Yamakasutta

sn22.85:14.1 “Sādhu sādhu, āvuso yamaka.

sn22.85:14.2 Tena hāvuso yamaka, upamaṁ te karissāmi etasseva atthassa bhiyyoso mattāya ñāṇāya.

sn22.85:14.3 Seyyathāpi, āvuso yamaka, gahapati vā gahapatiputto vā aḍḍho mahaddhano mahābhogo;

sn22.85:14.4 so ca ārakkhasampanno.

sn22.85:14.5 Tassa kocideva puriso uppajjeyya anatthakāmo ahitakāmo ayogakkhemakāmo jīvitā voropetukāmo.

sn22.85:14.6 Tassa evamassa:

sn22.85:14.7 ‘ayaṁ kho gahapati vā gahapatiputto vā aḍḍho mahaddhano mahābhogo;

sn22.85:14.8 so ca ārakkhasampanno;

sn22.85:14.9 nāyaṁ sukaro pasayha jīvitā voropetuṁ.

sn22.85:14.10 Yannūnāhaṁ anupakhajja jīvitā voropeyyan’ti.

sn22.85:14.11 So taṁ gahapatiṁ vā gahapatiputtaṁ vā upasaṅkamitvā evaṁ vadeyya:

sn22.85:14.12 ‘upaṭṭhaheyyaṁ taṁ, bhante’ti.

sn22.85:14.13 Tamenaṁ so gahapati vā gahapatiputto vā upaṭṭhāpeyya.

sn22.85:14.14 So upaṭṭhaheyya pubbuṭṭhāyī pacchānipātī kiṅkārapaṭissāvī manāpacārī piyavādī.

sn22.85:14.15 Tassa so gahapati vā gahapatiputto vā mittatopi naṁ saddaheyya;

sn22.85:14.16 suhajjatopi naṁ saddaheyya;

sn22.85:14.17 tasmiñca vissāsaṁ āpajjeyya.

sn22.85:14.18 Yadā kho, āvuso, tassa purisassa evamassa:

sn22.85:14.19 ‘saṁvissattho kho myāyaṁ gahapati vā gahapatiputto vā’ti, atha naṁ rahogataṁ viditvā tiṇhena satthena jīvitā voropeyya.