Harantisutta

sn30.2:1.1 Sāvatthinidānaṁ.

sn30.2:1.2 “Catasso imā, bhikkhave, supaṇṇayoniyo.

sn30.2:1.3 Katamā catasso?

sn30.2:1.4 Aṇḍajā …pe…

sn30.2:1.5 imā kho, bhikkhave, catasso supaṇṇayoniyo.

sn30.2:1.6 Tatra, bhikkhave, aṇḍajā supaṇṇā aṇḍajeva nāge haranti, na jalābuje, na saṁsedaje, na opapātike.

sn30.2:1.7 Tatra, bhikkhave, jalābujā supaṇṇā aṇḍaje ca jalābuje ca nāge haranti, na saṁsedaje, na opapātike.

sn30.2:1.8 Tatra, bhikkhave, saṁsedajā supaṇṇā aṇḍaje ca jalābuje ca saṁsedaje ca nāge haranti, na opapātike.

sn30.2:1.9 Tatra, bhikkhave, opapātikā supaṇṇā aṇḍaje ca jalābuje ca saṁsedaje ca opapātike ca nāge haranti.

sn30.2:1.10 Imā kho, bhikkhave, catasso supaṇṇayoniyo”ti.

sn30.2:1.11 Dutiyaṁ.