Devadahasutta

sn35.134:1.1 Ekaṁ samayaṁ bhagavā sakkesu viharati devadahaṁ nāma sakyānaṁ nigamo.

sn35.134:1.2 Tatra kho bhagavā bhikkhū āmantesi:

sn35.134:1.3 “nāhaṁ, bhikkhave, sabbesaṁyeva bhikkhūnaṁ chasu phassāyatanesu appamādena karaṇīyanti vadāmi, na ca panāhaṁ, bhikkhave, sabbesaṁyeva bhikkhūnaṁ chasu phassāyatanesu nāppamādena karaṇīyanti vadāmi.

sn35.134:1.4 Ye te, bhikkhave, bhikkhū arahanto khīṇāsavā vusitavanto katakaraṇīyā ohitabhārā anuppattasadatthā parikkhīṇabhavasaṁyojanā sammadaññāvimuttā, tesāhaṁ, bhikkhave, bhikkhūnaṁ chasu phassāyatanesu nāppamādena karaṇīyanti vadāmi.

sn35.134:1.5 Taṁ kissa hetu?

sn35.134:1.6 Kataṁ tesaṁ appamādena, abhabbā te pamajjituṁ.

sn35.134:1.7 Ye ca kho te, bhikkhave, bhikkhū sekkhā appattamānasā anuttaraṁ yogakkhemaṁ patthayamānā viharanti, tesāhaṁ, bhikkhave, bhikkhūnaṁ chasu phassāyatanesu appamādena karaṇīyanti vadāmi.

sn35.134:1.8 Taṁ kissa hetu?

sn35.134:1.9 Santi, bhikkhave, cakkhuviññeyyā rūpā manoramāpi, amanoramāpi.

sn35.134:1.10 Tyāssa phussa phussa cittaṁ na pariyādāya tiṭṭhanti.

sn35.134:1.11 Cetaso apariyādānā āraddhaṁ hoti vīriyaṁ asallīnaṁ, upaṭṭhitā sati asammuṭṭhā, passaddho kāyo asāraddho, samāhitaṁ cittaṁ ekaggaṁ.

sn35.134:1.12 Imaṁ khvāhaṁ, bhikkhave, appamādaphalaṁ sampassamāno tesaṁ bhikkhūnaṁ chasu phassāyatanesu appamādena karaṇīyanti vadāmi …pe…

sn35.134:1.13 santi, bhikkhave, manoviññeyyā dhammā manoramāpi amanoramāpi.

sn35.134:1.14 Tyāssa phussa phussa cittaṁ na pariyādāya tiṭṭhanti.

sn35.134:1.15 Cetaso apariyādānā āraddhaṁ hoti vīriyaṁ asallīnaṁ, upaṭṭhitā sati asammuṭṭhā, passaddho kāyo asāraddho, samāhitaṁ cittaṁ ekaggaṁ.

sn35.134:1.16 Imaṁ khvāhaṁ, bhikkhave, appamādaphalaṁ sampassamāno tesaṁ bhikkhūnaṁ chasu phassāyatanesu appamādena karaṇīyanti vadāmī”ti.

sn35.134:1.17 Paṭhamaṁ.