Patiṭṭhitasutta

sn48.56:1.1 “Ekadhamme patiṭṭhitassa, bhikkhave, bhikkhuno pañcindriyāni bhāvitāni honti subhāvitāni.

sn48.56:1.2 Katamasmiṁ ekadhamme?

sn48.56:1.3 Appamāde.

sn48.56:1.4 Katamo ca bhikkhave, appamādo?

sn48.56:1.5 Idha, bhikkhave, bhikkhu cittaṁ rakkhati āsavesu ca sāsavesu ca dhammesu.

sn48.56:1.6 Tassa cittaṁ rakkhato āsavesu ca sāsavesu ca dhammesu saddhindriyampi bhāvanāpāripūriṁ gacchati.

sn48.56:1.7 Vīriyindriyampi bhāvanāpāripūriṁ gacchati.

sn48.56:1.8 Satindriyampi bhāvanāpāripūriṁ gacchati.

sn48.56:1.9 Samādhindriyampi bhāvanāpāripūriṁ gacchati.

sn48.56:1.10 Paññindriyampi bhāvanāpāripūriṁ gacchati.

sn48.56:1.11 Evampi kho, bhikkhave, ekadhamme patiṭṭhitassa bhikkhuno pañcindriyāni bhāvitāni honti subhāvitānī”ti.

sn48.56:1.12 Chaṭṭhaṁ.