Vakkalisutta

sn22.87:5.1 Atha kho bhagavā āyasmantaṁ vakkaliṁ iminā ovādena ovaditvā uṭṭhāyāsanā yena gijjhakūṭo pabbato tena pakkāmi.

sn22.87:5.2 Atha kho āyasmā vakkali acirapakkantassa bhagavato upaṭṭhāke āmantesi:

sn22.87:5.3 “etha maṁ, āvuso, mañcakaṁ āropetvā yena isigilipassaṁ kāḷasilā tenupasaṅkamatha.

sn22.87:5.4 Kathañhi nāma mādiso antaraghare kālaṁ kattabbaṁ maññeyyā”ti?

sn22.87:5.5 “Evamāvuso”ti kho te bhikkhū āyasmato vakkalissa paṭissutvā āyasmantaṁ vakkaliṁ mañcakaṁ āropetvā yena isigilipassaṁ kāḷasilā tenupasaṅkamiṁsu.

sn22.87:5.6 Atha kho bhagavā tañca rattiṁ tañca divāvasesaṁ gijjhakūṭe pabbate vihāsi.

sn22.87:5.7 Atha kho dve devatāyo abhikkantāya rattiyā abhikkantavaṇṇā kevalakappaṁ gijjhakūṭaṁ obhāsetvā yena bhagavā tenupasaṅkamiṁsu …pe… ekamantaṁ aṭṭhaṁsu.

sn22.87:5.8 Ekamantaṁ ṭhitā kho ekā devatā bhagavantaṁ etadavoca:

sn22.87:5.9 “vakkali, bhante, bhikkhu vimokkhāya cetetī”ti.

sn22.87:5.10 Aparā devatā bhagavantaṁ etadavoca:

sn22.87:5.11 “so hi nūna, bhante, suvimutto vimuccissatī”ti.

sn22.87:5.12 Idamavocuṁ tā devatāyo.

sn22.87:5.13 Idaṁ vatvā bhagavantaṁ abhivādetvā padakkhiṇaṁ katvā tatthevantaradhāyiṁsu.