Nadīsutta

sn45.160:1.1 “Seyyathāpi, bhikkhave, gaṅgā nadī pācīnaninnā pācīnapoṇā pācīnapabbhārā.

sn45.160:1.2 Atha mahājanakāyo āgaccheyya kuddālapiṭakaṁ ādāya:

sn45.160:1.3 ‘mayaṁ imaṁ gaṅgaṁ nadiṁ pacchāninnaṁ karissāma pacchāpoṇaṁ pacchāpabbhāran’ti.

sn45.160:1.4 Taṁ kiṁ maññatha, bhikkhave,

sn45.160:1.5 api nu so mahājanakāyo gaṅgaṁ nadiṁ pacchāninnaṁ kareyya pacchāpoṇaṁ pacchāpabbhāran”ti?

sn45.160:1.6 “No hetaṁ, bhante”.

sn45.160:1.7 “Taṁ kissa hetu”?

sn45.160:1.8 “Gaṅgā, bhante, nadī pācīnaninnā pācīnapoṇā pācīnapabbhārā.

sn45.160:1.9 Sā na sukarā pacchāninnaṁ kātuṁ pacchāpoṇaṁ pacchāpabbhāraṁ.

sn45.160:1.10 Yāvadeva pana so mahājanakāyo kilamathassa vighātassa bhāgī assā”ti.

sn45.160:1.11 “Evameva kho, bhikkhave, bhikkhuṁ ariyaṁ aṭṭhaṅgikaṁ maggaṁ bhāventaṁ ariyaṁ aṭṭhaṅgikaṁ maggaṁ bahulīkarontaṁ rājāno vā rājamahāmattā vā mittā vā amaccā vā ñātī vā ñātisālohitā vā bhogehi abhihaṭṭhuṁ pavāreyyuṁ:

sn45.160:1.12 ‘ehambho purisa, kiṁ te ime kāsāvā anudahanti,

sn45.160:1.13 kiṁ muṇḍo kapālamanusaṁcarasi.

sn45.160:1.14 Ehi, hīnāyāvattitvā bhoge ca bhuñjassu, puññāni ca karohī’ti.

sn45.160:1.15 So vata, bhikkhave, bhikkhu ariyaṁ aṭṭhaṅgikaṁ maggaṁ bhāvento ariyaṁ aṭṭhaṅgikaṁ maggaṁ bahulīkaronto sikkhaṁ paccakkhāya hīnāyāvattissatīti—netaṁ ṭhānaṁ vijjati.

sn45.160:1.16 Taṁ kissa hetu?

sn45.160:1.17 Yañhi taṁ, bhikkhave, cittaṁ dīgharattaṁ vivekaninnaṁ vivekapoṇaṁ vivekapabbhāraṁ taṁ vata hīnāyāvattissatīti—netaṁ ṭhānaṁ vijjati.

sn45.160:1.18 Kathañca, bhikkhave, bhikkhu ariyaṁ aṭṭhaṅgikaṁ maggaṁ bhāveti ariyaṁ aṭṭhaṅgikaṁ maggaṁ bahulīkaroti?

sn45.160:1.19 Idha, bhikkhave, bhikkhu sammādiṭṭhiṁ bhāveti vivekanissitaṁ …pe… sammāsamādhiṁ bhāveti vivekanissitaṁ virāganissitaṁ nirodhanissitaṁ vossaggapariṇāmiṁ …

sn45.160:1.20 evaṁ kho, bhikkhave, bhikkhu ariyaṁ aṭṭhaṅgikaṁ maggaṁ bhāveti, ariyaṁ aṭṭhaṅgikaṁ maggaṁ bahulīkarotī”ti.

sn45.160:1.21 (Yadapi balakaraṇīyaṁ, tadapi vitthāretabbaṁ.)

sn45.160:1.22 Dvādasamaṁ.

sn45.160:1.23 Balakaraṇīyavaggo chaṭṭho.