Maggasutta

sn51.21:1.1 Sāvatthinidānaṁ.

sn51.21:1.2 “Pubbeva me, bhikkhave, sambodhā anabhisambuddhassa bodhisattasseva sato etadahosi:

sn51.21:1.3 ‘ko nu kho maggo, kā paṭipadā iddhipādabhāvanāyā’ti?

sn51.21:1.4 Tassa mayhaṁ, bhikkhave, etadahosi:

sn51.21:1.5 ‘idha bhikkhu chandasamādhippadhānasaṅkhārasamannāgataṁ iddhipādaṁ bhāveti—

sn51.21:1.6 iti me chando na ca atilīno bhavissati, na ca atippaggahito bhavissati, na ca ajjhattaṁ saṅkhitto bhavissati, na ca bahiddhā vikkhitto bhavissati.

sn51.21:1.7 Pacchāpuresaññī ca viharati—

sn51.21:1.8 yathā pure tathā pacchā, yathā pacchā tathā pure;

sn51.21:1.9 yathā adho tathā uddhaṁ, yathā uddhaṁ tathā adho;

sn51.21:1.10 yathā divā tathā rattiṁ, yathā rattiṁ tathā divā.

sn51.21:1.11 Iti vivaṭena cetasā apariyonaddhena sappabhāsaṁ cittaṁ bhāveti.

sn51.21:1.12 Vīriyasamādhi …pe…

sn51.21:1.13 cittasamādhi …

sn51.21:1.14 vīmaṁsāsamādhippadhānasaṅkhārasamannāgataṁ iddhipādaṁ bhāveti—

sn51.21:1.15 iti me vīmaṁsā na ca atilīnā bhavissati, na ca atippaggahitā bhavissati, na ca ajjhattaṁ saṅkhittā bhavissati, na ca bahiddhā vikkhittā bhavissati.

sn51.21:1.16 Pacchāpuresaññī ca viharati—

sn51.21:1.17 yathā pure tathā pacchā, yathā pacchā tathā pure;

sn51.21:1.18 yathā adho tathā uddhaṁ, yathā uddhaṁ tathā adho;

sn51.21:1.19 yathā divā tathā rattiṁ yathā rattiṁ tathā divā’—

sn51.21:1.20 iti vivaṭena cetasā apariyonaddhena sappabhāsaṁ cittaṁ bhāveti.