Sātaccamūlakasappāyakārīsutta

sn34.55:1.1 Sāvatthinidānaṁ.

sn34.55:1.2 “Cattārome, bhikkhave, jhāyī.

sn34.55:1.3 Katame cattāro?

sn34.55:1.4 Idha, bhikkhave, ekacco jhāyī samādhismiṁ sātaccakārī hoti, na samādhismiṁ sappāyakārī.

sn34.55:1.5 Idha pana, bhikkhave, ekacco jhāyī samādhismiṁ sappāyakārī hoti, na samādhismiṁ sātaccakārī.

sn34.55:1.6 Idha pana, bhikkhave, ekacco jhāyī neva samādhismiṁ sātaccakārī hoti, na ca samādhismiṁ sappāyakārī.

sn34.55:1.7 Idha pana, bhikkhave, ekacco jhāyī samādhismiṁ sātaccakārī ca hoti, samādhismiṁ sappāyakārī ca.

sn34.55:1.8 Tatra, bhikkhave, yvāyaṁ jhāyī samādhismiṁ sātaccakārī ca hoti samādhismiṁ sappāyakārī ca ayaṁ imesaṁ catunnaṁ jhāyīnaṁ aggo ca seṭṭho ca mokkho ca uttamo ca pavaro ca.

sn34.55:1.9 Seyyathāpi, bhikkhave, gavā khīraṁ, khīramhā dadhi, dadhimhā navanītaṁ, navanītamhā sappi, sappimhā sappimaṇḍo tatra aggamakkhāyati;

sn34.55:1.10 evameva kho, bhikkhave, yvāyaṁ jhāyī samādhismiṁ sātaccakārī ca hoti, samādhismiṁ sappāyakārī ca ayaṁ imesaṁ catunnaṁ jhāyīnaṁ aggo ca seṭṭho ca mokkho ca uttamo ca pavaro cā”ti.

sn34.55:1.11 Idamavoca bhagavā.

sn34.55:1.12 Attamanā te bhikkhū bhagavato bhāsitaṁ abhinandunti.

sn34.55:1.13 Pañcapaññāsamaṁ.

sn34.55:1.14 (Yathā pañcapaññāsaṁ veyyākaraṇāni honti tathā vitthāretabbāni.)

sn34.55:1.15 Khandhavaggo tatiyo.