Yavakalāpisutta

sn35.248:2.1 Bhūtapubbaṁ, bhikkhave, devāsurasaṅgāmo samupabyūḷho ahosi.

sn35.248:2.2 Atha kho, bhikkhave, vepacitti asurindo asure āmantesi:

sn35.248:2.3 ‘sace, mārisā, devāsurasaṅgāme samupabyūḷhe asurā jineyyuṁ devā parājineyyuṁ, yena naṁ sakkaṁ devānamindaṁ kaṇṭhapañcamehi bandhanehi bandhitvā mama santike āneyyātha asurapuran’ti.

sn35.248:2.4 Sakkopi kho, bhikkhave, devānamindo deve tāvatiṁse āmantesi:

sn35.248:2.5 ‘sace, mārisā, devāsurasaṅgāme samupabyūḷhe devā jineyyuṁ asurā parājineyyuṁ, yena naṁ vepacittiṁ asurindaṁ kaṇṭhapañcamehi bandhanehi bandhitvā mama santike āneyyātha sudhammaṁ devasabhan’ti.

sn35.248:2.6 Tasmiṁ kho pana, bhikkhave, saṅgāme devā jiniṁsu, asurā parājiniṁsu.

sn35.248:2.7 Atha kho, bhikkhave, devā tāvatiṁsā vepacittiṁ asurindaṁ kaṇṭhapañcamehi bandhanehi bandhitvā sakkassa devānamindassa santike ānesuṁ sudhammaṁ devasabhaṁ.

sn35.248:2.8 Tatra sudaṁ, bhikkhave, vepacitti asurindo kaṇṭhapañcamehi bandhanehi baddho hoti.

sn35.248:2.9 Yadā kho, bhikkhave, vepacittissa asurindassa evaṁ hoti:

sn35.248:2.10 ‘dhammikā kho devā, adhammikā asurā, idheva dānāhaṁ devapuraṁ gacchāmī’ti.

sn35.248:2.11 Atha kaṇṭhapañcamehi bandhanehi muttaṁ attānaṁ samanupassati, dibbehi ca pañcahi kāmaguṇehi samappito samaṅgībhūto paricāreti.

sn35.248:2.12 Yadā ca kho, bhikkhave, vepacittissa asurindassa evaṁ hoti:

sn35.248:2.13 ‘dhammikā kho asurā, adhammikā devā, tattheva dānāhaṁ asurapuraṁ gamissāmī’ti.

sn35.248:2.14 atha kaṇṭhapañcamehi bandhanehi baddhaṁ attānaṁ samanupassati, dibbehi ca pañcahi kāmaguṇehi parihāyati.

sn35.248:2.15 Evaṁ sukhumaṁ kho, bhikkhave, vepacittibandhanaṁ.

sn35.248:2.16 Tato sukhumataraṁ mārabandhanaṁ.

sn35.248:2.17 Maññamāno kho, bhikkhave, baddho mārassa, amaññamāno mutto pāpimato.