Vātavalāhakasutta

sn32.56:1.1 Sāvatthinidānaṁ.

sn32.56:1.2 Ekamantaṁ nisinno kho so bhikkhu bhagavantaṁ etadavoca:

sn32.56:1.3 “ko nu kho, bhante, hetu, ko paccayo, yenekadā vāto hotī”ti?

sn32.56:1.4 “Santi, bhikkhu, vātavalāhakā nāma devā.

sn32.56:1.5 Tesaṁ yadā evaṁ hoti:

sn32.56:1.6 ‘yannūna mayaṁ sakāya ratiyā vaseyyāmā’ti, tesaṁ taṁ cetopaṇidhimanvāya vāto hoti.

sn32.56:1.7 Ayaṁ kho, bhikkhu, hetu, ayaṁ paccayo, yenekadā vāto hotī”ti.

sn32.56:1.8 Chappaññāsamaṁ.