Aṅgasutta

sn37.29:1.1 “Pañcimāni, bhikkhave, mātugāmassa balāni.

sn37.29:1.2 Katamāni pañca?

sn37.29:1.3 Rūpabalaṁ, bhogabalaṁ, ñātibalaṁ, puttabalaṁ, sīlabalaṁ.

sn37.29:1.4 Rūpabalena ca, bhikkhave, mātugāmo samannāgato hoti, na ca bhogabalena—

sn37.29:1.5 evaṁ so tenaṅgena aparipūro hoti.

sn37.29:1.6 Yato ca kho, bhikkhave, mātugāmo rūpabalena ca samannāgato hoti, bhogabalena ca—

sn37.29:1.7 evaṁ so tenaṅgena paripūro hoti.

sn37.29:1.8 Rūpabalena ca, bhikkhave, mātugāmo samannāgato hoti, bhogabalena ca, na ca ñātibalena—

sn37.29:1.9 evaṁ so tenaṅgena aparipūro hoti.

sn37.29:1.10 Yato ca kho, bhikkhave, mātugāmo rūpabalena ca samannāgato hoti, bhogabalena ca, ñātibalena ca—

sn37.29:1.11 evaṁ so tenaṅgena paripūro hoti.

sn37.29:1.12 Rūpabalena ca, bhikkhave, mātugāmo samannāgato hoti, bhogabalena ca, ñātibalena ca, na ca puttabalena—

sn37.29:1.13 evaṁ so tenaṅgena aparipūro hoti.

sn37.29:1.14 Yato ca kho, bhikkhave, mātugāmo rūpabalena ca samannāgato hoti, bhogabalena ca, ñātibalena ca, puttabalena ca—

sn37.29:1.15 evaṁ so tenaṅgena paripūro hoti.

sn37.29:1.16 Rūpabalena ca, bhikkhave, mātugāmo samannāgato hoti, bhogabalena ca, ñātibalena ca, puttabalena ca, na ca sīlabalena—

sn37.29:1.17 evaṁ so tenaṅgena aparipūro hoti.

sn37.29:1.18 Yato ca kho, bhikkhave, mātugāmo rūpabalena ca samannāgato hoti, bhogabalena ca, ñātibalena ca, puttabalena ca, sīlabalena ca—

sn37.29:1.19 evaṁ so tenaṅgena paripūro hoti.

sn37.29:1.20 Imāni kho, bhikkhave, pañca mātugāmassa balānī”ti.

sn37.29:1.21 Pañcamaṁ.