Anupādāparinibbānasutta

sn45.48:1.1 Sāvatthinidānaṁ.

sn45.48:1.2 “Sace vo, bhikkhave, aññatitthiyā paribbājakā evaṁ puccheyyuṁ:

sn45.48:1.3 ‘kimatthiyaṁ, āvuso, samaṇe gotame brahmacariyaṁ vussatī’ti, evaṁ puṭṭhā tumhe, bhikkhave, tesaṁ aññatitthiyānaṁ paribbājakānaṁ evaṁ byākareyyātha:

sn45.48:1.4 ‘anupādāparinibbānatthaṁ kho, āvuso, bhagavati brahmacariyaṁ vussatī’ti.

sn45.48:1.5 Sace pana vo, bhikkhave, aññatitthiyā paribbājakā evaṁ puccheyyuṁ:

sn45.48:1.6 ‘atthi panāvuso, maggo, atthi paṭipadā anupādāparinibbānāyā’ti, evaṁ puṭṭhā tumhe, bhikkhave, tesaṁ aññatitthiyānaṁ paribbājakānaṁ evaṁ byākareyyātha:

sn45.48:1.7 ‘atthi kho, āvuso, maggo, atthi paṭipadā anupādāparinibbānāyā’ti.

sn45.48:1.8 Katamo ca, bhikkhave, maggo, katamā ca paṭipadā anupādāparinibbānāya?

sn45.48:1.9 Ayameva ariyo aṭṭhaṅgiko maggo, seyyathidaṁ—

sn45.48:1.10 sammādiṭṭhi …pe… sammāsamādhi.

sn45.48:1.11 Ayaṁ, bhikkhave, maggo, ayaṁ paṭipadā anupādāparinibbānāyāti.

sn45.48:1.12 Evaṁ puṭṭhā tumhe, bhikkhave, tesaṁ aññatitthiyānaṁ paribbājakānaṁ evaṁ byākareyyāthā”ti.

sn45.48:1.13 Aṭṭhamaṁ.

sn45.48:1.14 Aññatitthiyapeyyālaṁ.