Dutiyaisidattasutta

sn41.3:4.1 Tena kho pana samayena āyasmā isidatto tasmiṁ bhikkhusaṅghe sabbanavako hoti.

sn41.3:4.2 Atha kho āyasmā isidatto āyasmantaṁ theraṁ etadavoca:

sn41.3:4.3 “byākaromahaṁ, bhante thera, cittassa gahapatino etaṁ pañhan”ti?

sn41.3:4.4 “Byākarohi tvaṁ, āvuso isidatta, cittassa gahapatino etaṁ pañhan”ti.

sn41.3:4.5 “Evañhi tvaṁ, gahapati, pucchasi:

sn41.3:4.6 ‘yā imā, bhante thera, anekavihitā diṭṭhiyo loke uppajjanti—

sn41.3:4.7 sassato lokoti vā …pe…;

sn41.3:4.8 imā nu kho, bhante, diṭṭhiyo kismiṁ sati honti, kismiṁ asati na hontī’”ti?

sn41.3:4.9 “Evaṁ, bhante”.

sn41.3:4.10 “Yā imā, gahapati, anekavihitā diṭṭhiyo loke uppajjanti:

sn41.3:4.11 ‘sassato lokoti vā, asassato lokoti vā, antavā lokoti vā anantavā lokoti vā, taṁ jīvaṁ taṁ sarīranti vā, aññaṁ jīvaṁ aññaṁ sarīranti vā, hoti tathāgato paraṁ maraṇāti vā, na hoti tathāgato paraṁ maraṇāti vā, hoti ca na ca hoti tathāgato paraṁ maraṇāti vā, neva hoti na na hoti tathāgato paraṁ maraṇāti vā.

sn41.3:4.12 Yāni cimāni dvāsaṭṭhi diṭṭhigatāni brahmajāle bhaṇitāni;

sn41.3:4.13 imā kho, gahapati, diṭṭhiyo sakkāyadiṭṭhiyā sati honti, sakkāyadiṭṭhiyā asati na hontī’”ti.