Saṅgītisutta

dn33:1.1.1 Evaṁ me sutaṁ—

dn33:1.1.2 ekaṁ samayaṁ bhagavā mallesu cārikaṁ caramāno mahatā bhikkhusaṅghena saddhiṁ pañcamattehi bhikkhusatehi yena pāvā nāma mallānaṁ nagaraṁ tadavasari.

dn33:1.1.3 Tatra sudaṁ bhagavā pāvāyaṁ viharati cundassa kammāraputtassa ambavane.

dn33:1.2.1 Tena kho pana samayena pāveyyakānaṁ mallānaṁ ubbhatakaṁ nāma navaṁ sandhāgāraṁ acirakāritaṁ hoti anajjhāvuṭṭhaṁ samaṇena vā brāhmaṇena vā kenaci vā manussabhūtena.

dn33:1.2.2 Assosuṁ kho pāveyyakā mallā: “bhagavā kira mallesu cārikaṁ caramāno mahatā bhikkhusaṅghena saddhiṁ pañcamattehi bhikkhusatehi pāvaṁ anuppatto pāvāyaṁ viharati cundassa kammāraputtassa ambavane”ti.

dn33:1.2.3 Atha kho pāveyyakā mallā yena bhagavā tenupasaṅkamiṁsu; upasaṅkamitvā bhagavantaṁ abhivādetvā ekamantaṁ nisīdiṁsu. Ekamantaṁ nisinnā kho pāveyyakā mallā bhagavantaṁ etadavocuṁ:

dn33:1.2.4 “idha, bhante, pāveyyakānaṁ mallānaṁ ubbhatakaṁ nāma navaṁ sandhāgāraṁ acirakāritaṁ hoti anajjhāvuṭṭhaṁ samaṇena vā brāhmaṇena vā kenaci vā manussabhūtena.

dn33:1.2.5 Tañca kho, bhante, bhagavā paṭhamaṁ paribhuñjatu, bhagavatā paṭhamaṁ paribhuttaṁ pacchā pāveyyakā mallā paribhuñjissanti.

dn33:1.2.6 Tadassa pāveyyakānaṁ mallānaṁ dīgharattaṁ hitāya sukhāyā”ti.

dn33:1.2.7 Adhivāsesi kho bhagavā tuṇhībhāvena.

dn33:1.3.1 Atha kho pāveyyakā mallā bhagavato adhivāsanaṁ viditvā uṭṭhāyāsanā bhagavantaṁ abhivādetvā padakkhiṇaṁ katvā yena sandhāgāraṁ tenupasaṅkamiṁsu; upasaṅkamitvā sabbasanthariṁ sandhāgāraṁ santharitvā bhagavato āsanāni paññāpetvā udakamaṇikaṁ patiṭṭhapetvā telapadīpaṁ āropetvā yena bhagavā tenupasaṅkamiṁsu;

dn33:1.3.2 upasaṅkamitvā bhagavantaṁ abhivādetvā ekamantaṁ aṭṭhaṁsu.

dn33:1.3.3 Ekamantaṁ ṭhitā kho te pāveyyakā mallā bhagavantaṁ etadavocuṁ:

dn33:1.3.4 “sabbasantharisanthataṁ, bhante, sandhāgāraṁ, bhagavato āsanāni paññattāni, udakamaṇiko patiṭṭhāpito, telapadīpo āropito.

dn33:1.3.5 Yassadāni, bhante, bhagavā kālaṁ maññatī”ti.

dn33:1.4.1 Atha kho bhagavā nivāsetvā pattacīvaramādāya saddhiṁ bhikkhusaṅghena yena sandhāgāraṁ tenupasaṅkami; upasaṅkamitvā pāde pakkhāletvā sandhāgāraṁ pavisitvā majjhimaṁ thambhaṁ nissāya puratthābhimukho nisīdi.

dn33:1.4.2 Bhikkhusaṅghopi kho pāde pakkhāletvā sandhāgāraṁ pavisitvā pacchimaṁ bhittiṁ nissāya puratthābhimukho nisīdi bhagavantaṁyeva purakkhatvā.

dn33:1.4.3 Pāveyyakāpi kho mallā pāde pakkhāletvā sandhāgāraṁ pavisitvā puratthimaṁ bhittiṁ nissāya pacchimābhimukhā nisīdiṁsu bhagavantaṁyeva purakkhatvā.

dn33:1.4.4 Atha kho bhagavā pāveyyake malle bahudeva rattiṁ dhammiyā kathāya sandassetvā samādapetvā samuttejetvā sampahaṁsetvā uyyojesi:

dn33:1.4.5 “abhikkantā kho, vāseṭṭhā, ratti.

dn33:1.4.6 Yassadāni tumhe kālaṁ maññathā”ti.

dn33:1.4.7 “Evaṁ, bhante”ti kho pāveyyakā mallā bhagavato paṭissutvā uṭṭhāyāsanā bhagavantaṁ abhivādetvā padakkhiṇaṁ katvā pakkamiṁsu.

dn33:1.5.1 Atha kho bhagavā acirapakkantesu pāveyyakesu mallesu tuṇhībhūtaṁ tuṇhībhūtaṁ bhikkhusaṅghaṁ anuviloketvā āyasmantaṁ sāriputtaṁ āmantesi:

dn33:1.5.2 “vigatathinamiddho kho, sāriputta, bhikkhusaṅgho.

dn33:1.5.3 Paṭibhātu taṁ, sāriputta, bhikkhūnaṁ dhammīkathā.

dn33:1.5.4 Piṭṭhi me āgilāyati.

dn33:1.5.5 Tamahaṁ āyamissāmī”ti.

dn33:1.5.6 “Evaṁ, bhante”ti kho āyasmā sāriputto bhagavato paccassosi.

dn33:1.5.7 Atha kho bhagavā catugguṇaṁ saṅghāṭiṁ paññāpetvā dakkhiṇena passena sīhaseyyaṁ kappesi pāde pādaṁ accādhāya, sato sampajāno uṭṭhānasaññaṁ manasi karitvā.

dn33:1.6.1 Tena kho pana samayena nigaṇṭho nāṭaputto pāvāyaṁ adhunākālaṅkato hoti.

dn33:1.6.2 Tassa kālaṅkiriyāya bhinnā nigaṇṭhā dvedhikajātā bhaṇḍanajātā kalahajātā vivādāpannā aññamaññaṁ mukhasattīhi vitudantā viharanti:

dn33:1.6.3 “na tvaṁ imaṁ dhammavinayaṁ ājānāsi, ahaṁ imaṁ dhammavinayaṁ ājānāmi, kiṁ tvaṁ imaṁ dhammavinayaṁ ājānissasi. Micchāpaṭipanno tvamasi, ahamasmi sammāpaṭipanno. Sahitaṁ me, asahitaṁ te. Purevacanīyaṁ pacchā avaca, pacchāvacanīyaṁ pure avaca. Adhiciṇṇaṁ te viparāvattaṁ, āropito te vādo, niggahito tvamasi, cara vādappamokkhāya, nibbeṭhehi vā sace pahosī”ti.

dn33:1.6.4 Vadhoyeva kho maññe nigaṇṭhesu nāṭaputtiyesu vattati.

dn33:1.6.5 Yepi nigaṇṭhassa nāṭaputtassa sāvakā gihī odātavasanā, tepi nigaṇṭhesu nāṭaputtiyesu nibbinnarūpā virattarūpā paṭivānarūpā, yathā taṁ durakkhāte dhammavinaye duppavedite aniyyānike anupasamasaṁvattanike asammāsambuddhappavedite bhinnathūpe appaṭisaraṇe.

dn33:1.7.1 Atha kho āyasmā sāriputto bhikkhū āmantesi:

dn33:1.7.2 “nigaṇṭho, āvuso, nāṭaputto pāvāyaṁ adhunākālaṅkato,

dn33:1.7.3 tassa kālaṅkiriyāya bhinnā nigaṇṭhā dvedhikajātā …pe… bhinnathūpe appaṭisaraṇe.

dn33:1.7.4 Evañhetaṁ, āvuso, hoti durakkhāte dhammavinaye duppavedite aniyyānike anupasamasaṁvattanike asammāsambuddhappavedite.

dn33:1.7.5 Ayaṁ kho panāvuso, amhākaṁ bhagavatā dhammo svākkhāto suppavedito niyyāniko upasamasaṁvattaniko sammāsambuddhappavedito.

dn33:1.7.6 Tattha sabbeheva saṅgāyitabbaṁ, na vivaditabbaṁ, yathayidaṁ brahmacariyaṁ addhaniyaṁ assa ciraṭṭhitikaṁ, tadassa bahujanahitāya bahujanasukhāya lokānukampāya atthāya hitāya sukhāya devamanussānaṁ.

dn33:1.7.7 Katamo cāvuso, amhākaṁ bhagavatā dhammo svākkhāto suppavedito niyyāniko upasamasaṁvattaniko sammāsambuddhappavedito;

dn33:1.7.8 yattha sabbeheva saṅgāyitabbaṁ, na vivaditabbaṁ, yathayidaṁ brahmacariyaṁ addhaniyaṁ assa ciraṭṭhitikaṁ, tadassa bahujanahitāya bahujanasukhāya lokānukampāya atthāya hitāya sukhāya devamanussānaṁ?

dn33:1.7.9.0 1. Ekaka

dn33:1.7.10 Atthi kho, āvuso, tena bhagavatā jānatā passatā arahatā sammāsambuddhena eko dhammo sammadakkhāto.

dn33:1.7.11 Tattha sabbeheva saṅgāyitabbaṁ, na vivaditabbaṁ, yathayidaṁ brahmacariyaṁ addhaniyaṁ assa ciraṭṭhitikaṁ, tadassa bahujanahitāya bahujanasukhāya lokānukampāya atthāya hitāya sukhāya devamanussānaṁ.

dn33:1.8.1 Katamo eko dhammo?

dn33:1.8.2 Sabbe sattā āhāraṭṭhitikā.

dn33:1.8.3 Sabbe sattā saṅkhāraṭṭhitikā.

dn33:1.8.4 Ayaṁ kho, āvuso, tena bhagavatā jānatā passatā arahatā sammāsambuddhena eko dhammo sammadakkhāto.

dn33:1.8.5 Tattha sabbeheva saṅgāyitabbaṁ, na vivaditabbaṁ, yathayidaṁ brahmacariyaṁ addhaniyaṁ assa ciraṭṭhitikaṁ, tadassa bahujanahitāya bahujanasukhāya lokānukampāya atthāya hitāya sukhāya devamanussānaṁ.

dn33:1.9.0 2. Duka

dn33:1.9.1 Atthi kho, āvuso, tena bhagavatā jānatā passatā arahatā sammāsambuddhena dve dhammā sammadakkhātā.

dn33:1.9.2 Tattha sabbeheva saṅgāyitabbaṁ, na vivaditabbaṁ, yathayidaṁ brahmacariyaṁ addhaniyaṁ assa ciraṭṭhitikaṁ, tadassa bahujanahitāya bahujanasukhāya lokānukampāya atthāya hitāya sukhāya devamanussānaṁ.

dn33:1.9.3 Katame dve?

dn33:1.9.4 Nāmañca rūpañca.

dn33:1.9.5 Avijjā ca bhavataṇhā ca.

dn33:1.9.6 Bhavadiṭṭhi ca vibhavadiṭṭhi ca.

dn33:1.9.7 Ahirikañca anottappañca.

dn33:1.9.8 Hirī ca ottappañca.

dn33:1.9.9 Dovacassatā ca pāpamittatā ca.

dn33:1.9.10 Sovacassatā ca kalyāṇamittatā ca.

dn33:1.9.11 Āpattikusalatā ca āpattivuṭṭhānakusalatā ca.

dn33:1.9.12 Samāpattikusalatā ca samāpattivuṭṭhānakusalatā ca.

dn33:1.9.13 Dhātukusalatā ca manasikārakusalatā ca.

dn33:1.9.14 Āyatanakusalatā ca paṭiccasamuppādakusalatā ca.

dn33:1.9.15 Ṭhānakusalatā ca aṭṭhānakusalatā ca.

dn33:1.9.16 Ajjavañca lajjavañca.

dn33:1.9.17 Khanti ca soraccañca.

dn33:1.9.18 Sākhalyañca paṭisanthāro ca.

dn33:1.9.19 Avihiṁsā ca soceyyañca.

dn33:1.9.20 Muṭṭhassaccañca asampajaññañca.

dn33:1.9.21 Sati ca sampajaññañca.

dn33:1.9.22 Indriyesu aguttadvāratā ca bhojane amattaññutā ca.

dn33:1.9.23 Indriyesu guttadvāratā ca bhojane mattaññutā ca.

dn33:1.9.24 Paṭisaṅkhānabalañca bhāvanābalañca.

dn33:1.9.25 Satibalañca samādhibalañca.

dn33:1.9.26 Samatho ca vipassanā ca.

dn33:1.9.27 Samathanimittañca paggahanimittañca.

dn33:1.9.28 Paggaho ca avikkhepo ca.

dn33:1.9.29 Sīlavipatti ca diṭṭhivipatti ca.

dn33:1.9.30 Sīlasampadā ca diṭṭhisampadā ca.

dn33:1.9.31 Sīlavisuddhi ca diṭṭhivisuddhi ca.

dn33:1.9.32 Diṭṭhivisuddhi kho pana yathā diṭṭhissa ca padhānaṁ.

dn33:1.9.33 Saṁvego ca saṁvejanīyesu ṭhānesu saṁviggassa ca yoniso padhānaṁ.

dn33:1.9.34 Asantuṭṭhitā ca kusalesu dhammesu appaṭivānitā ca padhānasmiṁ.

dn33:1.9.35 Vijjā ca vimutti ca.

dn33:1.9.36 Khayeñāṇaṁ anuppādeñāṇaṁ.

dn33:1.9.37 Ime kho, āvuso, tena bhagavatā jānatā passatā arahatā sammāsambuddhena dve dhammā sammadakkhātā.

dn33:1.9.38 Tattha sabbeheva saṅgāyitabbaṁ, na vivaditabbaṁ, yathayidaṁ brahmacariyaṁ addhaniyaṁ assa ciraṭṭhitikaṁ, tadassa bahujanahitāya bahujanasukhāya lokānukampāya atthāya hitāya sukhāya devamanussānaṁ.

dn33:1.10.0 3. Tika

dn33:1.10.1 Atthi kho, āvuso, tena bhagavatā jānatā passatā arahatā sammāsambuddhena tayo dhammā sammadakkhātā.

dn33:1.10.2 Tattha sabbeheva saṅgāyitabbaṁ …pe… atthāya hitāya sukhāya devamanussānaṁ.

dn33:1.10.3 Katame tayo?

dn33:1.10.4 Tīṇi akusalamūlāni—

dn33:1.10.5 lobho akusalamūlaṁ, doso akusalamūlaṁ, moho akusalamūlaṁ.

dn33:1.10.6 Tīṇi kusalamūlāni—

dn33:1.10.7 alobho kusalamūlaṁ, adoso kusalamūlaṁ, amoho kusalamūlaṁ.

dn33:1.10.8 Tīṇi duccaritāni—

dn33:1.10.9 kāyaduccaritaṁ, vacīduccaritaṁ, manoduccaritaṁ.

dn33:1.10.10 Tīṇi sucaritāni—

dn33:1.10.11 kāyasucaritaṁ, vacīsucaritaṁ, manosucaritaṁ.

dn33:1.10.12 Tayo akusalavitakkā—

dn33:1.10.13 kāmavitakko, byāpādavitakko, vihiṁsāvitakko.

dn33:1.10.14 Tayo kusalavitakkā—

dn33:1.10.15 nekkhammavitakko, abyāpādavitakko, avihiṁsāvitakko.

dn33:1.10.16 Tayo akusalasaṅkappā—

dn33:1.10.17 kāmasaṅkappo, byāpādasaṅkappo, vihiṁsāsaṅkappo.

dn33:1.10.18 Tayo kusalasaṅkappā—

dn33:1.10.19 nekkhammasaṅkappo, abyāpādasaṅkappo, avihiṁsāsaṅkappo.

dn33:1.10.20 Tisso akusalasaññā—

dn33:1.10.21 kāmasaññā, byāpādasaññā, vihiṁsāsaññā.

dn33:1.10.22 Tisso kusalasaññā—

dn33:1.10.23 nekkhammasaññā, abyāpādasaññā, avihiṁsāsaññā.

dn33:1.10.24 Tisso akusaladhātuyo—

dn33:1.10.25 kāmadhātu, byāpādadhātu, vihiṁsādhātu.

dn33:1.10.26 Tisso kusaladhātuyo—

dn33:1.10.27 nekkhammadhātu, abyāpādadhātu, avihiṁsādhātu.

dn33:1.10.28 Aparāpi tisso dhātuyo—

dn33:1.10.29 kāmadhātu, rūpadhātu, arūpadhātu.

dn33:1.10.30 Aparāpi tisso dhātuyo—

dn33:1.10.31 rūpadhātu, arūpadhātu, nirodhadhātu.

dn33:1.10.32 Aparāpi tisso dhātuyo—

dn33:1.10.33 hīnadhātu, majjhimadhātu, paṇītadhātu.

dn33:1.10.34 Tisso taṇhā—

dn33:1.10.35 kāmataṇhā, bhavataṇhā, vibhavataṇhā.

dn33:1.10.36 Aparāpi tisso taṇhā—

dn33:1.10.37 kāmataṇhā, rūpataṇhā, arūpataṇhā.

dn33:1.10.38 Aparāpi tisso taṇhā—

dn33:1.10.39 rūpataṇhā, arūpataṇhā, nirodhataṇhā.

dn33:1.10.40 Tīṇi saṁyojanāni—

dn33:1.10.41 sakkāyadiṭṭhi, vicikicchā, sīlabbataparāmāso.

dn33:1.10.42 Tayo āsavā—

dn33:1.10.43 kāmāsavo, bhavāsavo, avijjāsavo.

dn33:1.10.44 Tayo bhavā—

dn33:1.10.45 kāmabhavo, rūpabhavo, arūpabhavo.

dn33:1.10.46 Tisso esanā—

dn33:1.10.47 kāmesanā, bhavesanā, brahmacariyesanā.

dn33:1.10.48 Tisso vidhā—

dn33:1.10.49 seyyohamasmīti vidhā, sadisohamasmīti vidhā, hīnohamasmīti vidhā.

dn33:1.10.50 Tayo addhā—

dn33:1.10.51 atīto addhā, anāgato addhā, paccuppanno addhā.

dn33:1.10.52 Tayo antā—

dn33:1.10.53 sakkāyo anto, sakkāyasamudayo anto, sakkāyanirodho anto.

dn33:1.10.54 Tisso vedanā—

dn33:1.10.55 sukhā vedanā, dukkhā vedanā, adukkhamasukhā vedanā.

dn33:1.10.56 Tisso dukkhatā—

dn33:1.10.57 dukkhadukkhatā, saṅkhāradukkhatā, vipariṇāmadukkhatā.

dn33:1.10.58 Tayo rāsī—

dn33:1.10.59 micchattaniyato rāsi, sammattaniyato rāsi, aniyato rāsi.

dn33:1.10.60 Tayo tamā—

dn33:1.10.61 atītaṁ vā addhānaṁ ārabbha kaṅkhati vicikicchati nādhimuccati na sampasīdati, anāgataṁ vā addhānaṁ ārabbha kaṅkhati vicikicchati nādhimuccati na sampasīdati, etarahi vā paccuppannaṁ addhānaṁ ārabbha kaṅkhati vicikicchati nādhimuccati na sampasīdati.

dn33:1.10.62 Tīṇi tathāgatassa arakkheyyāni—

dn33:1.10.63 parisuddhakāyasamācāro āvuso tathāgato, natthi tathāgatassa kāyaduccaritaṁ, yaṁ tathāgato rakkheyya:

dn33:1.10.64 ‘mā me idaṁ paro aññāsī’ti.

dn33:1.10.65 Parisuddhavacīsamācāro āvuso, tathāgato, natthi tathāgatassa vacīduccaritaṁ, yaṁ tathāgato rakkheyya:

dn33:1.10.66 ‘mā me idaṁ paro aññāsī’ti.

dn33:1.10.67 Parisuddhamanosamācāro, āvuso, tathāgato, natthi tathāgatassa manoduccaritaṁ yaṁ tathāgato rakkheyya:

dn33:1.10.68 ‘mā me idaṁ paro aññāsī’ti.

dn33:1.10.69 Tayo kiñcanā—

dn33:1.10.70 rāgo kiñcanaṁ, doso kiñcanaṁ, moho kiñcanaṁ.

dn33:1.10.71 Tayo aggī—

dn33:1.10.72 rāgaggi, dosaggi, mohaggi.

dn33:1.10.73 Aparepi tayo aggī—

dn33:1.10.74 āhuneyyaggi, gahapataggi, dakkhiṇeyyaggi.

dn33:1.10.75 Tividhena rūpasaṅgaho—

dn33:1.10.76 sanidassanasappaṭighaṁ rūpaṁ, anidassanasappaṭighaṁ rūpaṁ, anidassanaappaṭighaṁ rūpaṁ.

dn33:1.10.77 Tayo saṅkhārā—

dn33:1.10.78 puññābhisaṅkhāro, apuññābhisaṅkhāro, āneñjābhisaṅkhāro.

dn33:1.10.79 Tayo puggalā—

dn33:1.10.80 sekkho puggalo, asekkho puggalo, nevasekkho nāsekkho puggalo.

dn33:1.10.81 Tayo therā—

dn33:1.10.82 jātithero, dhammathero, sammutithero.

dn33:1.10.83 Tīṇi puññakiriyavatthūni—

dn33:1.10.84 dānamayaṁ puññakiriyavatthu, sīlamayaṁ puññakiriyavatthu, bhāvanāmayaṁ puññakiriyavatthu.

dn33:1.10.85 Tīṇi codanāvatthūni—

dn33:1.10.86 diṭṭhena, sutena, parisaṅkāya.

dn33:1.10.87 Tisso kāmūpapattiyo—

dn33:1.10.88 santāvuso sattā paccupaṭṭhitakāmā, te paccupaṭṭhitesu kāmesu vasaṁ vattenti, seyyathāpi manussā ekacce ca devā ekacce ca vinipātikā.

dn33:1.10.89 Ayaṁ paṭhamā kāmūpapatti.

dn33:1.10.90 Santāvuso, sattā nimmitakāmā, te nimminitvā nimminitvā kāmesu vasaṁ vattenti, seyyathāpi devā nimmānaratī.

dn33:1.10.91 Ayaṁ dutiyā kāmūpapatti.

dn33:1.10.92 Santāvuso sattā paranimmitakāmā, te paranimmitesu kāmesu vasaṁ vattenti, seyyathāpi devā paranimmitavasavattī.

dn33:1.10.93 Ayaṁ tatiyā kāmūpapatti.

dn33:1.10.94 Tisso sukhūpapattiyo—

dn33:1.10.95 santāvuso sattā uppādetvā uppādetvā sukhaṁ viharanti, seyyathāpi devā brahmakāyikā.

dn33:1.10.96 Ayaṁ paṭhamā sukhūpapatti.

dn33:1.10.97 Santāvuso, sattā sukhena abhisannā parisannā paripūrā paripphuṭā.

dn33:1.10.98 Te kadāci karahaci udānaṁ udānenti:

dn33:1.10.99 ‘aho sukhaṁ, aho sukhan’ti, seyyathāpi devā ābhassarā.

dn33:1.10.100 Ayaṁ dutiyā sukhūpapatti.

dn33:1.10.101 Santāvuso, sattā sukhena abhisannā parisannā paripūrā paripphuṭā.

dn33:1.10.102 Te santaṁyeva tusitā sukhaṁ paṭisaṁvedenti, seyyathāpi devā subhakiṇhā.

dn33:1.10.103 Ayaṁ tatiyā sukhūpapatti.

dn33:1.10.104 Tisso paññā—

dn33:1.10.105 sekkhā paññā, asekkhā paññā, nevasekkhānāsekkhā paññā.

dn33:1.10.106 Aparāpi tisso paññā—

dn33:1.10.107 cintāmayā paññā, sutamayā paññā, bhāvanāmayā paññā.

dn33:1.10.108 Tīṇāvudhāni—

dn33:1.10.109 sutāvudhaṁ, pavivekāvudhaṁ, paññāvudhaṁ.

dn33:1.10.110 Tīṇindriyāni—

dn33:1.10.111 anaññātaññassāmītindriyaṁ, aññindriyaṁ, aññātāvindriyaṁ.

dn33:1.10.112 Tīṇi cakkhūni—

dn33:1.10.113 maṁsacakkhu, dibbacakkhu, paññācakkhu.

dn33:1.10.114 Tisso sikkhā—

dn33:1.10.115 adhisīlasikkhā, adhicittasikkhā, adhipaññāsikkhā.

dn33:1.10.116 Tisso bhāvanā—

dn33:1.10.117 kāyabhāvanā, cittabhāvanā, paññābhāvanā.

dn33:1.10.118 Tīṇi anuttariyāni—

dn33:1.10.119 dassanānuttariyaṁ, paṭipadānuttariyaṁ, vimuttānuttariyaṁ.

dn33:1.10.120 Tayo samādhī—

dn33:1.10.121 savitakkasavicāro samādhi, avitakkavicāramatto samādhi, avitakkaavicāro samādhi.

dn33:1.10.122 Aparepi tayo samādhī—

dn33:1.10.123 suññato samādhi, animitto samādhi, appaṇihito samādhi.

dn33:1.10.124 Tīṇi soceyyāni—

dn33:1.10.125 kāyasoceyyaṁ, vacīsoceyyaṁ, manosoceyyaṁ.

dn33:1.10.126 Tīṇi moneyyāni—

dn33:1.10.127 kāyamoneyyaṁ, vacīmoneyyaṁ, manomoneyyaṁ.

dn33:1.10.128 Tīṇi kosallāni—

dn33:1.10.129 āyakosallaṁ, apāyakosallaṁ, upāyakosallaṁ.

dn33:1.10.130 Tayo madā—

dn33:1.10.131 ārogyamado, yobbanamado, jīvitamado.

dn33:1.10.132 Tīṇi ādhipateyyāni—

dn33:1.10.133 attādhipateyyaṁ, lokādhipateyyaṁ, dhammādhipateyyaṁ.

dn33:1.10.134 Tīṇi kathāvatthūni—

dn33:1.10.135 atītaṁ vā addhānaṁ ārabbha kathaṁ katheyya:

dn33:1.10.136 ‘evaṁ ahosi atītamaddhānan’ti;

dn33:1.10.137 anāgataṁ vā addhānaṁ ārabbha kathaṁ katheyya:

dn33:1.10.138 ‘evaṁ bhavissati anāgatamaddhānan’ti;

dn33:1.10.139 etarahi vā paccuppannaṁ addhānaṁ ārabbha kathaṁ katheyya:

dn33:1.10.140 ‘evaṁ hoti etarahi paccuppannaṁ addhānan’ti.

dn33:1.10.141 Tisso vijjā—

dn33:1.10.142 pubbenivāsānussatiñāṇaṁ vijjā, sattānaṁ cutūpapāteñāṇaṁ vijjā, āsavānaṁ khayeñāṇaṁ vijjā.

dn33:1.10.143 Tayo vihārā—

dn33:1.10.144 dibbo vihāro, brahmā vihāro, ariyo vihāro.

dn33:1.10.145 Tīṇi pāṭihāriyāni—

dn33:1.10.146 iddhipāṭihāriyaṁ, ādesanāpāṭihāriyaṁ, anusāsanīpāṭihāriyaṁ.

dn33:1.10.147 Ime kho, āvuso, tena bhagavatā jānatā passatā arahatā sammāsambuddhena tayo dhammā sammadakkhātā.

dn33:1.10.148 Tattha sabbeheva saṅgāyitabbaṁ …pe… atthāya hitāya sukhāya devamanussānaṁ.

dn33:1.11.0 4. Catukka

dn33:1.11.1 Atthi kho, āvuso, tena bhagavatā jānatā passatā arahatā sammāsambuddhena cattāro dhammā sammadakkhātā.

dn33:1.11.2 Tattha sabbeheva saṅgāyitabbaṁ, na vivaditabbaṁ …pe… atthāya hitāya sukhāya devamanussānaṁ.

dn33:1.11.3 Katame cattāro?

dn33:1.11.4 Cattāro satipaṭṭhānā.

dn33:1.11.5 Idhāvuso, bhikkhu kāye kāyānupassī viharati ātāpī sampajāno satimā, vineyya loke abhijjhādomanassaṁ.

dn33:1.11.6 Vedanāsu vedanānupassī …pe…

dn33:1.11.7 citte cittānupassī …pe…

dn33:1.11.8 dhammesu dhammānupassī viharati ātāpī sampajāno satimā vineyya loke abhijjhādomanassaṁ.

dn33:1.11.9 Cattāro sammappadhānā.

dn33:1.11.10 Idhāvuso, bhikkhu anuppannānaṁ pāpakānaṁ akusalānaṁ dhammānaṁ anuppādāya chandaṁ janeti vāyamati vīriyaṁ ārabhati cittaṁ paggaṇhāti padahati.

dn33:1.11.11 Uppannānaṁ pāpakānaṁ akusalānaṁ dhammānaṁ pahānāya chandaṁ janeti vāyamati vīriyaṁ ārabhati cittaṁ paggaṇhāti padahati.

dn33:1.11.12 Anuppannānaṁ kusalānaṁ dhammānaṁ uppādāya chandaṁ janeti vāyamati vīriyaṁ ārabhati cittaṁ paggaṇhāti padahati.

dn33:1.11.13 Uppannānaṁ kusalānaṁ dhammānaṁ ṭhitiyā asammosāya bhiyyobhāvāya vepullāya bhāvanāya pāripūriyā chandaṁ janeti vāyamati vīriyaṁ ārabhati cittaṁ paggaṇhāti padahati.

dn33:1.11.14 Cattāro iddhipādā.

dn33:1.11.15 Idhāvuso, bhikkhu chandasamādhipadhānasaṅkhārasamannāgataṁ iddhipādaṁ bhāveti.

dn33:1.11.16 Cittasamādhipadhānasaṅkhārasamannāgataṁ iddhipādaṁ bhāveti.

dn33:1.11.17 Vīriyasamādhipadhānasaṅkhārasamannāgataṁ iddhipādaṁ bhāveti.

dn33:1.11.18 Vīmaṁsāsamādhipadhānasaṅkhārasamannāgataṁ iddhipādaṁ bhāveti.

dn33:1.11.19 Cattāri jhānāni.

dn33:1.11.20 Idhāvuso, bhikkhu vivicceva kāmehi vivicca akusalehi dhammehi savitakkaṁ savicāraṁ vivekajaṁ pītisukhaṁ paṭhamaṁ jhānaṁ upasampajja viharati.

dn33:1.11.21 Vitakkavicārānaṁ vūpasamā ajjhattaṁ sampasādanaṁ cetaso ekodibhāvaṁ avitakkaṁ avicāraṁ samādhijaṁ pītisukhaṁ dutiyaṁ jhānaṁ upasampajja viharati.

dn33:1.11.22 Pītiyā ca virāgā upekkhako ca viharati sato ca sampajāno, sukhañca kāyena paṭisaṁvedeti, yaṁ taṁ ariyā ācikkhanti: ‘upekkhako satimā sukhavihārī’ti tatiyaṁ jhānaṁ upasampajja viharati.

dn33:1.11.23 Sukhassa ca pahānā dukkhassa ca pahānā, pubbeva somanassadomanassānaṁ atthaṅgamā, adukkhamasukhaṁ upekkhāsatipārisuddhiṁ catutthaṁ jhānaṁ upasampajja viharati.

dn33:1.11.24 Catasso samādhibhāvanā.

dn33:1.11.25 Atthāvuso, samādhibhāvanā bhāvitā bahulīkatā diṭṭhadhammasukhavihārāya saṁvattati.

dn33:1.11.26 Atthāvuso, samādhibhāvanā bhāvitā bahulīkatā ñāṇadassanapaṭilābhāya saṁvattati.

dn33:1.11.27 Atthāvuso samādhibhāvanā bhāvitā bahulīkatā satisampajaññāya saṁvattati.

dn33:1.11.28 Atthāvuso samādhibhāvanā bhāvitā bahulīkatā āsavānaṁ khayāya saṁvattati.

dn33:1.11.29 Katamā cāvuso, samādhibhāvanā bhāvitā bahulīkatā diṭṭhadhammasukhavihārāya saṁvattati?

dn33:1.11.30 Idhāvuso, bhikkhu vivicceva kāmehi vivicca akusalehi dhammehi savitakkaṁ …

dn33:1.11.31 pe…

dn33:1.11.32 catutthaṁ jhānaṁ upasampajja viharati.

dn33:1.11.33 Ayaṁ, āvuso, samādhibhāvanā bhāvitā bahulīkatā diṭṭhadhammasukhavihārāya saṁvattati.

dn33:1.11.34 Katamā cāvuso, samādhibhāvanā bhāvitā bahulīkatā ñāṇadassanapaṭilābhāya saṁvattati?

dn33:1.11.35 Idhāvuso, bhikkhu ālokasaññaṁ manasi karoti, divāsaññaṁ adhiṭṭhāti yathā divā tathā rattiṁ, yathā rattiṁ tathā divā.

dn33:1.11.36 Iti vivaṭena cetasā apariyonaddhena sappabhāsaṁ cittaṁ bhāveti.

dn33:1.11.37 Ayaṁ, āvuso, samādhibhāvanā bhāvitā bahulīkatā ñāṇadassanapaṭilābhāya saṁvattati.

dn33:1.11.38 Katamā cāvuso, samādhibhāvanā bhāvitā bahulīkatā satisampajaññāya saṁvattati?

dn33:1.11.39 Idhāvuso, bhikkhuno viditā vedanā uppajjanti, viditā upaṭṭhahanti, viditā abbhatthaṁ gacchanti.

dn33:1.11.40 Viditā saññā uppajjanti, viditā upaṭṭhahanti, viditā abbhatthaṁ gacchanti.

dn33:1.11.41 Viditā vitakkā uppajjanti, viditā upaṭṭhahanti, viditā abbhatthaṁ gacchanti.

dn33:1.11.42 Ayaṁ, āvuso, samādhibhāvanā bhāvitā bahulīkatā satisampajaññāya saṁvattati.

dn33:1.11.43 Katamā cāvuso, samādhibhāvanā bhāvitā bahulīkatā āsavānaṁ khayāya saṁvattati?

dn33:1.11.44 Idhāvuso, bhikkhu pañcasu upādānakkhandhesu udayabbayānupassī viharati.

dn33:1.11.45 Iti rūpaṁ, iti rūpassa samudayo, iti rūpassa atthaṅgamo.

dn33:1.11.46 Iti vedanā …pe…

dn33:1.11.47 iti saññā …

dn33:1.11.48 iti saṅkhārā …

dn33:1.11.49 iti viññāṇaṁ, iti viññāṇassa samudayo, iti viññāṇassa atthaṅgamo.

dn33:1.11.50 Ayaṁ, āvuso, samādhibhāvanā bhāvitā bahulīkatā āsavānaṁ khayāya saṁvattati.

dn33:1.11.51 Catasso appamaññā.

dn33:1.11.52 Idhāvuso, bhikkhu mettāsahagatena cetasā ekaṁ disaṁ pharitvā viharati. Tathā dutiyaṁ. Tathā tatiyaṁ. Tathā catutthaṁ. Iti uddhamadho tiriyaṁ sabbadhi sabbattatāya sabbāvantaṁ lokaṁ mettāsahagatena cetasā vipulena mahaggatena appamāṇena averena abyāpajjena pharitvā viharati.

dn33:1.11.53 Karuṇāsahagatena cetasā …pe…

dn33:1.11.54 muditāsahagatena cetasā …pe…

dn33:1.11.55 upekkhāsahagatena cetasā ekaṁ disaṁ pharitvā viharati. Tathā dutiyaṁ. Tathā tatiyaṁ. Tathā catutthaṁ. Iti uddhamadho tiriyaṁ sabbadhi sabbattatāya sabbāvantaṁ lokaṁ upekkhāsahagatena cetasā vipulena mahaggatena appamāṇena averena abyāpajjena pharitvā viharati.

dn33:1.11.56 Cattāro āruppā.

dn33:1.11.57 Idhāvuso, bhikkhu sabbaso rūpasaññānaṁ samatikkamā paṭighasaññānaṁ atthaṅgamā nānattasaññānaṁ amanasikārā ‘ananto ākāso’ti ākāsānañcāyatanaṁ upasampajja viharati.

dn33:1.11.58 Sabbaso ākāsānañcāyatanaṁ samatikkamma ‘anantaṁ viññāṇan’ti viññāṇañcāyatanaṁ upasampajja viharati.

dn33:1.11.59 Sabbaso viññāṇañcāyatanaṁ samatikkamma ‘natthi kiñcī’ti ākiñcaññāyatanaṁ upasampajja viharati.

dn33:1.11.60 Sabbaso ākiñcaññāyatanaṁ samatikkamma nevasaññānāsaññāyatanaṁ upasampajja viharati.

dn33:1.11.61 Cattāri apassenāni.

dn33:1.11.62 Idhāvuso, bhikkhu saṅkhāyekaṁ paṭisevati, saṅkhāyekaṁ adhivāseti, saṅkhāyekaṁ parivajjeti, saṅkhāyekaṁ vinodeti.

dn33:1.11.63 Cattāro ariyavaṁsā.

dn33:1.11.64 Idhāvuso, bhikkhu santuṭṭho hoti itarītarena cīvarena, itarītaracīvarasantuṭṭhiyā ca vaṇṇavādī, na ca cīvarahetu anesanaṁ appatirūpaṁ āpajjati; aladdhā ca cīvaraṁ na paritassati, laddhā ca cīvaraṁ agadhito amucchito anajjhāpanno ādīnavadassāvī nissaraṇapañño paribhuñjati; tāya ca pana itarītaracīvarasantuṭṭhiyā nevattānukkaṁseti na paraṁ vambheti.

dn33:1.11.65 Yo hi tattha dakkho analaso sampajāno paṭissato, ayaṁ vuccatāvuso: ‘bhikkhu porāṇe aggaññe ariyavaṁse ṭhito’.

dn33:1.11.66 Puna caparaṁ, āvuso, bhikkhu santuṭṭho hoti itarītarena piṇḍapātena, itarītarapiṇḍapātasantuṭṭhiyā ca vaṇṇavādī, na ca piṇḍapātahetu anesanaṁ appatirūpaṁ āpajjati; aladdhā ca piṇḍapātaṁ na paritassati, laddhā ca piṇḍapātaṁ agadhito amucchito anajjhāpanno ādīnavadassāvī nissaraṇapañño paribhuñjati; tāya ca pana itarītarapiṇḍapātasantuṭṭhiyā nevattānukkaṁseti na paraṁ vambheti.

dn33:1.11.67 Yo hi tattha dakkho analaso sampajāno paṭissato, ayaṁ vuccatāvuso: ‘bhikkhu porāṇe aggaññe ariyavaṁse ṭhito’.

dn33:1.11.68 Puna caparaṁ, āvuso, bhikkhu santuṭṭho hoti itarītarena senāsanena, itarītarasenāsanasantuṭṭhiyā ca vaṇṇavādī, na ca senāsanahetu anesanaṁ appatirūpaṁ āpajjati; aladdhā ca senāsanaṁ na paritassati, laddhā ca senāsanaṁ agadhito amucchito anajjhāpanno ādīnavadassāvī nissaraṇapañño paribhuñjati; tāya ca pana itarītarasenāsanasantuṭṭhiyā nevattānukkaṁseti na paraṁ vambheti.

dn33:1.11.69 Yo hi tattha dakkho analaso sampajāno paṭissato, ayaṁ vuccatāvuso: ‘bhikkhu porāṇe aggaññe ariyavaṁse ṭhito’.

dn33:1.11.70 Puna caparaṁ, āvuso, bhikkhu pahānārāmo hoti pahānarato, bhāvanārāmo hoti bhāvanārato; tāya ca pana pahānārāmatāya pahānaratiyā bhāvanārāmatāya bhāvanāratiyā nevattānukkaṁseti na paraṁ vambheti.

dn33:1.11.71 Yo hi tattha dakkho analaso sampajāno paṭissato ayaṁ vuccatāvuso: ‘bhikkhu porāṇe aggaññe ariyavaṁse ṭhito’.

dn33:1.11.72 Cattāri padhānāni.

dn33:1.11.73 Saṁvarapadhānaṁ pahānapadhānaṁ bhāvanāpadhānaṁ anurakkhaṇāpadhānaṁ.

dn33:1.11.74 Katamañcāvuso, saṁvarapadhānaṁ?

dn33:1.11.75 Idhāvuso, bhikkhu cakkhunā rūpaṁ disvā na nimittaggāhī hoti nānubyañjanaggāhī.

dn33:1.11.76 Yatvādhikaraṇamenaṁ cakkhundriyaṁ asaṁvutaṁ viharantaṁ abhijjhādomanassā pāpakā akusalā dhammā anvāssaveyyuṁ, tassa saṁvarāya paṭipajjati, rakkhati cakkhundriyaṁ, cakkhundriye saṁvaraṁ āpajjati.

dn33:1.11.77 Sotena saddaṁ sutvā …

dn33:1.11.78 ghānena gandhaṁ ghāyitvā …

dn33:1.11.79 jivhāya rasaṁ sāyitvā …

dn33:1.11.80 kāyena phoṭṭhabbaṁ phusitvā …

dn33:1.11.81 manasā dhammaṁ viññāya na nimittaggāhī hoti nānubyañjanaggāhī.

dn33:1.11.82 Yatvādhikaraṇamenaṁ manindriyaṁ asaṁvutaṁ viharantaṁ abhijjhādomanassā pāpakā akusalā dhammā anvāssaveyyuṁ, tassa saṁvarāya paṭipajjati, rakkhati manindriyaṁ, manindriye saṁvaraṁ āpajjati.

dn33:1.11.83 Idaṁ vuccatāvuso, saṁvarapadhānaṁ.

dn33:1.11.84 Katamañcāvuso, pahānapadhānaṁ?

dn33:1.11.85 Idha, bhikkhave, bhikkhu uppannaṁ kāmavitakkaṁ nādhivāseti pajahati vinodeti byantiṁ karoti anabhāvaṁ gameti;

dn33:1.11.86 uppannaṁ byāpādavitakkaṁ …pe…

dn33:1.11.87 uppannaṁ vihiṁsāvitakkaṁ …pe…

dn33:1.11.88 uppannuppanne pāpake akusale dhamme nādhivāseti pajahati vinodeti byantiṁ karoti anabhāvaṁ gameti.

dn33:1.11.89 Idaṁ vuccatāvuso, pahānapadhānaṁ.

dn33:1.11.90 Katamañcāvuso, bhāvanāpadhānaṁ?

dn33:1.11.91 Idha, bhikkhave, bhikkhu satisambojjhaṅgaṁ bhāveti vivekanissitaṁ virāganissitaṁ nirodhanissitaṁ vossaggapariṇāmiṁ,

dn33:1.11.92 dhammavicayasambojjhaṅgaṁ bhāveti …

dn33:1.11.93 vīriyasambojjhaṅgaṁ bhāveti …

dn33:1.11.94 pītisambojjhaṅgaṁ bhāveti …

dn33:1.11.95 passaddhisambojjhaṅgaṁ bhāveti …

dn33:1.11.96 samādhisambojjhaṅgaṁ bhāveti …

dn33:1.11.97 upekkhāsambojjhaṅgaṁ bhāveti vivekanissitaṁ virāganissitaṁ nirodhanissitaṁ vossaggapariṇāmiṁ.

dn33:1.11.98 Idaṁ vuccatāvuso, bhāvanāpadhānaṁ.

dn33:1.11.99 Katamañcāvuso, anurakkhaṇāpadhānaṁ?

dn33:1.11.100 Idhāvuso, bhikkhu uppannaṁ bhadrakaṁ samādhinimittaṁ anurakkhati—aṭṭhikasaññaṁ, puḷuvakasaññaṁ, vinīlakasaññaṁ, vicchiddakasaññaṁ, uddhumātakasaññaṁ.

dn33:1.11.101 Idaṁ vuccatāvuso, anurakkhaṇāpadhānaṁ.

dn33:1.11.102 Cattāri ñāṇāni—

dn33:1.11.103 dhamme ñāṇaṁ, anvaye ñāṇaṁ, pariye ñāṇaṁ, sammutiyā ñāṇaṁ.

dn33:1.11.104 Aparānipi cattāri ñāṇāni—

dn33:1.11.105 dukkhe ñāṇaṁ, dukkhasamudaye ñāṇaṁ, dukkhanirodhe ñāṇaṁ, dukkhanirodhagāminiyā paṭipadāya ñāṇaṁ.

dn33:1.11.106 Cattāri sotāpattiyaṅgāni—

dn33:1.11.107 sappurisasaṁsevo, saddhammassavanaṁ, yonisomanasikāro, dhammānudhammappaṭipatti.

dn33:1.11.108 Cattāri sotāpannassa aṅgāni.

dn33:1.11.109 Idhāvuso, ariyasāvako buddhe aveccappasādena samannāgato hoti:

dn33:1.11.110 ‘itipi so bhagavā arahaṁ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṁ buddho, bhagavā’ti.

dn33:1.11.111 Dhamme aveccappasādena samannāgato hoti:

dn33:1.11.112 ‘svākkhāto bhagavatā dhammo sandiṭṭhiko akāliko ehipassiko opaneyyiko paccattaṁ veditabbo viññūhī’ti.

dn33:1.11.113 Saṅghe aveccappasādena samannāgato hoti:

dn33:1.11.114 ‘suppaṭipanno bhagavato sāvakasaṅgho ujuppaṭipanno bhagavato sāvakasaṅgho ñāyappaṭipanno bhagavato sāvakasaṅgho sāmīcippaṭipanno bhagavato sāvakasaṅgho yadidaṁ cattāri purisayugāni aṭṭha purisapuggalā, esa bhagavato sāvakasaṅgho āhuneyyo pāhuneyyo dakkhiṇeyyo añjalikaraṇīyo anuttaraṁ puññakkhettaṁ lokassā’ti.

dn33:1.11.115 Ariyakantehi sīlehi samannāgato hoti akhaṇḍehi acchiddehi asabalehi akammāsehi bhujissehi viññuppasatthehi aparāmaṭṭhehi samādhisaṁvattanikehi.

dn33:1.11.116 Cattāri sāmaññaphalāni—

dn33:1.11.117 sotāpattiphalaṁ, sakadāgāmiphalaṁ, anāgāmiphalaṁ, arahattaphalaṁ.

dn33:1.11.118 Catasso dhātuyo—

dn33:1.11.119 pathavīdhātu, āpodhātu, tejodhātu, vāyodhātu.

dn33:1.11.120 Cattāro āhārā—

dn33:1.11.121 kabaḷīkāro āhāro oḷāriko vā sukhumo vā, phasso dutiyo, manosañcetanā tatiyā, viññāṇaṁ catutthaṁ.

dn33:1.11.122 Catasso viññāṇaṭṭhitiyo.

dn33:1.11.123 Rūpūpāyaṁ vā, āvuso, viññāṇaṁ tiṭṭhamānaṁ tiṭṭhati rūpārammaṇaṁ rūpappatiṭṭhaṁ nandūpasecanaṁ vuddhiṁ virūḷhiṁ vepullaṁ āpajjati;

dn33:1.11.124 vedanūpāyaṁ vā āvuso …

dn33:1.11.125 saññūpāyaṁ vā, āvuso …pe…

dn33:1.11.126 saṅkhārūpāyaṁ vā, āvuso, viññāṇaṁ tiṭṭhamānaṁ tiṭṭhati saṅkhārārammaṇaṁ saṅkhārappatiṭṭhaṁ nandūpasecanaṁ vuddhiṁ virūḷhiṁ vepullaṁ āpajjati.

dn33:1.11.127 Cattāri agatigamanāni—

dn33:1.11.128 chandāgatiṁ gacchati, dosāgatiṁ gacchati, mohāgatiṁ gacchati, bhayāgatiṁ gacchati.

dn33:1.11.129 Cattāro taṇhuppādā—

dn33:1.11.130 cīvarahetu vā, āvuso, bhikkhuno taṇhā uppajjamānā uppajjati;

dn33:1.11.131 piṇḍapātahetu vā, āvuso, bhikkhuno taṇhā uppajjamānā uppajjati;

dn33:1.11.132 senāsanahetu vā, āvuso, bhikkhuno taṇhā uppajjamānā uppajjati;

dn33:1.11.133 itibhavābhavahetu vā, āvuso, bhikkhuno taṇhā uppajjamānā uppajjati.

dn33:1.11.134 Catasso paṭipadā—

dn33:1.11.135 dukkhā paṭipadā dandhābhiññā, dukkhā paṭipadā khippābhiññā, sukhā paṭipadā dandhābhiññā, sukhā paṭipadā khippābhiññā.

dn33:1.11.136 Aparāpi catasso paṭipadā—

dn33:1.11.137 akkhamā paṭipadā, khamā paṭipadā, damā paṭipadā, samā paṭipadā.

dn33:1.11.138 Cattāri dhammapadāni—

dn33:1.11.139 anabhijjhā dhammapadaṁ, abyāpādo dhammapadaṁ, sammāsati dhammapadaṁ, sammāsamādhi dhammapadaṁ.

dn33:1.11.140 Cattāri dhammasamādānāni—

dn33:1.11.141 atthāvuso, dhammasamādānaṁ paccuppannadukkhañceva āyatiñca dukkhavipākaṁ.

dn33:1.11.142 Atthāvuso, dhammasamādānaṁ paccuppannadukkhaṁ āyatiṁ sukhavipākaṁ.

dn33:1.11.143 Atthāvuso, dhammasamādānaṁ paccuppannasukhaṁ āyatiṁ dukkhavipākaṁ.

dn33:1.11.144 Atthāvuso, dhammasamādānaṁ paccuppannasukhañceva āyatiñca sukhavipākaṁ.

dn33:1.11.145 Cattāro dhammakkhandhā—

dn33:1.11.146 sīlakkhandho, samādhikkhandho, paññākkhandho, vimuttikkhandho.

dn33:1.11.147 Cattāri balāni—

dn33:1.11.148 vīriyabalaṁ, satibalaṁ, samādhibalaṁ, paññābalaṁ.

dn33:1.11.149 Cattāri adhiṭṭhānāni—

dn33:1.11.150 paññādhiṭṭhānaṁ, saccādhiṭṭhānaṁ, cāgādhiṭṭhānaṁ, upasamādhiṭṭhānaṁ.

dn33:1.11.151 Cattāri pañhabyākaraṇāni—

dn33:1.11.152 ekaṁsabyākaraṇīyo pañho, paṭipucchābyākaraṇīyo pañho, vibhajjabyākaraṇīyo pañho, ṭhapanīyo pañho.

dn33:1.11.153 Cattāri kammāni—

dn33:1.11.154 atthāvuso, kammaṁ kaṇhaṁ kaṇhavipākaṁ.

dn33:1.11.155 Atthāvuso, kammaṁ sukkaṁ sukkavipākaṁ.

dn33:1.11.156 Atthāvuso, kammaṁ kaṇhasukkaṁ kaṇhasukkavipākaṁ.

dn33:1.11.157 Atthāvuso, kammaṁ akaṇhaasukkaṁ akaṇhaasukkavipākaṁ kammakkhayāya saṁvattati.

dn33:1.11.158 Cattāro sacchikaraṇīyā dhammā—

dn33:1.11.159 pubbenivāso satiyā sacchikaraṇīyo;

dn33:1.11.160 sattānaṁ cutūpapāto cakkhunā sacchikaraṇīyo;

dn33:1.11.161 aṭṭha vimokkhā kāyena sacchikaraṇīyā;

dn33:1.11.162 āsavānaṁ khayo paññāya sacchikaraṇīyo.

dn33:1.11.163 Cattāro oghā—

dn33:1.11.164 kāmogho, bhavogho, diṭṭhogho, avijjogho.

dn33:1.11.165 Cattāro yogā—

dn33:1.11.166 kāmayogo, bhavayogo, diṭṭhiyogo, avijjāyogo.

dn33:1.11.167 Cattāro visaññogā—

dn33:1.11.168 kāmayogavisaññogo, bhavayogavisaññogo, diṭṭhiyogavisaññogo, avijjāyogavisaññogo.

dn33:1.11.169 Cattāro ganthā—

dn33:1.11.170 abhijjhā kāyagantho, byāpādo kāyagantho, sīlabbataparāmāso kāyagantho, idaṁsaccābhiniveso kāyagantho.

dn33:1.11.171 Cattāri upādānāni—

dn33:1.11.172 kāmupādānaṁ, diṭṭhupādānaṁ, sīlabbatupādānaṁ, attavādupādānaṁ.

dn33:1.11.173 Catasso yoniyo—

dn33:1.11.174 aṇḍajayoni, jalābujayoni, saṁsedajayoni, opapātikayoni.

dn33:1.11.175 Catasso gabbhāvakkantiyo.

dn33:1.11.176 Idhāvuso, ekacco asampajāno mātukucchiṁ okkamati, asampajāno mātukucchismiṁ ṭhāti, asampajāno mātukucchimhā nikkhamati, ayaṁ paṭhamā gabbhāvakkanti.

dn33:1.11.177 Puna caparaṁ, āvuso, idhekacco sampajāno mātukucchiṁ okkamati, asampajāno mātukucchismiṁ ṭhāti, asampajāno mātukucchimhā nikkhamati, ayaṁ dutiyā gabbhāvakkanti.

dn33:1.11.178 Puna caparaṁ, āvuso, idhekacco sampajāno mātukucchiṁ okkamati, sampajāno mātukucchismiṁ ṭhāti, asampajāno mātukucchimhā nikkhamati, ayaṁ tatiyā gabbhāvakkanti.

dn33:1.11.179 Puna caparaṁ, āvuso, idhekacco sampajāno mātukucchiṁ okkamati, sampajāno mātukucchismiṁ ṭhāti, sampajāno mātukucchimhā nikkhamati, ayaṁ catutthā gabbhāvakkanti.

dn33:1.11.180 Cattāro attabhāvapaṭilābhā.

dn33:1.11.181 Atthāvuso, attabhāvapaṭilābho, yasmiṁ attabhāvapaṭilābhe attasañcetanāyeva kamati, no parasañcetanā.

dn33:1.11.182 Atthāvuso, attabhāvapaṭilābho, yasmiṁ attabhāvapaṭilābhe parasañcetanāyeva kamati, no attasañcetanā.

dn33:1.11.183 Atthāvuso, attabhāvapaṭilābho, yasmiṁ attabhāvapaṭilābhe attasañcetanā ceva kamati parasañcetanā ca.

dn33:1.11.184 Atthāvuso, attabhāvapaṭilābho, yasmiṁ attabhāvapaṭilābhe neva attasañcetanā kamati, no parasañcetanā.

dn33:1.11.185 Catasso dakkhiṇāvisuddhiyo.

dn33:1.11.186 Atthāvuso, dakkhiṇā dāyakato visujjhati no paṭiggāhakato.

dn33:1.11.187 Atthāvuso, dakkhiṇā paṭiggāhakato visujjhati no dāyakato.

dn33:1.11.188 Atthāvuso, dakkhiṇā neva dāyakato visujjhati no paṭiggāhakato.

dn33:1.11.189 Atthāvuso, dakkhiṇā dāyakato ceva visujjhati paṭiggāhakato ca.

dn33:1.11.190 Cattāri saṅgahavatthūni—

dn33:1.11.191 dānaṁ, peyyavajjaṁ, atthacariyā, samānattatā.

dn33:1.11.192 Cattāro anariyavohārā—

dn33:1.11.193 musāvādo, pisuṇāvācā, pharusāvācā, samphappalāpo.

dn33:1.11.194 Cattāro ariyavohārā—

dn33:1.11.195 musāvādā veramaṇī, pisuṇāya vācāya veramaṇī, pharusāya vācāya veramaṇī, samphappalāpā veramaṇī.

dn33:1.11.196 Aparepi cattāro anariyavohārā—

dn33:1.11.197 adiṭṭhe diṭṭhavāditā, assute sutavāditā, amute mutavāditā, aviññāte viññātavāditā.

dn33:1.11.198 Aparepi cattāro ariyavohārā—

dn33:1.11.199 adiṭṭhe adiṭṭhavāditā, assute assutavāditā, amute amutavāditā, aviññāte aviññātavāditā.

dn33:1.11.200 Aparepi cattāro anariyavohārā—

dn33:1.11.201 diṭṭhe adiṭṭhavāditā, sute assutavāditā, mute amutavāditā, viññāte aviññātavāditā.

dn33:1.11.202 Aparepi cattāro ariyavohārā—

dn33:1.11.203 diṭṭhe diṭṭhavāditā, sute sutavāditā, mute mutavāditā, viññāte viññātavāditā.

dn33:1.11.204 Cattāro puggalā.

dn33:1.11.205 Idhāvuso, ekacco puggalo attantapo hoti attaparitāpanānuyogamanuyutto.

dn33:1.11.206 Idhāvuso, ekacco puggalo parantapo hoti paraparitāpanānuyogamanuyutto.

dn33:1.11.207 Idhāvuso, ekacco puggalo attantapo ca hoti attaparitāpanānuyogamanuyutto, parantapo ca paraparitāpanānuyogamanuyutto.

dn33:1.11.208 Idhāvuso, ekacco puggalo neva attantapo hoti na attaparitāpanānuyogamanuyutto na parantapo na paraparitāpanānuyogamanuyutto.

dn33:1.11.209 So anattantapo aparantapo diṭṭheva dhamme nicchāto nibbuto sītībhūto sukhappaṭisaṁvedī brahmabhūtena attanā viharati.

dn33:1.11.210 Aparepi cattāro puggalā.

dn33:1.11.211 Idhāvuso, ekacco puggalo attahitāya paṭipanno hoti no parahitāya.

dn33:1.11.212 Idhāvuso, ekacco puggalo parahitāya paṭipanno hoti no attahitāya.

dn33:1.11.213 Idhāvuso, ekacco puggalo neva attahitāya paṭipanno hoti no parahitāya.

dn33:1.11.214 Idhāvuso, ekacco puggalo attahitāya ceva paṭipanno hoti parahitāya ca.

dn33:1.11.215 Aparepi cattāro puggalā—

dn33:1.11.216 tamo tamaparāyano, tamo jotiparāyano, joti tamaparāyano, joti jotiparāyano.

dn33:1.11.217 Aparepi cattāro puggalā—

dn33:1.11.218 samaṇamacalo, samaṇapadumo, samaṇapuṇḍarīko, samaṇesu samaṇasukhumālo.

dn33:1.11.219 Ime kho, āvuso, tena bhagavatā jānatā passatā arahatā sammāsambuddhena cattāro dhammā sammadakkhātā;

dn33:1.11.220 tattha sabbeheva saṅgāyitabbaṁ …pe… atthāya hitāya sukhāya devamanussānaṁ.

dn33:1.11.221 Paṭhamabhāṇavāro niṭṭhito.