Vakkalisutta

sn22.87:2.1 Atha kho bhagavā nivāsetvā pattacīvaramādāya yenāyasmā vakkali tenupasaṅkami.

sn22.87:2.2 Addasā kho āyasmā vakkali bhagavantaṁ dūratova āgacchantaṁ. Disvāna mañcake samadhosi.

sn22.87:2.3 Atha kho bhagavā āyasmantaṁ vakkaliṁ etadavoca:

sn22.87:2.4 “alaṁ, vakkali, mā tvaṁ mañcake samadhosi.

sn22.87:2.5 Santimāni āsanāni paññattāni; tatthāhaṁ nisīdissāmī”ti.

sn22.87:2.6 Nisīdi bhagavā paññatte āsane. Nisajja kho bhagavā āyasmantaṁ vakkaliṁ etadavoca:

sn22.87:2.7 “kacci te, vakkali, khamanīyaṁ, kacci yāpanīyaṁ, kacci dukkhā vedanā paṭikkamanti, no abhikkamanti; paṭikkamosānaṁ paññāyati, no abhikkamo”ti?

sn22.87:2.8 “Na me, bhante, khamanīyaṁ, na yāpanīyaṁ; bāḷhā me dukkhā vedanā abhikkamanti, no paṭikkamanti; abhikkamosānaṁ paññāyati, no paṭikkamo”ti.

sn22.87:2.9 “Kacci te, vakkali, na kiñci kukkuccaṁ, na koci vippaṭisāro”ti?

sn22.87:2.10 “Taggha me, bhante, anappakaṁ kukkuccaṁ, anappako vippaṭisāro”ti.

sn22.87:2.11 “Kacci pana taṁ, vakkali, attā sīlato na upavadatī”ti?

sn22.87:2.12 “Na kho maṁ, bhante, attā sīlato upavadatī”ti.

sn22.87:2.13 “No ce kira taṁ, vakkali, attā sīlato upavadati; atha kiñca te kukkuccaṁ ko ca vippaṭisāro”ti?

sn22.87:2.14 “Cirapaṭikāhaṁ, bhante, bhagavantaṁ dassanāya upasaṅkamitukāmo, natthi ca me kāyasmiṁ tāvatikā balamattā, yāvatāhaṁ bhagavantaṁ dassanāya upasaṅkameyyan”ti.