Lokasutta

sn3.23:1.1 Sāvatthinidānaṁ.

sn3.23:1.2 Ekamantaṁ nisinno kho rājā pasenadi kosalo bhagavantaṁ etadavoca:

sn3.23:1.3 “kati nu kho, bhante, lokassa dhammā uppajjamānā uppajjanti ahitāya dukkhāya aphāsuvihārāyā”ti?

sn3.23:1.4 “Tayo kho, mahārāja, lokassa dhammā uppajjamānā uppajjanti ahitāya dukkhāya aphāsuvihārāya.

sn3.23:1.5 Katame tayo?

sn3.23:1.6 Lobho kho, mahārāja, lokassa dhammo, uppajjamāno uppajjati ahitāya dukkhāya aphāsuvihārāya.

sn3.23:1.7 Doso kho, mahārāja, lokassa dhammo, uppajjamāno uppajjati ahitāya dukkhāya aphāsuvihārāya.

sn3.23:1.8 Moho kho, mahārāja, lokassa dhammo, uppajjamāno uppajjati ahitāya dukkhāya aphāsuvihārāya.

sn3.23:1.9 Ime kho, mahārāja, tayo lokassa dhammā uppajjamānā uppajjanti ahitāya dukkhāya aphāsuvihārāyā”ti.

sn3.23:1.10 Idamavoca …pe…