sn35.63:2.1 “Santi kho, migajāla, cakkhuviññeyyā rūpā iṭṭhā kantā manāpā piyarūpā kāmūpasaṁhitā rajanīyā.
BAGIAN 2
sn35.63:2.2 Tañce bhikkhu abhinandati abhivadati ajjhosāya tiṭṭhati.
sn35.63:2.3 Tassa taṁ abhinandato abhivadato ajjhosāya tiṭṭhato uppajjati nandī.
sn35.63:2.4 Nandiyā sati sārāgo hoti;
sn35.63:2.5 sārāge sati saṁyogo hoti.
sn35.63:2.6 Nandisaṁyojanasaṁyutto kho, migajāla, bhikkhu sadutiyavihārīti vuccati.
sn35.63:2.7 …pe…
sn35.63:2.8 Santi kho, migajāla, jivhāviññeyyā rasā iṭṭhā kantā manāpā piyarūpā kāmūpasaṁhitā rajanīyā.
sn35.63:2.9 Tañce bhikkhu abhinandati abhivadati ajjhosāya tiṭṭhati.
sn35.63:2.10 Tassa taṁ abhinandato abhivadato ajjhosāya tiṭṭhato uppajjati nandī.
sn35.63:2.11 Nandiyā sati sārāgo hoti;
sn35.63:2.12 sārāge sati saṁyogo hoti.
sn35.63:2.13 Nandisaṁyojanasaṁyutto kho, migajāla, bhikkhu sadutiyavihārīti vuccati.
sn35.63:2.14 Evaṁvihārī ca, migajāla, bhikkhu kiñcāpi araññavanapatthāni pantāni senāsanāni paṭisevati appasaddāni appanigghosāni vijanavātāni manussarāhasseyyakāni paṭisallānasāruppāni;
sn35.63:2.15 atha kho sadutiyavihārīti vuccati.
sn35.63:2.16 Taṁ kissa hetu?
sn35.63:2.17 Taṇhā hissa dutiyā, sāssa appahīnā.
sn35.63:2.18 Tasmā ‘sadutiyavihārī’ti vuccati.