Yavakalāpisutta

sn35.248:1.1 “Seyyathāpi, bhikkhave, yavakalāpī cātumahāpathe nikkhittā assa.

sn35.248:1.2 Atha cha purisā āgaccheyyuṁ byābhaṅgihatthā.

sn35.248:1.3 Te yavakalāpiṁ chahi byābhaṅgīhi haneyyuṁ.

sn35.248:1.4 Evañhi sā, bhikkhave, yavakalāpī suhatā assa chahi byābhaṅgīhi haññamānā.

sn35.248:1.5 Atha sattamo puriso āgaccheyya byābhaṅgihattho.

sn35.248:1.6 So taṁ yavakalāpiṁ sattamāya byābhaṅgiyā haneyya.

sn35.248:1.7 Evañhi sā bhikkhave, yavakalāpī suhatatarā assa, sattamāya byābhaṅgiyā haññamānā.

sn35.248:1.8 Evameva kho, bhikkhave, assutavā puthujjano cakkhusmiṁ haññati manāpāmanāpehi rūpehi …pe…

sn35.248:1.9 jivhāya haññati manāpāmanāpehi rasehi …pe…

sn35.248:1.10 manasmiṁ haññati manāpāmanāpehi dhammehi.

sn35.248:1.11 Sace so, bhikkhave, assutavā puthujjano āyatiṁ punabbhavāya ceteti, evañhi so, bhikkhave, moghapuriso suhatataro hoti, seyyathāpi sā yavakalāpī sattamāya byābhaṅgiyā haññamānā.