Apārasutta

sn51.1:1.1 “Cattārome, bhikkhave, iddhipādā bhāvitā bahulīkatā apārā pāraṁ gamanāya saṁvattanti.

sn51.1:1.2 Katame cattāro?

sn51.1:1.3 Idha, bhikkhave, bhikkhu chandasamādhippadhānasaṅkhārasamannāgataṁ iddhipādaṁ bhāveti,

sn51.1:1.4 vīriyasamādhippadhānasaṅkhārasamannāgataṁ iddhipādaṁ bhāveti,

sn51.1:1.5 cittasamādhippadhānasaṅkhārasamannāgataṁ iddhipādaṁ bhāveti,

sn51.1:1.6 vīmaṁsāsamādhippadhānasaṅkhārasamannāgataṁ iddhipādaṁ bhāveti.

sn51.1:1.7 Ime kho, bhikkhave, cattāro iddhipādā bhāvitā bahulīkatā apārā pāraṁ gamanāya saṁvattantī”ti.

sn51.1:1.8 Paṭhamaṁ.