Nālandasutta

sn47.12:1.1 Ekaṁ samayaṁ bhagavā nālandāyaṁ viharati pāvārikambavane.

sn47.12:1.2 Atha kho āyasmā sāriputto yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā sāriputto bhagavantaṁ etadavoca:

sn47.12:1.3 “evaṁpasanno ahaṁ, bhante, bhagavati.

sn47.12:1.4 Na cāhu, na ca bhavissati, na cetarahi vijjati añño samaṇo vā brāhmaṇo vā bhagavatā bhiyyobhiññataro, yadidaṁ—sambodhiyan”ti.

sn47.12:1.5 “Uḷārā kho tyāyaṁ, sāriputta, āsabhī vācā bhāsitā, ekaṁso gahito, sīhanādo nadito:

sn47.12:1.6 ‘evaṁpasanno ahaṁ, bhante, bhagavati.

sn47.12:1.7 Na cāhu, na ca bhavissati na cetarahi vijjati añño samaṇo vā brāhmaṇo vā bhagavatā bhiyyobhiññataro, yadidaṁ—sambodhiyan’ti.