Sotāpannasutta

sn48.32:1.1 “Pañcimāni, bhikkhave, indriyāni.

sn48.32:1.2 Katamāni pañca?

sn48.32:1.3 Sukhindriyaṁ, dukkhindriyaṁ, somanassindriyaṁ, domanassindriyaṁ, upekkhindriyaṁ.

sn48.32:1.4 Yato kho, bhikkhave, ariyasāvako imesaṁ pañcannaṁ indriyānaṁ samudayañca atthaṅgamañca assādañca ādīnavañca nissaraṇañca yathābhūtaṁ pajānāti—

sn48.32:1.5 ayaṁ vuccati, bhikkhave, ariyasāvako sotāpanno avinipātadhammo niyato sambodhiparāyaṇo”ti.

sn48.32:1.6 Dutiyaṁ.