Sucaritasutta

sn32.2:1.1 Sāvatthinidānaṁ.

sn32.2:1.2 Ekamantaṁ nisinno kho so bhikkhu bhagavantaṁ etadavoca:

sn32.2:1.3 “ko nu kho, bhante, hetu, ko paccayo, yena midhekacco kāyassa bhedā paraṁ maraṇā valāhakakāyikānaṁ devānaṁ sahabyataṁ upapajjatī”ti?

sn32.2:1.4 “Idha, bhikkhu, ekacco kāyena sucaritaṁ carati, vācāya sucaritaṁ carati, manasā sucaritaṁ carati.

sn32.2:1.5 Tassa sutaṁ hoti:

sn32.2:1.6 ‘valāhakakāyikā devā dīghāyukā vaṇṇavanto sukhabahulā’ti.

sn32.2:1.7 Tassa evaṁ hoti:

sn32.2:1.8 ‘aho vatāhaṁ kāyassa bhedā paraṁ maraṇā valāhakakāyikānaṁ devānaṁ sahabyataṁ upapajjeyyan’ti.

sn32.2:1.9 So kāyassa bhedā paraṁ maraṇā valāhakakāyikānaṁ devānaṁ sahabyataṁ upapajjati.

sn32.2:1.10 Ayaṁ kho, bhikkhu, hetu, ayaṁ paccayo, yena midhekacco kāyassa bhedā paraṁ maraṇā valāhakakāyikānaṁ devānaṁ sahabyataṁ upapajjatī”ti.

sn32.2:1.11 Dutiyaṁ.