Paramassāsappattasutta

sn38.6:1.1 “‘Paramassāsappatto, paramassāsappatto’ti, āvuso sāriputta, vuccati.

sn38.6:1.2 Kittāvatā nu kho, āvuso, paramassāsappatto hotī”ti?

sn38.6:1.3 “Yato kho, āvuso, bhikkhu channaṁ phassāyatanānaṁ samudayañca atthaṅgamañca assādañca ādīnavañca nissaraṇañca yathābhūtaṁ viditvā anupādāvimutto hoti, ettāvatā kho, āvuso, paramassāsappatto hotī”ti.

sn38.6:1.4 “Atthi panāvuso, maggo atthi paṭipadā, etassa paramassāsassa sacchikiriyāyā”ti?

sn38.6:1.5 “Atthi kho, āvuso, maggo atthi paṭipadā, etassa paramassāsassa sacchikiriyāyā”ti.

sn38.6:1.6 “Katamo pana, āvuso, maggo katamā paṭipadā, etassa paramassāsassa sacchikiriyāyā”ti?

sn38.6:1.7 “Ayameva kho, āvuso, ariyo aṭṭhaṅgiko maggo etassa paramassāsassa sacchikiriyāya, seyyathidaṁ—

sn38.6:1.8 sammādiṭṭhi …pe… sammāsamādhi.

sn38.6:1.9 Ayaṁ kho, āvuso, maggo ayaṁ paṭipadā, etassa paramassāsassa sacchikiriyāyā”ti.

sn38.6:1.10 “Bhaddako, āvuso, maggo bhaddikā paṭipadā, etassa paramassāsassa sacchikiriyāya.

sn38.6:1.11 Alañca panāvuso sāriputta, appamādāyā”ti.

sn38.6:1.12 Chaṭṭhaṁ.