Sallasutta

sn36.6:3.1 Seyyathāpi, bhikkhave, purisaṁ sallena vijjheyya.

sn36.6:3.2 Tamenaṁ dutiyena sallena anuvedhaṁ na vijjheyya.

sn36.6:3.3 Evañhi so, bhikkhave, puriso ekasallena vedanaṁ vedayati.

sn36.6:3.4 Evameva kho, bhikkhave, sutavā ariyasāvako dukkhāya vedanāya phuṭṭho samāno na socati, na kilamati, na paridevati, na urattāḷiṁ kandati, na sammohaṁ āpajjati.

sn36.6:3.5 So ekaṁ vedanaṁ vedayati—

sn36.6:3.6 kāyikaṁ, na cetasikaṁ.

sn36.6:3.7 Tassāyeva kho pana dukkhāya vedanāya phuṭṭho samāno paṭighavā na hoti.

sn36.6:3.8 Tamenaṁ dukkhāya vedanāya appaṭighavantaṁ, yo dukkhāya vedanāya paṭighānusayo, so nānuseti.

sn36.6:3.9 So dukkhāya vedanāya phuṭṭho samāno kāmasukhaṁ nābhinandati.

sn36.6:3.10 Taṁ kissa hetu?

sn36.6:3.11 Pajānāti hi so, bhikkhave, sutavā ariyasāvako aññatra kāmasukhā dukkhāya vedanāya nissaraṇaṁ.

sn36.6:3.12 Tassa kāmasukhaṁ nābhinandato yo sukhāya vedanāya rāgānusayo, so nānuseti.

sn36.6:3.13 So tāsaṁ vedanānaṁ samudayañca atthaṅgamañca assādañca ādīnavaṁ ca nissaraṇañca yathābhūtaṁ pajānāti.

sn36.6:3.14 Tassa tāsaṁ vedanānaṁ samudayañca atthaṅgamañca assādañca ādīnavañca nissaraṇañca yathābhūtaṁ pajānato, yo adukkhamasukhāya vedanāya avijjānusayo, so nānuseti.

sn36.6:3.15 So sukhañce vedanaṁ vedayati, visaññutto naṁ vedayati.

sn36.6:3.16 Dukkhañce vedanaṁ vedayati, visaññutto naṁ vedayati.

sn36.6:3.17 Adukkhamasukhañce vedanaṁ vedayati, visaññutto naṁ vedayati.

sn36.6:3.18 Ayaṁ vuccati, bhikkhave, ‘sutavā ariyasāvako visaññutto jātiyā jarāya maraṇena sokehi paridevehi dukkhehi domanassehi upāyāsehi, visaññutto dukkhasmā’ti vadāmi.

sn36.6:3.19 Ayaṁ kho, bhikkhave, viseso, ayaṁ adhippayāso, idaṁ nānākaraṇaṁ sutavato ariyasāvakassa assutavatā puthujjanenāti.