sn37.3:1.1 “Pañcimāni, bhikkhave, mātugāmassa āveṇikāni dukkhāni, yāni mātugāmo paccanubhoti, aññatreva purisehi.
BAGIAN 1
sn37.3:1.2 Katamāni pañca?
sn37.3:1.3 Idha, bhikkhave, mātugāmo daharova samāno patikulaṁ gacchati, ñātakehi vinā hoti.
sn37.3:1.4 Idaṁ, bhikkhave, mātugāmassa paṭhamaṁ āveṇikaṁ dukkhaṁ, yaṁ mātugāmo paccanubhoti, aññatreva purisehi.
sn37.3:1.5 Puna caparaṁ, bhikkhave, mātugāmo utunī hoti.
sn37.3:1.6 Idaṁ, bhikkhave, mātugāmassa dutiyaṁ āveṇikaṁ dukkhaṁ, yaṁ mātugāmo paccanubhoti, aññatreva purisehi.
sn37.3:1.7 Puna caparaṁ, bhikkhave, mātugāmo gabbhinī hoti.
sn37.3:1.8 Idaṁ, bhikkhave, mātugāmassa tatiyaṁ āveṇikaṁ dukkhaṁ, yaṁ mātugāmo paccanubhoti, aññatreva purisehi.
sn37.3:1.9 Puna caparaṁ, bhikkhave, mātugāmo vijāyati.
sn37.3:1.10 Idaṁ, bhikkhave, mātugāmassa catutthaṁ āveṇikaṁ dukkhaṁ, yaṁ mātugāmo paccanubhoti, aññatreva purisehi.
sn37.3:1.11 Puna caparaṁ, bhikkhave, mātugāmo purisassa pāricariyaṁ upeti.
sn37.3:1.12 Idaṁ kho, bhikkhave, mātugāmassa pañcamaṁ āveṇikaṁ dukkhaṁ, yaṁ mātugāmo paccanubhoti, aññatreva purisehi.
sn37.3:1.13 Imāni kho, bhikkhave, pañca mātugāmassa āveṇikāni dukkhāni, yāni mātugāmo paccanubhoti, aññatreva purisehī”ti.
sn37.3:1.14 Tatiyaṁ.