Channasutta

sn22.90:9.1 “Sammukhā metaṁ, āvuso channa, bhagavato sutaṁ, sammukhā paṭiggahitaṁ kaccānagottaṁ bhikkhuṁ ovadantassa—

sn22.90:9.2 dvayanissito khvāyaṁ, kaccāna, loko yebhuyyena atthitañceva natthitañca.

sn22.90:9.3 Lokasamudayaṁ kho, kaccāna, yathābhūtaṁ sammappaññāya passato yā loke natthitā, sā na hoti.

sn22.90:9.4 Lokanirodhaṁ kho, kaccāna, yathābhūtaṁ sammappaññāya passato yā loke atthitā, sā na hoti.

sn22.90:9.5 Upayupādānābhinivesavinibandho khvāyaṁ, kaccāna, loko yebhuyyena

sn22.90:9.6 taṁ cāyaṁ upayupādānaṁ cetaso adhiṭṭhānābhinivesānusayaṁ na upeti na upādiyati nādhiṭṭhāti ‘attā me’ti.

sn22.90:9.7 Dukkhameva uppajjamānaṁ uppajjati, dukkhaṁ nirujjhamānaṁ nirujjhatīti na kaṅkhati na vicikicchati.

sn22.90:9.8 Aparappaccayā ñāṇamevassa ettha hoti.

sn22.90:9.9 Ettāvatā kho, kaccāna, sammādiṭṭhi hoti.

sn22.90:9.10 Sabbamatthīti kho, kaccāna, ayameko anto.

sn22.90:9.11 Sabbaṁ natthīti ayaṁ dutiyo anto.

sn22.90:9.12 Ete te, kaccāna, ubho ante anupagamma majjhena tathāgato dhammaṁ deseti—

sn22.90:9.13 avijjāpaccayā saṅkhārā;

sn22.90:9.14 saṅkhārapaccayā viññāṇaṁ …pe…

sn22.90:9.15 evametassa kevalassa dukkhakkhandhassa samudayo hoti.

sn22.90:9.16 Avijjāya tveva asesavirāganirodhā saṅkhāranirodho …pe…

sn22.90:9.17 evametassa kevalassa dukkhakkhandhassa nirodho hotī”ti.