Dutiyadvayasutta

sn35.93:2.1 Jivhañca paṭicca rase ca uppajjati jivhāviññāṇaṁ.

sn35.93:2.2 Jivhā aniccā vipariṇāmī aññathābhāvī.

sn35.93:2.3 Rasā aniccā vipariṇāmino aññathābhāvino.

sn35.93:2.4 Itthetaṁ dvayaṁ calañceva byathañca aniccaṁ vipariṇāmi aññathābhāvi.

sn35.93:2.5 Jivhāviññāṇaṁ aniccaṁ vipariṇāmi aññathābhāvi.

sn35.93:2.6 Yopi hetu yopi paccayo jivhāviññāṇassa uppādāya, sopi hetu sopi paccayo anicco vipariṇāmī aññathābhāvī.

sn35.93:2.7 Aniccaṁ kho pana, bhikkhave, paccayaṁ paṭicca uppannaṁ jivhāviññāṇaṁ, kuto niccaṁ bhavissati.

sn35.93:2.8 Yā kho, bhikkhave, imesaṁ tiṇṇaṁ dhammānaṁ saṅgati sannipāto samavāyo, ayaṁ vuccati jivhāsamphasso.

sn35.93:2.9 Jivhāsamphassopi anicco vipariṇāmī aññathābhāvī.

sn35.93:2.10 Yopi hetu yopi paccayo jivhāsamphassassa uppādāya, sopi hetu sopi paccayo anicco vipariṇāmī aññathābhāvī.

sn35.93:2.11 Aniccaṁ kho pana, bhikkhave, paccayaṁ paṭicca uppanno jivhāsamphasso, kuto nicco bhavissati.

sn35.93:2.12 Phuṭṭho, bhikkhave, vedeti, phuṭṭho ceteti, phuṭṭho sañjānāti.

sn35.93:2.13 Itthetepi dhammā calā ceva byathā ca aniccā vipariṇāmino aññathābhāvino …pe…