sn35.31:1.1 “Sabbamaññitasamugghātasappāyaṁ vo, bhikkhave, paṭipadaṁ desessāmi.
BAGIAN 1
sn35.31:1.2 Taṁ suṇātha.
sn35.31:1.3 Katamā ca sā, bhikkhave, sabbamaññitasamugghātasappāyā paṭipadā?
sn35.31:1.4 Idha, bhikkhave, bhikkhu cakkhuṁ na maññati, cakkhusmiṁ na maññati, cakkhuto na maññati, cakkhuṁ meti na maññati.
sn35.31:1.5 Rūpe na maññati …pe…
sn35.31:1.6 cakkhuviññāṇaṁ na maññati, cakkhusamphassaṁ na maññati, yampidaṁ cakkhusamphassapaccayā uppajjati vedayitaṁ sukhaṁ vā dukkhaṁ vā adukkhamasukhaṁ vā tampi na maññati, tasmimpi na maññati, tatopi na maññati, taṁ meti na maññati.
sn35.31:1.7 Yañhi, bhikkhave, maññati, yasmiṁ maññati, yato maññati, yaṁ meti maññati, tato taṁ hoti aññathā.
sn35.31:1.8 Aññathābhāvī bhavasatto loko bhavamevābhinandati …pe…
sn35.31:1.9 jivhaṁ na maññati, jivhāya na maññati, jivhāto na maññati, jivhā meti na maññati.
sn35.31:1.10 Rase na maññati …pe…
sn35.31:1.11 jivhāviññāṇaṁ na maññati, jivhāsamphassaṁ na maññati.
sn35.31:1.12 Yampidaṁ jivhāsamphassapaccayā uppajjati vedayitaṁ sukhaṁ vā dukkhaṁ vā adukkhamasukhaṁ vā tampi na maññati, tasmimpi na maññati, tatopi na maññati, taṁ meti na maññati.
sn35.31:1.13 Yañhi, bhikkhave, maññati, yasmiṁ maññati, yato maññati, yaṁ meti maññati, tato taṁ hoti aññathā.
sn35.31:1.14 Aññathābhāvī bhavasatto loko bhavamevābhinandati …pe…
sn35.31:1.15 manaṁ na maññati, manasmiṁ na maññati, manato na maññati, mano meti na maññati.
sn35.31:1.16 Dhamme na maññati …pe…
sn35.31:1.17 manoviññāṇaṁ na maññati, manosamphassaṁ na maññati.
sn35.31:1.18 Yampidaṁ manosamphassapaccayā uppajjati vedayitaṁ sukhaṁ vā dukkhaṁ vā adukkhamasukhaṁ vā tampi na maññati, tasmimpi na maññati, tatopi na maññati, taṁ meti na maññati.
sn35.31:1.19 Yañhi, bhikkhave, maññati, yasmiṁ maññati, yato maññati, yaṁ meti maññati, tato taṁ hoti aññathā.
sn35.31:1.20 Aññathābhāvī bhavasatto loko bhavamevābhinandati.
sn35.31:1.21 Yāvatā, bhikkhave, khandhadhātuāyatanaṁ tampi na maññati, tasmimpi na maññati, tatopi na maññati, taṁ meti na maññati.
sn35.31:1.22 So evaṁ amaññamāno na ca kiñci loke upādiyati.
sn35.31:1.23 Anupādiyaṁ na paritassati. Aparitassaṁ paccattaññeva parinibbāyati.
sn35.31:1.24 ‘Khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyā’ti pajānāti.
sn35.31:1.25 Ayaṁ kho sā, bhikkhave, sabbamaññitasamugghātasappāyā paṭipadā”ti.
sn35.31:1.26 Navamaṁ.