dn18:4.0 2. Ānandaparikathā
BAGIAN 4
dn18:4.1 Atha kho āyasmato ānandassa etadahosi:
dn18:4.2 “ime kho panāpi ahesuṁ māgadhakā paricārakā bahū ceva rattaññū ca abbhatītā kālaṅkatā.
dn18:4.3 Suññā maññe aṅgamagadhā aṅgamāgadhakehi paricārakehi abbhatītehi kālaṅkatehi.
dn18:4.4 Te kho panāpi ahesuṁ buddhe pasannā dhamme pasannā saṅghe pasannā sīlesu paripūrakārino.
dn18:4.5 Te abbhatītā kālaṅkatā bhagavatā abyākatā;
dn18:4.6 tesampissa sādhu veyyākaraṇaṁ, bahujano pasīdeyya, tato gaccheyya sugatiṁ.
dn18:4.7 Ayaṁ kho panāpi ahosi rājā māgadho seniyo bimbisāro dhammiko dhammarājā hito brāhmaṇagahapatikānaṁ negamānañceva jānapadānañca.
dn18:4.8 Apissudaṁ manussā kittayamānarūpā viharanti:
dn18:4.9 ‘evaṁ no so dhammiko dhammarājā sukhāpetvā kālaṅkato, evaṁ mayaṁ tassa dhammikassa dhammarañño vijite phāsu viharimhā’ti.
dn18:4.10 So kho panāpi ahosi buddhe pasanno dhamme pasanno saṅghe pasanno sīlesu paripūrakārī.
dn18:4.11 Apissudaṁ manussā evamāhaṁsu:
dn18:4.12 ‘yāva maraṇakālāpi rājā māgadho seniyo bimbisāro bhagavantaṁ kittayamānarūpo kālaṅkato’ti.
dn18:4.13 So abbhatīto kālaṅkato bhagavatā abyākato.
dn18:4.14 Tassapissa sādhu veyyākaraṇaṁ bahujano pasīdeyya, tato gaccheyya sugatiṁ.
dn18:4.15 Bhagavato kho pana sambodhi magadhesu.
dn18:4.16 Yattha kho pana bhagavato sambodhi magadhesu, kathaṁ tatra bhagavā māgadhake paricārake abbhatīte kālaṅkate upapattīsu na byākareyya.
dn18:4.17 Bhagavā ce kho pana māgadhake paricārake abbhatīte kālaṅkate upapattīsu na byākareyya, dīnamanā tenassu māgadhakā paricārakā;
dn18:4.18 yena kho panassu dīnamanā māgadhakā paricārakā kathaṁ te bhagavā na byākareyyā”ti?