sn36.15:1.1 Atha kho āyasmā ānando yena bhagavā tenupasaṅkami; upasaṅkamitvā ekamantaṁ nisīdi, ekamantaṁ nisinno kho āyasmā ānando bhagavantaṁ etadavoca:
BAGIAN 1
sn36.15:1.2 “katamā nu kho, bhante, vedanā, katamo vedanāsamudayo, katamo vedanānirodho, katamā vedanānirodhagāminī paṭipadā?
sn36.15:1.3 Ko vedanāya assādo, ko ādīnavo, kiṁ nissaraṇan”ti?
sn36.15:1.4 “Tisso imā, ānanda, vedanā—
sn36.15:1.5 sukhā vedanā, dukkhā vedanā, adukkhamasukhā vedanā—
sn36.15:1.6 imā vuccanti, ānanda, vedanā.
sn36.15:1.7 Phassasamudayā vedanāsamudayo;
sn36.15:1.8 phassanirodhā vedanānirodho.
sn36.15:1.9 Ayameva ariyo aṭṭhaṅgiko maggo vedanānirodhagāminī paṭipadā, seyyathidaṁ—
sn36.15:1.10 sammādiṭṭhi …pe… sammāsamādhi.
sn36.15:1.11 Yaṁ vedanaṁ paṭicca uppajjati sukhaṁ somanassaṁ, ayaṁ vedanāya assādo.
sn36.15:1.12 Yaṁ vedanā aniccā dukkhā vipariṇāmadhammā, ayaṁ vedanāya ādīnavo.
sn36.15:1.13 Yo vedanāya chandarāgavinayo chandarāgappahānaṁ, idaṁ vedanāya nissaraṇaṁ.
sn36.15:1.14 Atha kho panānanda, mayā anupubbasaṅkhārānaṁ nirodho akkhāto.
sn36.15:1.15 Paṭhamaṁ jhānaṁ samāpannassa vācā niruddhā hoti …pe…
sn36.15:1.16 saññāvedayitanirodhaṁ samāpannassa saññā ca vedanā ca niruddhā honti.
sn36.15:1.17 Khīṇāsavassa bhikkhuno rāgo niruddho hoti, doso niruddho hoti, moho niruddho hoti.
sn36.15:1.18 Atha kho panānanda, mayā anupubbasaṅkhārānaṁ vūpasamo akkhāto.
sn36.15:1.19 Paṭhamaṁ jhānaṁ samāpannassa vācā vūpasantā hoti …pe…
sn36.15:1.20 saññāvedayitanirodhaṁ samāpannassa saññā ca vedanā ca vūpasantā honti.
sn36.15:1.21 Khīṇāsavassa bhikkhuno rāgo vūpasanto hoti, doso vūpasanto hoti, moho vūpasanto hoti.
sn36.15:1.22 Atha kho panānanda, mayā anupubbasaṅkhārānaṁ paṭippassaddhi akkhātā.
sn36.15:1.23 Paṭhamaṁ jhānaṁ samāpannassa vācā paṭippassaddhā hoti …pe…
sn36.15:1.24 ākāsānañcāyatanaṁ samāpannassa rūpasaññā paṭippassaddhā hoti.
sn36.15:1.25 Viññāṇañcāyatanaṁ samāpannassa ākāsānañcāyatanasaññā paṭippassaddhā hoti.
sn36.15:1.26 Ākiñcaññāyatanaṁ samāpannassa viññāṇañcāyatanasaññā paṭippassaddhā hoti.
sn36.15:1.27 Nevasaññānāsaññāyatanaṁ samāpannassa ākiñcaññāyatanasaññā paṭippassaddhā hoti.
sn36.15:1.28 Saññāvedayitanirodhaṁ samāpannassa saññā ca vedanā ca paṭippassaddhā honti.
sn36.15:1.29 Khīṇāsavassa bhikkhuno rāgo paṭippassaddho hoti, doso paṭippassaddho hoti, moho paṭippassaddho hotī”ti.
sn36.15:1.30 Pañcamaṁ.