sn22.88:1.1 Ekaṁ samayaṁ bhagavā rājagahe viharati veḷuvane kalandakanivāpe.
BAGIAN 1
sn22.88:1.2 Tena kho pana samayena āyasmā assaji kassapakārāme viharati ābādhiko dukkhito bāḷhagilāno.
sn22.88:1.3 Atha kho āyasmā assaji upaṭṭhāke āmantesi:
sn22.88:1.4 “etha tumhe, āvuso, yena bhagavā tenupasaṅkamatha; upasaṅkamitvā mama vacanena bhagavato pāde sirasā vandatha:
sn22.88:1.5 ‘assaji, bhante, bhikkhu ābādhiko dukkhito bāḷhagilāno.
sn22.88:1.6 So bhagavato pāde sirasā vandatī’ti.
sn22.88:1.7 Evañca vadetha:
sn22.88:1.8 ‘sādhu kira, bhante, bhagavā yena assaji bhikkhu tenupasaṅkamatu anukampaṁ upādāyā’”ti.
sn22.88:1.9 “Evamāvuso”ti kho te bhikkhū āyasmato assajissa paṭissutvā yena bhagavā tenupasaṅkamiṁsu; upasaṅkamitvā bhagavantaṁ abhivādetvā ekamantaṁ nisīdiṁsu. Ekamantaṁ nisinnā kho te bhikkhū bhagavantaṁ etadavocuṁ:
sn22.88:1.10 “assaji, bhante, bhikkhu ābādhiko …pe…
sn22.88:1.11 sādhu kira, bhante, bhagavā yena assaji bhikkhu tenupasaṅkamatu anukampaṁ upādāyā”ti.
sn22.88:1.12 Adhivāsesi bhagavā tuṇhībhāvena.