Pariññeyyasutta

sn23.4:2.1 “Pariññeyye ca, rādha, dhamme desessāmi pariññañca pariññātāviṁ puggalañca.

sn23.4:2.2 Taṁ suṇāhi, sādhukaṁ manasi karohi; bhāsissāmī”ti.

sn23.4:2.3 “Evaṁ, bhante”ti kho āyasmā rādho bhagavato paccassosi.

sn23.4:2.4 Bhagavā etadavoca:

sn23.4:2.5 “katame ca, rādha, pariññeyyā dhammā?

sn23.4:2.6 Rūpaṁ kho, rādha, pariññeyyo dhammo, vedanā pariññeyyo dhammo, saññā pariññeyyo dhammo, saṅkhārā pariññeyyo dhammo, viññāṇaṁ pariññeyyo dhammo.

sn23.4:2.7 Ime vuccanti, rādha, pariññeyyā dhammā.

sn23.4:2.8 Katamā ca, rādha, pariññā?

sn23.4:2.9 Yo kho, rādha, rāgakkhayo dosakkhayo mohakkhayo—

sn23.4:2.10 ayaṁ vuccati, rādha, pariññā.

sn23.4:2.11 Katamo ca, rādha, pariññātāvī puggalo?

sn23.4:2.12 ‘Arahā’tissa vacanīyaṁ.

sn23.4:2.13 Yvāyaṁ āyasmā evaṁnāmo evaṅgotto—

sn23.4:2.14 ayaṁ vuccati, rādha, pariññātāvī puggalo”ti.

sn23.4:2.15 Catutthaṁ.