Ṭhānasutta

sn37.32:2.1 Pañcimāni, bhikkhave, ṭhānāni sulabhāni katapuññena mātugāmena.

sn37.32:2.2 Katamāni pañca?

sn37.32:2.3 Patirūpe kule jāyeyyanti—

sn37.32:2.4 idaṁ, bhikkhave, paṭhamaṁ ṭhānaṁ sulabhaṁ katapuññena mātugāmena.

sn37.32:2.5 Patirūpe kule jāyitvā patirūpaṁ kulaṁ gaccheyyanti—

sn37.32:2.6 idaṁ, bhikkhave, dutiyaṁ ṭhānaṁ sulabhaṁ katapuññena mātugāmena.

sn37.32:2.7 Patirūpe kule jāyitvā patirūpaṁ kulaṁ gantvā asapatti agāraṁ ajjhāvaseyyanti—

sn37.32:2.8 idaṁ, bhikkhave, tatiyaṁ ṭhānaṁ sulabhaṁ katapuññena mātugāmena.

sn37.32:2.9 Patirūpe kule jāyitvā patirūpaṁ kulaṁ gantvā asapatti agāraṁ ajjhāvasantī puttavatī assanti—

sn37.32:2.10 idaṁ, bhikkhave, catutthaṁ ṭhānaṁ sulabhaṁ katapuññena mātugāmena.

sn37.32:2.11 Patirūpe kule jāyitvā patirūpaṁ kulaṁ gantvā asapatti agāraṁ ajjhāvasantī puttavatī samānā sāmikaṁ abhibhuyya vatteyyanti—

sn37.32:2.12 idaṁ, bhikkhave, pañcamaṁ ṭhānaṁ sulabhaṁ katapuññena mātugāmena.

sn37.32:2.13 Imāni kho, bhikkhave, pañca ṭhānāni sulabhāni katapuññena mātugāmenā”ti.

sn37.32:2.14 Aṭṭhamaṁ.