dn33:2.1.18 Pañca nīvaraṇāni—

dn33:2.1.19 kāmacchandanīvaraṇaṁ, byāpādanīvaraṇaṁ, thinamiddhanīvaraṇaṁ, uddhaccakukkuccanīvaraṇaṁ, vicikicchānīvaraṇaṁ.

dn33:2.1.20 Pañca orambhāgiyāni saṁyojanāni—

dn33:2.1.21 sakkāyadiṭṭhi, vicikicchā, sīlabbataparāmāso, kāmacchando, byāpādo.

dn33:2.1.22 Pañca uddhambhāgiyāni saṁyojanāni—

dn33:2.1.23 rūparāgo, arūparāgo, māno, uddhaccaṁ, avijjā.

dn33:2.1.24 Pañca sikkhāpadāni—

dn33:2.1.25 pāṇātipātā veramaṇī, adinnādānā veramaṇī, kāmesumicchācārā veramaṇī, musāvādā veramaṇī, surāmerayamajjappamādaṭṭhānā veramaṇī.

dn33:2.1.26 Pañca abhabbaṭṭhānāni.

dn33:2.1.27 Abhabbo, āvuso, khīṇāsavo bhikkhu sañcicca pāṇaṁ jīvitā voropetuṁ. Abhabbo khīṇāsavo bhikkhu adinnaṁ theyyasaṅkhātaṁ ādiyituṁ. Abhabbo khīṇāsavo bhikkhu methunaṁ dhammaṁ paṭisevituṁ. Abhabbo khīṇāsavo bhikkhu sampajānamusā bhāsituṁ. Abhabbo khīṇāsavo bhikkhu sannidhikārakaṁ kāme paribhuñjituṁ, seyyathāpi pubbe āgārikabhūto.

dn33:2.1.28 Pañca byasanāni—

dn33:2.1.29 ñātibyasanaṁ, bhogabyasanaṁ, rogabyasanaṁ, sīlabyasanaṁ, diṭṭhibyasanaṁ.

dn33:2.1.30 Nāvuso, sattā ñātibyasanahetu vā bhogabyasanahetu vā rogabyasanahetu vā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjanti.

dn33:2.1.31 Sīlabyasanahetu vā, āvuso, sattā diṭṭhibyasanahetu vā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjanti.

dn33:2.1.32 Pañca sampadā—

dn33:2.1.33 ñātisampadā, bhogasampadā, ārogyasampadā, sīlasampadā, diṭṭhisampadā.

dn33:2.1.34 Nāvuso, sattā ñātisampadāhetu vā bhogasampadāhetu vā ārogyasampadāhetu vā kāyassa bhedā paraṁ maraṇā sugatiṁ saggaṁ lokaṁ upapajjanti.

dn33:2.1.35 Sīlasampadāhetu vā, āvuso, sattā diṭṭhisampadāhetu vā kāyassa bhedā paraṁ maraṇā sugatiṁ saggaṁ lokaṁ upapajjanti.

dn33:2.1.36 Pañca ādīnavā dussīlassa sīlavipattiyā.

dn33:2.1.37 Idhāvuso, dussīlo sīlavipanno pamādādhikaraṇaṁ mahatiṁ bhogajāniṁ nigacchati,

dn33:2.1.38 ayaṁ paṭhamo ādīnavo dussīlassa sīlavipattiyā.

dn33:2.1.39 Puna caparaṁ, āvuso, dussīlassa sīlavipannassa pāpako kittisaddo abbhuggacchati,

dn33:2.1.40 ayaṁ dutiyo ādīnavo dussīlassa sīlavipattiyā.

dn33:2.1.41 Puna caparaṁ, āvuso, dussīlo sīlavipanno yaññadeva parisaṁ upasaṅkamati yadi khattiyaparisaṁ yadi brāhmaṇaparisaṁ yadi gahapatiparisaṁ yadi samaṇaparisaṁ, avisārado upasaṅkamati maṅkubhūto,

dn33:2.1.42 ayaṁ tatiyo ādīnavo dussīlassa sīlavipattiyā.

dn33:2.1.43 Puna caparaṁ, āvuso, dussīlo sīlavipanno sammūḷho kālaṁ karoti,

dn33:2.1.44 ayaṁ catuttho ādīnavo dussīlassa sīlavipattiyā.

dn33:2.1.45 Puna caparaṁ, āvuso, dussīlo sīlavipanno kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjati,

dn33:2.1.46 ayaṁ pañcamo ādīnavo dussīlassa sīlavipattiyā.

dn33:2.1.47 Pañca ānisaṁsā sīlavato sīlasampadāya.

dn33:2.1.48 Idhāvuso, sīlavā sīlasampanno appamādādhikaraṇaṁ mahantaṁ bhogakkhandhaṁ adhigacchati,

dn33:2.1.49 ayaṁ paṭhamo ānisaṁso sīlavato sīlasampadāya.

dn33:2.1.50 Puna caparaṁ, āvuso, sīlavato sīlasampannassa kalyāṇo kittisaddo abbhuggacchati,

dn33:2.1.51 ayaṁ dutiyo ānisaṁso sīlavato sīlasampadāya.

dn33:2.1.52 Puna caparaṁ, āvuso, sīlavā sīlasampanno yaññadeva parisaṁ upasaṅkamati yadi khattiyaparisaṁ yadi brāhmaṇaparisaṁ yadi gahapatiparisaṁ yadi samaṇaparisaṁ, visārado upasaṅkamati amaṅkubhūto,

dn33:2.1.53 ayaṁ tatiyo ānisaṁso sīlavato sīlasampadāya.

dn33:2.1.54 Puna caparaṁ, āvuso, sīlavā sīlasampanno asammūḷho kālaṁ karoti,

dn33:2.1.55 ayaṁ catuttho ānisaṁso sīlavato sīlasampadāya.

dn33:2.1.56 Puna caparaṁ, āvuso, sīlavā sīlasampanno kāyassa bhedā paraṁ maraṇā sugatiṁ saggaṁ lokaṁ upapajjati,

dn33:2.1.57 ayaṁ pañcamo ānisaṁso sīlavato sīlasampadāya.

dn33:2.1.58 Codakena, āvuso, bhikkhunā paraṁ codetukāmena pañca dhamme ajjhattaṁ upaṭṭhapetvā paro codetabbo.

dn33:2.1.59 Kālena vakkhāmi no akālena,

dn33:2.1.60 bhūtena vakkhāmi no abhūtena,

dn33:2.1.61 saṇhena vakkhāmi no pharusena,

dn33:2.1.62 atthasaṁhitena vakkhāmi no anatthasaṁhitena,

dn33:2.1.63 mettacittena vakkhāmi no dosantarenāti.

dn33:2.1.64 Codakena, āvuso, bhikkhunā paraṁ codetukāmena ime pañca dhamme ajjhattaṁ upaṭṭhapetvā paro codetabbo.

dn33:2.1.65 Pañca padhāniyaṅgāni.

dn33:2.1.66 Idhāvuso, bhikkhu saddho hoti, saddahati tathāgatassa bodhiṁ:

dn33:2.1.67 ‘itipi so bhagavā arahaṁ sammāsambuddho vijjācaraṇasampanno sugato, lokavidū anuttaro purisadammasārathi satthā devamanussānaṁ buddho bhagavā’ti.

dn33:2.1.68 Appābādho hoti appātaṅko, samavepākiniyā gahaṇiyā samannāgato nātisītāya nāccuṇhāya majjhimāya padhānakkhamāya.

dn33:2.1.69 Asaṭho hoti amāyāvī, yathābhūtaṁ attānaṁ āvikattā satthari vā viññūsu vā sabrahmacārīsu.

dn33:2.1.70 Āraddhavīriyo viharati akusalānaṁ dhammānaṁ pahānāya kusalānaṁ dhammānaṁ upasampadāya thāmavā daḷhaparakkamo anikkhittadhuro kusalesu dhammesu.

dn33:2.1.71 Paññavā hoti udayatthagāminiyā paññāya samannāgato ariyāya nibbedhikāya sammādukkhakkhayagāminiyā.

dn33:2.1.72 Pañca suddhāvāsā—

dn33:2.1.73 avihā, atappā, sudassā, sudassī, akaniṭṭhā.

dn33:2.1.74 Pañca anāgāmino—

dn33:2.1.75 antarāparinibbāyī, upahaccaparinibbāyī, asaṅkhāraparinibbāyī, sasaṅkhāraparinibbāyī, uddhaṁsotoakaniṭṭhagāmī.

dn33:2.1.76 Pañca cetokhilā.

dn33:2.1.77 Idhāvuso, bhikkhu satthari kaṅkhati vicikicchati nādhimuccati na sampasīdati.

dn33:2.1.78 Yo so, āvuso, bhikkhu satthari kaṅkhati vicikicchati nādhimuccati na sampasīdati, tassa cittaṁ na namati ātappāya anuyogāya sātaccāya padhānāya, yassa cittaṁ na namati ātappāya anuyogāya sātaccāya padhānāya, ayaṁ paṭhamo cetokhilo.

dn33:2.1.79 Puna caparaṁ, āvuso, bhikkhu dhamme kaṅkhati vicikicchati …pe…

dn33:2.1.80 saṅghe kaṅkhati vicikicchati …

dn33:2.1.81 sikkhāya kaṅkhati vicikicchati …

dn33:2.1.82 sabrahmacārīsu kupito hoti anattamano āhatacitto khilajāto.

dn33:2.1.83 Yo so, āvuso, bhikkhu sabrahmacārīsu kupito hoti anattamano āhatacitto khilajāto, tassa cittaṁ na namati ātappāya anuyogāya sātaccāya padhānāya, yassa cittaṁ na namati ātappāya anuyogāya sātaccāya padhānāya, ayaṁ pañcamo cetokhilo.

dn33:2.1.84 Pañca cetasovinibandhā.

dn33:2.1.85 Idhāvuso, bhikkhu kāmesu avītarāgo hoti avigatacchando avigatapemo avigatapipāso avigatapariḷāho avigatataṇho.

dn33:2.1.86 Yo so, āvuso, bhikkhu kāmesu avītarāgo hoti avigatacchando avigatapemo avigatapipāso avigatapariḷāho avigatataṇho, tassa cittaṁ na namati ātappāya anuyogāya sātaccāya padhānāya.

dn33:2.1.87 Yassa cittaṁ na namati ātappāya anuyogāya sātaccāya padhānāya.

dn33:2.1.88 Ayaṁ paṭhamo cetaso vinibandho.

dn33:2.1.89 Puna caparaṁ, āvuso, bhikkhu kāye avītarāgo hoti …pe…

dn33:2.1.90 rūpe avītarāgo hoti …pe…

dn33:2.1.91 puna caparaṁ, āvuso, bhikkhu yāvadatthaṁ udarāvadehakaṁ bhuñjitvā seyyasukhaṁ passasukhaṁ middhasukhaṁ anuyutto viharati …pe…

dn33:2.1.92 puna caparaṁ, āvuso, bhikkhu aññataraṁ devanikāyaṁ paṇidhāya brahmacariyaṁ carati: ‘imināhaṁ sīlena vā vatena vā tapena vā brahmacariyena vā devo vā bhavissāmi devaññataro vā’ti.

dn33:2.1.93 Yo so, āvuso, bhikkhu aññataraṁ devanikāyaṁ paṇidhāya brahmacariyaṁ carati: ‘imināhaṁ sīlena vā vatena vā tapena vā brahmacariyena vā devo vā bhavissāmi devaññataro vā’ti, tassa cittaṁ na namati ātappāya anuyogāya sātaccāya padhānāya. Yassa cittaṁ na namati ātappāya anuyogāya sātaccāya padhānāya.

dn33:2.1.94 Ayaṁ pañcamo cetaso vinibandho.

dn33:2.1.95 Pañcindriyāni—

dn33:2.1.96 cakkhundriyaṁ, sotindriyaṁ, ghānindriyaṁ, jivhindriyaṁ, kāyindriyaṁ.

dn33:2.1.97 Aparānipi pañcindriyāni—

dn33:2.1.98 sukhindriyaṁ, dukkhindriyaṁ, somanassindriyaṁ, domanassindriyaṁ, upekkhindriyaṁ.

dn33:2.1.99 Aparānipi pañcindriyāni—

dn33:2.1.100 saddhindriyaṁ, vīriyindriyaṁ, satindriyaṁ, samādhindriyaṁ, paññindriyaṁ.

dn33:2.1.101 Pañca nissaraṇiyā dhātuyo.

dn33:2.1.102 Idhāvuso, bhikkhuno kāme manasikaroto kāmesu cittaṁ na pakkhandati na pasīdati na santiṭṭhati na vimuccati.

dn33:2.1.103 Nekkhammaṁ kho panassa manasikaroto nekkhamme cittaṁ pakkhandati pasīdati santiṭṭhati vimuccati.

dn33:2.1.104 Tassa taṁ cittaṁ sugataṁ subhāvitaṁ suvuṭṭhitaṁ suvimuttaṁ visaṁyuttaṁ kāmehi.

dn33:2.1.105 Ye ca kāmapaccayā uppajjanti āsavā vighātā pariḷāhā, mutto so tehi, na so taṁ vedanaṁ vedeti.

dn33:2.1.106 Idamakkhātaṁ kāmānaṁ nissaraṇaṁ.

dn33:2.1.107 Puna caparaṁ, āvuso, bhikkhuno byāpādaṁ manasikaroto byāpāde cittaṁ na pakkhandati na pasīdati na santiṭṭhati na vimuccati.

dn33:2.1.108 Abyāpādaṁ kho panassa manasikaroto abyāpāde cittaṁ pakkhandati pasīdati santiṭṭhati vimuccati.

dn33:2.1.109 Tassa taṁ cittaṁ sugataṁ subhāvitaṁ suvuṭṭhitaṁ suvimuttaṁ visaṁyuttaṁ byāpādena.

dn33:2.1.110 Ye ca byāpādapaccayā uppajjanti āsavā vighātā pariḷāhā, mutto so tehi, na so taṁ vedanaṁ vedeti.

dn33:2.1.111 Idamakkhātaṁ byāpādassa nissaraṇaṁ.

dn33:2.1.112 Puna caparaṁ, āvuso, bhikkhuno vihesaṁ manasikaroto vihesāya cittaṁ na pakkhandati na pasīdati na santiṭṭhati na vimuccati.

dn33:2.1.113 Avihesaṁ kho panassa manasikaroto avihesāya cittaṁ pakkhandati pasīdati santiṭṭhati vimuccati.

dn33:2.1.114 Tassa taṁ cittaṁ sugataṁ subhāvitaṁ suvuṭṭhitaṁ suvimuttaṁ visaṁyuttaṁ vihesāya.

dn33:2.1.115 Ye ca vihesāpaccayā uppajjanti āsavā vighātā pariḷāhā, mutto so tehi, na so taṁ vedanaṁ vedeti.

dn33:2.1.116 Idamakkhātaṁ vihesāya nissaraṇaṁ.

dn33:2.1.117 Puna caparaṁ, āvuso, bhikkhuno rūpe manasikaroto rūpesu cittaṁ na pakkhandati na pasīdati na santiṭṭhati na vimuccati.

dn33:2.1.118 Arūpaṁ kho panassa manasikaroto arūpe cittaṁ pakkhandati pasīdati santiṭṭhati vimuccati.

dn33:2.1.119 Tassa taṁ cittaṁ sugataṁ subhāvitaṁ suvuṭṭhitaṁ suvimuttaṁ visaṁyuttaṁ rūpehi.

dn33:2.1.120 Ye ca rūpapaccayā uppajjanti āsavā vighātā pariḷāhā, mutto so tehi, na so taṁ vedanaṁ vedeti.

dn33:2.1.121 Idamakkhātaṁ rūpānaṁ nissaraṇaṁ.

dn33:2.1.122 Puna caparaṁ, āvuso, bhikkhuno sakkāyaṁ manasikaroto sakkāye cittaṁ na pakkhandati na pasīdati na santiṭṭhati na vimuccati.

dn33:2.1.123 Sakkāyanirodhaṁ kho panassa manasikaroto sakkāyanirodhe cittaṁ pakkhandati pasīdati santiṭṭhati vimuccati.

dn33:2.1.124 Tassa taṁ cittaṁ sugataṁ subhāvitaṁ suvuṭṭhitaṁ suvimuttaṁ visaṁyuttaṁ sakkāyena.

dn33:2.1.125 Ye ca sakkāyapaccayā uppajjanti āsavā vighātā pariḷāhā, mutto so tehi, na so taṁ vedanaṁ vedeti.

dn33:2.1.126 Idamakkhātaṁ sakkāyassa nissaraṇaṁ.

dn33:2.1.127 Pañca vimuttāyatanāni.

dn33:2.1.128 Idhāvuso, bhikkhuno satthā dhammaṁ deseti aññataro vā garuṭṭhāniyo sabrahmacārī.

dn33:2.1.129 Yathā yathā, āvuso, bhikkhuno satthā dhammaṁ deseti aññataro vā garuṭṭhāniyo sabrahmacārī tathā tathā so tasmiṁ dhamme atthapaṭisaṁvedī ca hoti dhammapaṭisaṁvedī ca.

dn33:2.1.130 Tassa atthapaṭisaṁvedino dhammapaṭisaṁvedino pāmojjaṁ jāyati, pamuditassa pīti jāyati, pītimanassa kāyo passambhati, passaddhakāyo sukhaṁ vedeti, sukhino cittaṁ samādhiyati.

dn33:2.1.131 Idaṁ paṭhamaṁ vimuttāyatanaṁ.

dn33:2.1.132 Puna caparaṁ, āvuso, bhikkhuno na heva kho satthā dhammaṁ deseti aññataro vā garuṭṭhāniyo sabrahmacārī, api ca kho yathāsutaṁ yathāpariyattaṁ dhammaṁ vitthārena paresaṁ deseti …pe…

dn33:2.1.133 api ca kho yathāsutaṁ yathāpariyattaṁ dhammaṁ vitthārena sajjhāyaṁ karoti …pe…

dn33:2.1.134 api ca kho yathāsutaṁ yathāpariyattaṁ dhammaṁ cetasā anuvitakketi anuvicāreti manasānupekkhati …pe…

dn33:2.1.135 api ca khvassa aññataraṁ samādhinimittaṁ suggahitaṁ hoti sumanasikataṁ sūpadhāritaṁ suppaṭividdhaṁ paññāya.

dn33:2.1.136 Yathā yathā, āvuso, bhikkhuno aññataraṁ samādhinimittaṁ suggahitaṁ hoti sumanasikataṁ sūpadhāritaṁ suppaṭividdhaṁ paññāya tathā tathā so tasmiṁ dhamme atthapaṭisaṁvedī ca hoti dhammapaṭisaṁvedī ca.

dn33:2.1.137 Tassa atthapaṭisaṁvedino dhammapaṭisaṁvedino pāmojjaṁ jāyati, pamuditassa pīti jāyati, pītimanassa kāyo passambhati, passaddhakāyo sukhaṁ vedeti, sukhino cittaṁ samādhiyati.

dn33:2.1.138 Idaṁ pañcamaṁ vimuttāyatanaṁ.

dn33:2.1.139 Pañca vimuttiparipācanīyā saññā—

dn33:2.1.140 aniccasaññā, anicce dukkhasaññā, dukkhe anattasaññā, pahānasaññā, virāgasaññā.

dn33:2.1.141 Ime kho, āvuso, tena bhagavatā jānatā passatā arahatā sammāsambuddhena pañca dhammā sammadakkhātā;

dn33:2.1.142 tattha sabbeheva saṅgāyitabbaṁ …pe… atthāya hitāya sukhāya devamanussānaṁ.

dn33:2.2.0 6. Chakka

dn33:2.2.1 Atthi kho, āvuso, tena bhagavatā jānatā passatā arahatā sammāsambuddhena cha dhammā sammadakkhātā;

dn33:2.2.2 tattha sabbeheva saṅgāyitabbaṁ …pe… atthāya hitāya sukhāya devamanussānaṁ.

dn33:2.2.3 Katame cha?

dn33:2.2.4 Cha ajjhattikāni āyatanāni—

dn33:2.2.5 cakkhāyatanaṁ, sotāyatanaṁ, ghānāyatanaṁ, jivhāyatanaṁ, kāyāyatanaṁ, manāyatanaṁ.

dn33:2.2.6 Cha bāhirāni āyatanāni—

dn33:2.2.7 rūpāyatanaṁ, saddāyatanaṁ, gandhāyatanaṁ, rasāyatanaṁ, phoṭṭhabbāyatanaṁ, dhammāyatanaṁ.

dn33:2.2.8 Cha viññāṇakāyā—

dn33:2.2.9 cakkhuviññāṇaṁ, sotaviññāṇaṁ, ghānaviññāṇaṁ, jivhāviññāṇaṁ, kāyaviññāṇaṁ, manoviññāṇaṁ.

dn33:2.2.10 Cha phassakāyā—

dn33:2.2.11 cakkhusamphasso, sotasamphasso, ghānasamphasso, jivhāsamphasso, kāyasamphasso, manosamphasso.

dn33:2.2.12 Cha vedanākāyā—

dn33:2.2.13 cakkhusamphassajā vedanā, sotasamphassajā vedanā, ghānasamphassajā vedanā, jivhāsamphassajā vedanā, kāyasamphassajā vedanā, manosamphassajā vedanā.

dn33:2.2.14 Cha saññākāyā—

dn33:2.2.15 rūpasaññā, saddasaññā, gandhasaññā, rasasaññā, phoṭṭhabbasaññā, dhammasaññā.

dn33:2.2.16 Cha sañcetanākāyā—

dn33:2.2.17 rūpasañcetanā, saddasañcetanā, gandhasañcetanā, rasasañcetanā, phoṭṭhabbasañcetanā, dhammasañcetanā.

dn33:2.2.18 Cha taṇhākāyā—

dn33:2.2.19 rūpataṇhā, saddataṇhā, gandhataṇhā, rasataṇhā, phoṭṭhabbataṇhā, dhammataṇhā.

dn33:2.2.20 Cha agāravā.

dn33:2.2.21 Idhāvuso, bhikkhu satthari agāravo viharati appatisso; dhamme agāravo viharati appatisso; saṅghe agāravo viharati appatisso; sikkhāya agāravo viharati appatisso; appamāde agāravo viharati appatisso; paṭisanthāre agāravo viharati appatisso.

dn33:2.2.22 Cha gāravā.

dn33:2.2.23 Idhāvuso, bhikkhu satthari sagāravo viharati sappatisso; dhamme sagāravo viharati sappatisso; saṅghe sagāravo viharati sappatisso; sikkhāya sagāravo viharati sappatisso; appamāde sagāravo viharati sappatisso; paṭisanthāre sagāravo viharati sappatisso.

dn33:2.2.24 Cha somanassūpavicārā.

dn33:2.2.25 Cakkhunā rūpaṁ disvā somanassaṭṭhāniyaṁ rūpaṁ upavicarati;

dn33:2.2.26 sotena saddaṁ sutvā …

dn33:2.2.27 ghānena gandhaṁ ghāyitvā …

dn33:2.2.28 jivhāya rasaṁ sāyitvā …

dn33:2.2.29 kāyena phoṭṭhabbaṁ phusitvā.

dn33:2.2.30 Manasā dhammaṁ viññāya somanassaṭṭhāniyaṁ dhammaṁ upavicarati.

dn33:2.2.31 Cha domanassūpavicārā.

dn33:2.2.32 Cakkhunā rūpaṁ disvā domanassaṭṭhāniyaṁ rūpaṁ upavicarati …pe…

dn33:2.2.33 manasā dhammaṁ viññāya domanassaṭṭhāniyaṁ dhammaṁ upavicarati.

dn33:2.2.34 Cha upekkhūpavicārā.

dn33:2.2.35 Cakkhunā rūpaṁ disvā upekkhāṭṭhāniyaṁ rūpaṁ upavicarati …pe…

dn33:2.2.36 manasā dhammaṁ viññāya upekkhāṭṭhāniyaṁ dhammaṁ upavicarati.

dn33:2.2.37 Cha sāraṇīyā dhammā.

dn33:2.2.38 Idhāvuso, bhikkhuno mettaṁ kāyakammaṁ paccupaṭṭhitaṁ hoti sabrahmacārīsu āvi ceva raho ca.

dn33:2.2.39 Ayampi dhammo sāraṇīyo piyakaraṇo garukaraṇo saṅgahāya avivādāya sāmaggiyā ekībhāvāya saṁvattati.

dn33:2.2.40 Puna caparaṁ, āvuso, bhikkhuno mettaṁ vacīkammaṁ paccupaṭṭhitaṁ hoti sabrahmacārīsu āvi ceva raho ca.

dn33:2.2.41 Ayampi dhammo sāraṇīyo …pe… ekībhāvāya saṁvattati.

dn33:2.2.42 Puna caparaṁ, āvuso, bhikkhuno mettaṁ manokammaṁ paccupaṭṭhitaṁ hoti sabrahmacārīsu āvi ceva raho ca.

dn33:2.2.43 Ayampi dhammo sāraṇīyo …pe… ekībhāvāya saṁvattati.

dn33:2.2.44 Puna caparaṁ, āvuso, bhikkhu ye te lābhā dhammikā dhammaladdhā antamaso pattapariyāpannamattampi, tathārūpehi lābhehi appaṭivibhattabhogī hoti sīlavantehi sabrahmacārīhi sādhāraṇabhogī.

dn33:2.2.45 Ayampi dhammo sāraṇīyo …pe… ekībhāvāya saṁvattati.

dn33:2.2.46 Puna caparaṁ, āvuso, bhikkhu yāni tāni sīlāni akhaṇḍāni acchiddāni asabalāni akammāsāni bhujissāni viññuppasatthāni aparāmaṭṭhāni samādhisaṁvattanikāni, tathārūpesu sīlesu sīlasāmaññagato viharati sabrahmacārīhi āvi ceva raho ca.

dn33:2.2.47 Ayampi dhammo sāraṇīyo …pe… ekībhāvāya saṁvattati.

dn33:2.2.48 Puna caparaṁ, āvuso, bhikkhu yāyaṁ diṭṭhi ariyā niyyānikā niyyāti takkarassa sammā dukkhakkhayāya, tathārūpāya diṭṭhiyā diṭṭhisāmaññagato viharati sabrahmacārīhi āvi ceva raho ca.

dn33:2.2.49 Ayampi dhammo sāraṇīyo piyakaraṇo garukaraṇo saṅgahāya avivādāya sāmaggiyā ekībhāvāya saṁvattati.

dn33:2.2.50 Cha vivādamūlāni.

dn33:2.2.51 Idhāvuso, bhikkhu kodhano hoti upanāhī.

dn33:2.2.52 Yo so, āvuso, bhikkhu kodhano hoti upanāhī, so sattharipi agāravo viharati appatisso, dhammepi agāravo viharati appatisso, saṅghepi agāravo viharati appatisso, sikkhāyapi na paripūrakārī hoti.

dn33:2.2.53 Yo so, āvuso, bhikkhu satthari agāravo viharati appatisso, dhamme agāravo viharati appatisso, saṅghe agāravo viharati appatisso, sikkhāya na paripūrakārī, so saṅghe vivādaṁ janeti. Yo hoti vivādo bahujanāhitāya bahujanāsukhāya anatthāya ahitāya dukkhāya devamanussānaṁ.

dn33:2.2.54 Evarūpañce tumhe, āvuso, vivādamūlaṁ ajjhattaṁ vā bahiddhā vā samanupasseyyātha. Tatra tumhe, āvuso, tasseva pāpakassa vivādamūlassa pahānāya vāyameyyātha.

dn33:2.2.55 Evarūpañce tumhe, āvuso, vivādamūlaṁ ajjhattaṁ vā bahiddhā vā na samanupasseyyātha. Tatra tumhe, āvuso, tasseva pāpakassa vivādamūlassa āyatiṁ anavassavāya paṭipajjeyyātha.

dn33:2.2.56 Evametassa pāpakassa vivādamūlassa pahānaṁ hoti. Evametassa pāpakassa vivādamūlassa āyatiṁ anavassavo hoti.

dn33:2.2.57 Puna caparaṁ, āvuso, bhikkhu makkhī hoti paḷāsī …pe…

dn33:2.2.58 issukī hoti maccharī …pe…

dn33:2.2.59 saṭho hoti māyāvī …

dn33:2.2.60 pāpiccho hoti micchādiṭṭhī …

dn33:2.2.61 sandiṭṭhiparāmāsī hoti ādhānaggāhī duppaṭinissaggī …pe…

dn33:2.2.62 yo so, āvuso, bhikkhu sandiṭṭhiparāmāsī hoti ādhānaggāhī duppaṭinissaggī, so sattharipi agāravo viharati appatisso, dhammepi agāravo viharati appatisso, saṅghepi agāravo viharati appatisso, sikkhāyapi na paripūrakārī hoti.

dn33:2.2.63 Yo so, āvuso, bhikkhu satthari agāravo viharati appatisso, dhamme agāravo viharati appatisso, saṅghe agāravo viharati appatisso, sikkhāya na paripūrakārī, so saṅghe vivādaṁ janeti. Yo hoti vivādo bahujanāhitāya bahujanāsukhāya anatthāya ahitāya dukkhāya devamanussānaṁ.

dn33:2.2.64 Evarūpañce tumhe, āvuso, vivādamūlaṁ ajjhattaṁ vā bahiddhā vā samanupasseyyātha. Tatra tumhe, āvuso, tasseva pāpakassa vivādamūlassa pahānāya vāyameyyātha.

dn33:2.2.65 Evarūpañce tumhe, āvuso, vivādamūlaṁ ajjhattaṁ vā bahiddhā vā na samanupasseyyātha. Tatra tumhe, āvuso, tasseva pāpakassa vivādamūlassa āyatiṁ anavassavāya paṭipajjeyyātha.

dn33:2.2.66 Evametassa pāpakassa vivādamūlassa pahānaṁ hoti. Evametassa pāpakassa vivādamūlassa āyatiṁ anavassavo hoti.

dn33:2.2.67 Cha dhātuyo—

dn33:2.2.68 pathavīdhātu, āpodhātu, tejodhātu, vāyodhātu, ākāsadhātu, viññāṇadhātu.

dn33:2.2.69 Cha nissaraṇiyā dhātuyo.

dn33:2.2.70 Idhāvuso, bhikkhu evaṁ vadeyya:

dn33:2.2.71 ‘mettā hi kho me cetovimutti bhāvitā bahulīkatā yānīkatā vatthukatā anuṭṭhitā paricitā susamāraddhā,

dn33:2.2.72 atha ca pana me byāpādo cittaṁ pariyādāya tiṭṭhatī’ti.

dn33:2.2.73 So ‘mā hevan’tissa vacanīyo, ‘māyasmā evaṁ avaca, mā bhagavantaṁ abbhācikkhi, na hi sādhu bhagavato abbhakkhānaṁ, na hi bhagavā evaṁ vadeyya.

dn33:2.2.74 Aṭṭhānametaṁ, āvuso, anavakāso, yaṁ mettāya cetovimuttiyā bhāvitāya bahulīkatāya yānīkatāya vatthukatāya anuṭṭhitāya paricitāya susamāraddhāya.

dn33:2.2.75 Atha ca panassa byāpādo cittaṁ pariyādāya ṭhassati, netaṁ ṭhānaṁ vijjati.

dn33:2.2.76 Nissaraṇaṁ hetaṁ, āvuso, byāpādassa, yadidaṁ mettā cetovimuttī’ti.

dn33:2.2.77 Idha panāvuso, bhikkhu evaṁ vadeyya:

dn33:2.2.78 ‘karuṇā hi kho me cetovimutti bhāvitā bahulīkatā yānīkatā vatthukatā anuṭṭhitā paricitā susamāraddhā.

dn33:2.2.79 Atha ca pana me vihesā cittaṁ pariyādāya tiṭṭhatī’ti,

dn33:2.2.80 so ‘mā hevan’tissa vacanīyo ‘māyasmā evaṁ avaca, mā bhagavantaṁ abbhācikkhi, na hi sādhu bhagavato abbhakkhānaṁ, na hi bhagavā evaṁ vadeyya.

dn33:2.2.81 Aṭṭhānametaṁ, āvuso, anavakāso, yaṁ karuṇāya cetovimuttiyā bhāvitāya bahulīkatāya yānīkatāya vatthukatāya anuṭṭhitāya paricitāya susamāraddhāya,

dn33:2.2.82 atha ca panassa vihesā cittaṁ pariyādāya ṭhassati, netaṁ ṭhānaṁ vijjati.

dn33:2.2.83 Nissaraṇaṁ hetaṁ, āvuso, vihesāya, yadidaṁ karuṇā cetovimuttī’ti.

dn33:2.2.84 Idha panāvuso, bhikkhu evaṁ vadeyya:

dn33:2.2.85 ‘muditā hi kho me cetovimutti bhāvitā bahulīkatā yānīkatā vatthukatā anuṭṭhitā paricitā susamāraddhā.

dn33:2.2.86 Atha ca pana me arati cittaṁ pariyādāya tiṭṭhatī’ti,

dn33:2.2.87 so ‘mā hevan’tissa vacanīyo ‘māyasmā evaṁ avaca, mā bhagavantaṁ abbhācikkhi, na hi sādhu bhagavato abbhakkhānaṁ, na hi bhagavā evaṁ vadeyya.

dn33:2.2.88 Aṭṭhānametaṁ, āvuso, anavakāso, yaṁ muditāya cetovimuttiyā bhāvitāya bahulīkatāya yānīkatāya vatthukatāya anuṭṭhitāya paricitāya susamāraddhāya,

dn33:2.2.89 atha ca panassa arati cittaṁ pariyādāya ṭhassati, netaṁ ṭhānaṁ vijjati.

dn33:2.2.90 Nissaraṇaṁ hetaṁ, āvuso, aratiyā, yadidaṁ muditā cetovimuttī’ti.

dn33:2.2.91 Idha panāvuso, bhikkhu evaṁ vadeyya:

dn33:2.2.92 ‘upekkhā hi kho me cetovimutti bhāvitā bahulīkatā yānīkatā vatthukatā anuṭṭhitā paricitā susamāraddhā.

dn33:2.2.93 Atha ca pana me rāgo cittaṁ pariyādāya tiṭṭhatī’ti.

dn33:2.2.94 So ‘mā hevan’tissa vacanīyo ‘māyasmā evaṁ avaca, mā bhagavantaṁ abbhācikkhi, na hi sādhu bhagavato abbhakkhānaṁ, na hi bhagavā evaṁ vadeyya.

dn33:2.2.95 Aṭṭhānametaṁ, āvuso, anavakāso, yaṁ upekkhāya cetovimuttiyā bhāvitāya bahulīkatāya yānīkatāya vatthukatāya anuṭṭhitāya paricitāya susamāraddhāya,

dn33:2.2.96 atha ca panassa rāgo cittaṁ pariyādāya ṭhassati netaṁ ṭhānaṁ vijjati.

dn33:2.2.97 Nissaraṇaṁ hetaṁ, āvuso, rāgassa, yadidaṁ upekkhā cetovimuttī’ti.

dn33:2.2.98 Idha panāvuso, bhikkhu evaṁ vadeyya:

dn33:2.2.99 ‘animittā hi kho me cetovimutti bhāvitā bahulīkatā yānīkatā vatthukatā anuṭṭhitā paricitā susamāraddhā.

dn33:2.2.100 Atha ca pana me nimittānusāri viññāṇaṁ hotī’ti.

dn33:2.2.101 So ‘mā hevan’tissa vacanīyo ‘māyasmā evaṁ avaca, mā bhagavantaṁ abbhācikkhi, na hi sādhu bhagavato abbhakkhānaṁ, na hi bhagavā evaṁ vadeyya.

dn33:2.2.102 Aṭṭhānametaṁ, āvuso, anavakāso, yaṁ animittāya cetovimuttiyā bhāvitāya bahulīkatāya yānīkatāya vatthukatāya anuṭṭhitāya paricitāya susamāraddhāya,

dn33:2.2.103 atha ca panassa nimittānusāri viññāṇaṁ bhavissati, netaṁ ṭhānaṁ vijjati.

dn33:2.2.104 Nissaraṇaṁ hetaṁ, āvuso, sabbanimittānaṁ, yadidaṁ animittā cetovimuttī’ti.

dn33:2.2.105 Idha panāvuso, bhikkhu evaṁ vadeyya:

dn33:2.2.106 ‘asmīti kho me vigataṁ, ayamahamasmīti na samanupassāmi,

dn33:2.2.107 atha ca pana me vicikicchākathaṅkathāsallaṁ cittaṁ pariyādāya tiṭṭhatī’ti.

dn33:2.2.108 So ‘mā hevan’tissa vacanīyo ‘māyasmā evaṁ avaca, mā bhagavantaṁ abbhācikkhi, na hi sādhu bhagavato abbhakkhānaṁ, na hi bhagavā evaṁ vadeyya.

dn33:2.2.109 Aṭṭhānametaṁ, āvuso, anavakāso, yaṁ asmīti vigate ayamahamasmīti asamanupassato,

dn33:2.2.110 atha ca panassa vicikicchākathaṅkathāsallaṁ cittaṁ pariyādāya ṭhassati, netaṁ ṭhānaṁ vijjati.

dn33:2.2.111 Nissaraṇaṁ hetaṁ, āvuso, vicikicchākathaṅkathāsallassa, yadidaṁ asmimānasamugghāto’ti.

dn33:2.2.112 Cha anuttariyāni—

dn33:2.2.113 dassanānuttariyaṁ, savanānuttariyaṁ, lābhānuttariyaṁ, sikkhānuttariyaṁ, pāricariyānuttariyaṁ, anussatānuttariyaṁ.

dn33:2.2.114 Cha anussatiṭṭhānāni—

dn33:2.2.115 buddhānussati, dhammānussati, saṅghānussati, sīlānussati, cāgānussati, devatānussati.

dn33:2.2.116 Cha satatavihārā.

dn33:2.2.117 Idhāvuso, bhikkhu cakkhunā rūpaṁ disvā neva sumano hoti na dummano, upekkhako viharati sato sampajāno.

dn33:2.2.118 Sotena saddaṁ sutvā …pe…

dn33:2.2.119 manasā dhammaṁ viññāya neva sumano hoti na dummano, upekkhako viharati sato sampajāno.

dn33:2.2.120 Chaḷābhijātiyo.

dn33:2.2.121 Idhāvuso, ekacco kaṇhābhijātiko samāno kaṇhaṁ dhammaṁ abhijāyati.

dn33:2.2.122 Idha panāvuso, ekacco kaṇhābhijātiko samāno sukkaṁ dhammaṁ abhijāyati.

dn33:2.2.123 Idha panāvuso, ekacco kaṇhābhijātiko samāno akaṇhaṁ asukkaṁ nibbānaṁ abhijāyati.

dn33:2.2.124 Idha panāvuso, ekacco sukkābhijātiko samāno sukkaṁ dhammaṁ abhijāyati.

dn33:2.2.125 Idha panāvuso, ekacco sukkābhijātiko samāno kaṇhaṁ dhammaṁ abhijāyati.

dn33:2.2.126 Idha panāvuso, ekacco sukkābhijātiko samāno akaṇhaṁ asukkaṁ nibbānaṁ abhijāyati.

dn33:2.2.127 Cha nibbedhabhāgiyā saññā—

dn33:2.2.128 aniccasaññā, anicce dukkhasaññā, dukkhe anattasaññā, pahānasaññā, virāgasaññā, nirodhasaññā.

dn33:2.2.129 Ime kho, āvuso, tena bhagavatā jānatā passatā arahatā sammāsambuddhena cha dhammā sammadakkhātā;

dn33:2.2.130 tattha sabbeheva saṅgāyitabbaṁ …pe… atthāya hitāya sukhāya devamanussānaṁ.

dn33:2.3.0 7. Sattaka

dn33:2.3.1 Atthi kho, āvuso, tena bhagavatā jānatā passatā arahatā sammāsambuddhena satta dhammā sammadakkhātā;

dn33:2.3.2 tattha sabbeheva saṅgāyitabbaṁ …pe… atthāya hitāya sukhāya devamanussānaṁ.

dn33:2.3.3 Katame satta?

dn33:2.3.4 Satta ariyadhanāni—

dn33:2.3.5 saddhādhanaṁ, sīladhanaṁ, hiridhanaṁ, ottappadhanaṁ, sutadhanaṁ, cāgadhanaṁ, paññādhanaṁ.

dn33:2.3.6 Satta bojjhaṅgā—

dn33:2.3.7 satisambojjhaṅgo, dhammavicayasambojjhaṅgo, vīriyasambojjhaṅgo, pītisambojjhaṅgo, passaddhisambojjhaṅgo, samādhisambojjhaṅgo, upekkhāsambojjhaṅgo.

dn33:2.3.8 Satta samādhiparikkhārā—

dn33:2.3.9 sammādiṭṭhi, sammāsaṅkappo, sammāvācā, sammākammanto, sammāājīvo, sammāvāyāmo, sammāsati.

dn33:2.3.10 Satta asaddhammā—

dn33:2.3.11 idhāvuso, bhikkhu assaddho hoti, ahiriko hoti, anottappī hoti, appassuto hoti, kusīto hoti, muṭṭhassati hoti, duppañño hoti.

dn33:2.3.12 Satta saddhammā—

dn33:2.3.13 idhāvuso, bhikkhu saddho hoti, hirimā hoti, ottappī hoti, bahussuto hoti, āraddhavīriyo hoti, upaṭṭhitassati hoti, paññavā hoti.

dn33:2.3.14 Satta sappurisadhammā—

dn33:2.3.15 idhāvuso, bhikkhu dhammaññū ca hoti atthaññū ca attaññū ca mattaññū ca kālaññū ca parisaññū ca puggalaññū ca.

dn33:2.3.16 Satta niddasavatthūni.

dn33:2.3.17 Idhāvuso, bhikkhu sikkhāsamādāne tibbacchando hoti, āyatiñca sikkhāsamādāne avigatapemo.

dn33:2.3.18 Dhammanisantiyā tibbacchando hoti, āyatiñca dhammanisantiyā avigatapemo.

dn33:2.3.19 Icchāvinaye tibbacchando hoti, āyatiñca icchāvinaye avigatapemo.

dn33:2.3.20 Paṭisallāne tibbacchando hoti, āyatiñca paṭisallāne avigatapemo.

dn33:2.3.21 Vīriyārambhe tibbacchando hoti, āyatiñca vīriyārambhe avigatapemo.

dn33:2.3.22 Satinepakke tibbacchando hoti, āyatiñca satinepakke avigatapemo.

dn33:2.3.23 Diṭṭhipaṭivedhe tibbacchando hoti, āyatiñca diṭṭhipaṭivedhe avigatapemo.

dn33:2.3.24 Satta saññā—

dn33:2.3.25 aniccasaññā, anattasaññā, asubhasaññā, ādīnavasaññā, pahānasaññā, virāgasaññā, nirodhasaññā.

dn33:2.3.26 Satta balāni—

dn33:2.3.27 saddhābalaṁ, vīriyabalaṁ, hiribalaṁ, ottappabalaṁ, satibalaṁ, samādhibalaṁ, paññābalaṁ.

dn33:2.3.28 Satta viññāṇaṭṭhitiyo.

dn33:2.3.29 Santāvuso, sattā nānattakāyā nānattasaññino, seyyathāpi manussā ekacce ca devā ekacce ca vinipātikā.

dn33:2.3.30 Ayaṁ paṭhamā viññāṇaṭṭhiti.

dn33:2.3.31 Santāvuso, sattā nānattakāyā ekattasaññino seyyathāpi devā brahmakāyikā paṭhamābhinibbattā.

dn33:2.3.32 Ayaṁ dutiyā viññāṇaṭṭhiti.

dn33:2.3.33 Santāvuso, sattā ekattakāyā nānattasaññino seyyathāpi devā ābhassarā.

dn33:2.3.34 Ayaṁ tatiyā viññāṇaṭṭhiti.

dn33:2.3.35 Santāvuso, sattā ekattakāyā ekattasaññino seyyathāpi devā subhakiṇhā.

dn33:2.3.36 Ayaṁ catutthī viññāṇaṭṭhiti.

dn33:2.3.37 Santāvuso, sattā sabbaso rūpasaññānaṁ samatikkamā paṭighasaññānaṁ atthaṅgamā nānattasaññānaṁ amanasikārā ‘ananto ākāso’ti ākāsānañcāyatanūpagā.

dn33:2.3.38 Ayaṁ pañcamī viññāṇaṭṭhiti.

dn33:2.3.39 Santāvuso, sattā sabbaso ākāsānañcāyatanaṁ samatikkamma ‘anantaṁ viññāṇan’ti viññāṇañcāyatanūpagā.

dn33:2.3.40 Ayaṁ chaṭṭhī viññāṇaṭṭhiti.

dn33:2.3.41 Santāvuso, sattā sabbaso viññāṇañcāyatanaṁ samatikkamma ‘natthi kiñcī’ti ākiñcaññāyatanūpagā.

dn33:2.3.42 Ayaṁ sattamī viññāṇaṭṭhiti.

dn33:2.3.43 Satta puggalā dakkhiṇeyyā—

dn33:2.3.44 ubhatobhāgavimutto, paññāvimutto, kāyasakkhi, diṭṭhippatto, saddhāvimutto, dhammānusārī, saddhānusārī.

dn33:2.3.45 Satta anusayā—

dn33:2.3.46 kāmarāgānusayo, paṭighānusayo, diṭṭhānusayo, vicikicchānusayo, mānānusayo, bhavarāgānusayo, avijjānusayo.

dn33:2.3.47 Satta saṁyojanāni—

dn33:2.3.48 anunayasaṁyojanaṁ, paṭighasaṁyojanaṁ, diṭṭhisaṁyojanaṁ, vicikicchāsaṁyojanaṁ, mānasaṁyojanaṁ, bhavarāgasaṁyojanaṁ, avijjāsaṁyojanaṁ.

dn33:2.3.49 Satta adhikaraṇasamathā uppannuppannānaṁ adhikaraṇānaṁ samathāya vūpasamāya—

dn33:2.3.50 sammukhāvinayo dātabbo, sativinayo dātabbo, amūḷhavinayo dātabbo, paṭiññāya kāretabbaṁ, yebhuyyasikā, tassapāpiyasikā, tiṇavatthārako.

dn33:2.3.51 Ime kho, āvuso, tena bhagavatā jānatā passatā arahatā sammāsambuddhena satta dhammā sammadakkhātā;

dn33:2.3.52 tattha sabbeheva saṅgāyitabbaṁ …pe… atthāya hitāya sukhāya devamanussānaṁ.

dn33:2.3.53 Dutiyabhāṇavāro niṭṭhito.