Mātuposakasutta

sn7.19:1.1 Sāvatthinidānaṁ.

sn7.19:1.2 Atha kho mātuposako brāhmaṇo yena bhagavā tenupasaṅkami; upasaṅkamitvā bhagavatā saddhiṁ sammodi.

sn7.19:1.3 Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho mātuposako brāhmaṇo bhagavantaṁ etadavoca:

sn7.19:1.4 “ahañhi, bho gotama, dhammena bhikkhaṁ pariyesāmi, dhammena bhikkhaṁ pariyesitvā mātāpitaro posemi.

sn7.19:1.5 Kaccāhaṁ, bho gotama, evaṅkārī kiccakārī homī”ti?

sn7.19:1.6 “Taggha tvaṁ, brāhmaṇa, evaṅkārī kiccakārī hosi.

sn7.19:1.7 Yo kho, brāhmaṇa, dhammena bhikkhaṁ pariyesati, dhammena bhikkhaṁ pariyesitvā mātāpitaro poseti, bahuṁ so puññaṁ pasavatīti.