sn35.30:1.1 “Sabbamaññitasamugghātasāruppaṁ vo, bhikkhave, paṭipadaṁ desessāmi.
BAGIAN 1
sn35.30:1.2 Taṁ suṇātha, sādhukaṁ manasi karotha, bhāsissāmīti.
sn35.30:1.3 Katamā ca sā, bhikkhave, sabbamaññitasamugghātasāruppā paṭipadā?
sn35.30:1.4 Idha, bhikkhave, bhikkhu cakkhuṁ na maññati, cakkhusmiṁ na maññati, cakkhuto na maññati, cakkhuṁ meti na maññati.
sn35.30:1.5 Rūpe na maññati, rūpesu na maññati, rūpato na maññati, rūpā meti na maññati.
sn35.30:1.6 Cakkhuviññāṇaṁ na maññati, cakkhuviññāṇasmiṁ na maññati, cakkhuviññāṇato na maññati, cakkhuviññāṇaṁ meti na maññati.
sn35.30:1.7 Cakkhusamphassaṁ na maññati, cakkhusamphassasmiṁ na maññati, cakkhusamphassato na maññati, cakkhusamphasso meti na maññati.
sn35.30:1.8 Yampidaṁ cakkhusamphassapaccayā uppajjati vedayitaṁ sukhaṁ vā dukkhaṁ vā adukkhamasukhaṁ vā tampi na maññati, tasmimpi na maññati, tatopi na maññati, taṁ meti na maññati …pe…
sn35.30:1.9 jivhaṁ na maññati, jivhāya na maññati, jivhāto na maññati, jivhā meti na maññati.
sn35.30:1.10 Rase na maññati, rasesu na maññati, rasato na maññati, rasā meti na maññati.
sn35.30:1.11 Jivhāviññāṇaṁ na maññati, jivhāviññāṇasmiṁ na maññati, jivhāviññāṇato na maññati, jivhāviññāṇaṁ meti na maññati.
sn35.30:1.12 Jivhāsamphassaṁ na maññati, jivhāsamphassasmiṁ na maññati, jivhāsamphassato na maññati, jivhāsamphasso meti na maññati.
sn35.30:1.13 Yampidaṁ jivhāsamphassapaccayā uppajjati vedayitaṁ sukhaṁ vā dukkhaṁ vā adukkhamasukhaṁ vā tampi na maññati, tasmimpi na maññati, tatopi na maññati, taṁ meti na maññati …pe…
sn35.30:1.14 manaṁ na maññati, manasmiṁ na maññati, manato na maññati, mano meti na maññati.
sn35.30:1.15 Dhamme na maññati, dhammesu na maññati, dhammato na maññati, dhammā meti na maññati.
sn35.30:1.16 Manoviññāṇaṁ na maññati, manoviññāṇasmiṁ na maññati, manoviññāṇato na maññati, manoviññāṇaṁ meti na maññati.
sn35.30:1.17 Manosamphassaṁ na maññati, manosamphassasmiṁ na maññati, manosamphassato na maññati, manosamphasso meti na maññati.
sn35.30:1.18 Yampidaṁ manosamphassapaccayā uppajjati vedayitaṁ sukhaṁ vā dukkhaṁ vā adukkhamasukhaṁ vā tampi na maññati, tasmimpi na maññati, tatopi na maññati, taṁ meti na maññati.
sn35.30:1.19 Sabbaṁ na maññati, sabbasmiṁ na maññati, sabbato na maññati, sabbaṁ meti na maññati.
sn35.30:1.20 So evaṁ amaññamāno na ca kiñci loke upādiyati.
sn35.30:1.21 Anupādiyaṁ na paritassati. Aparitassaṁ paccattaññeva parinibbāyati.
sn35.30:1.22 ‘Khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyā’ti pajānāti.
sn35.30:1.23 Ayaṁ kho sā, bhikkhave, sabbamaññitasamugghātasāruppā paṭipadā”ti.
sn35.30:1.24 Aṭṭhamaṁ.