sn51.14:5.1 “Tena hi, bhikkhave, suṇātha.
BAGIAN 5
sn51.14:5.2 Catunnaṁ kho, bhikkhave, iddhipādānaṁ bhāvitattā bahulīkatattā moggallāno bhikkhu evaṁmahiddhiko evaṁmahānubhāvo.
sn51.14:5.3 Katamesaṁ catunnaṁ?
sn51.14:5.4 Idha, bhikkhave, moggallāno bhikkhu chandasamādhippadhānasaṅkhārasamannāgataṁ iddhipādaṁ bhāveti,
sn51.14:5.5 vīriyasamādhi …pe…
sn51.14:5.6 cittasamādhi …
sn51.14:5.7 vīmaṁsāsamādhippadhānasaṅkhārasamannāgataṁ iddhipādaṁ bhāveti—
sn51.14:5.8 iti me vīmaṁsā na ca atilīnā bhavissati, na ca atippaggahitā bhavissati;
sn51.14:5.9 na ca ajjhattaṁ saṅkhittā bhavissati, na ca bahiddhā vikkhittā bhavissati.
sn51.14:5.10 Pacchāpuresaññī ca viharati—
sn51.14:5.11 yathā pure tathā pacchā, yathā pacchā tathā pure;
sn51.14:5.12 yathā adho tathā uddhaṁ, yathā uddhaṁ tathā adho;
sn51.14:5.13 yathā divā tathā rattiṁ, yathā rattiṁ tathā divā.
sn51.14:5.14 Iti vivaṭena cetasā apariyonaddhena sappabhāsaṁ cittaṁ bhāveti.
sn51.14:5.15 Imesaṁ kho, bhikkhave, catunnaṁ iddhipādānaṁ bhāvitattā bahulīkatattā moggallāno bhikkhu evaṁmahiddhiko evaṁmahānubhāvo.
sn51.14:5.16 Imesañca pana, bhikkhave, catunnaṁ iddhipādānaṁ bhāvitattā bahulīkatattā moggallāno bhikkhu anekavihitaṁ iddhividhaṁ paccanubhoti …pe… yāva brahmalokāpi kāyena vasaṁ vatteti …pe…
sn51.14:5.17 imesañca pana, bhikkhave, catunnaṁ iddhipādānaṁ bhāvitattā bahulīkatattā moggallāno bhikkhu āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharatī”ti.
sn51.14:5.18 Catutthaṁ.