Vakkalisutta

sn22.87:8.1 Atha kho āyasmā vakkali upaṭṭhāke āmantesi:

sn22.87:8.2 “etha maṁ, āvuso, mañcakā oropetha.

sn22.87:8.3 Kathañhi nāma mādiso ucce āsane nisīditvā tassa bhagavato sāsanaṁ sotabbaṁ maññeyyā”ti.

sn22.87:8.4 “Evamāvuso”ti kho te bhikkhū āyasmato vakkalissa paṭissutvā āyasmantaṁ vakkaliṁ mañcakā oropesuṁ.

sn22.87:8.5 “Imaṁ, āvuso, rattiṁ dve devatāyo abhikkantāya rattiyā …pe… ekamantaṁ aṭṭhaṁsu.

sn22.87:8.6 Ekamantaṁ ṭhitā kho, āvuso, ekā devatā bhagavantaṁ etadavoca:

sn22.87:8.7 ‘vakkali, bhante, bhikkhu vimokkhāya cetetī’ti.

sn22.87:8.8 Aparā devatā bhagavantaṁ etadavoca:

sn22.87:8.9 ‘so hi nūna, bhante, suvimutto vimuccissatī’ti.

sn22.87:8.10 Bhagavā ca taṁ, āvuso vakkali, evamāha:

sn22.87:8.11 ‘mā bhāyi, vakkali;

sn22.87:8.12 mā bhāyi, vakkali.

sn22.87:8.13 Apāpakaṁ te maraṇaṁ bhavissati, apāpikā kālakiriyā’”ti.

sn22.87:8.14 “Tena hāvuso, mama vacanena bhagavato pāde sirasā vandatha:

sn22.87:8.15 ‘vakkali, bhante, bhikkhu ābādhiko dukkhito bāḷhagilāno.

sn22.87:8.16 So bhagavato pāde sirasā vandatī’ti.

sn22.87:8.17 Evañca vadetha:

sn22.87:8.18 ‘rūpaṁ aniccaṁ.

sn22.87:8.19 Tāhaṁ, bhante, na kaṅkhāmi.

sn22.87:8.20 Yadaniccaṁ taṁ dukkhanti na vicikicchāmi.

sn22.87:8.21 Yadaniccaṁ dukkhaṁ vipariṇāmadhammaṁ, natthi me tattha chando vā rāgo vā pemaṁ vāti na vicikicchāmi.

sn22.87:8.22 Vedanā aniccā.

sn22.87:8.23 Tāhaṁ, bhante, na kaṅkhāmi.

sn22.87:8.24 Yadaniccaṁ taṁ dukkhanti na vicikicchāmi.

sn22.87:8.25 Yadaniccaṁ dukkhaṁ vipariṇāmadhammaṁ, natthi me tattha chando vā rāgo vā pemaṁ vāti na vicikicchāmi.

sn22.87:8.26 Saññā …

sn22.87:8.27 saṅkhārā aniccā.

sn22.87:8.28 Tāhaṁ, bhante, na kaṅkhāmi.

sn22.87:8.29 Yadaniccaṁ taṁ dukkhanti na vicikicchāmi.

sn22.87:8.30 Yadaniccaṁ dukkhaṁ vipariṇāmadhammaṁ, natthi me tattha chando vā rāgo vā pemaṁ vāti na vicikicchāmi.

sn22.87:8.31 Viññāṇaṁ aniccaṁ.

sn22.87:8.32 Tāhaṁ, bhante, na kaṅkhāmi.

sn22.87:8.33 Yadaniccaṁ taṁ dukkhanti na vicikicchāmi.

sn22.87:8.34 Yadaniccaṁ dukkhaṁ vipariṇāmadhammaṁ, natthi me tattha chando vā rāgo vā pemaṁ vāti na vicikicchāmī’”ti.

sn22.87:8.35 “Evamāvuso”ti kho te bhikkhū āyasmato vakkalissa paṭissutvā pakkamiṁsu.

sn22.87:8.36 Atha kho āyasmā vakkali acirapakkantesu tesu bhikkhūsu satthaṁ āharesi.