sn22.81:4.1 Atha kho āyasmā ānando tehi bhikkhūhi saddhiṁ yena pālileyyakaṁ bhaddasālamūlaṁ yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi.
BAGIAN 4
sn22.81:4.2 Ekamantaṁ nisinne kho te bhikkhū bhagavā dhammiyā kathāya sandassesi samādapesi samuttejesi sampahaṁsesi.
sn22.81:4.3 Tena kho pana samayena aññatarassa bhikkhuno evaṁ cetaso parivitakko udapādi:
sn22.81:4.4 “kathaṁ nu kho jānato kathaṁ passato anantarā āsavānaṁ khayo hotī”ti?
sn22.81:4.5 Atha kho bhagavā tassa bhikkhuno cetasā cetoparivitakkamaññāya bhikkhū āmantesi:
sn22.81:4.6 “vicayaso desito, bhikkhave, mayā dhammo;
sn22.81:4.7 vicayaso desitā cattāro satipaṭṭhānā;
sn22.81:4.8 vicayaso desitā cattāro sammappadhānā;
sn22.81:4.9 vicayaso desitā cattāro iddhipādā;
sn22.81:4.10 vicayaso desitāni pañcindriyāni;
sn22.81:4.11 vicayaso desitāni pañca balāni;
sn22.81:4.12 vicayaso desitā sattabojjhaṅgā;
sn22.81:4.13 vicayaso desito ariyo aṭṭhaṅgiko maggo.
sn22.81:4.14 Evaṁ vicayaso desito, bhikkhave, mayā dhammo.
sn22.81:4.15 Evaṁ vicayaso desite kho, bhikkhave, mayā dhamme atha ca panidhekaccassa bhikkhuno evaṁ cetaso parivitakko udapādi:
sn22.81:4.16 ‘kathaṁ nu kho jānato kathaṁ passato anantarā āsavānaṁ khayo hotī’ti?