Dutiyanandikkhayasutta

sn22.52:1.1 Sāvatthinidānaṁ.

sn22.52:1.2 “Rūpaṁ, bhikkhave, yoniso manasi karotha, rūpāniccatañca yathābhūtaṁ samanupassatha.

sn22.52:1.3 Rūpaṁ, bhikkhave, bhikkhu yoniso manasi karonto, rūpāniccatañca yathābhūtaṁ samanupassanto rūpasmiṁ nibbindati.

sn22.52:1.4 Nandikkhayā rāgakkhayo, rāgakkhayā nandikkhayo.

sn22.52:1.5 Nandirāgakkhayā cittaṁ vimuttaṁ suvimuttanti vuccati.

sn22.52:1.6 Vedanaṁ, bhikkhave, yoniso manasi karotha, vedanāniccatañca yathābhūtaṁ samanupassatha.

sn22.52:1.7 Vedanaṁ, bhikkhave, bhikkhu yoniso manasi karonto, vedanāniccatañca yathābhūtaṁ samanupassanto vedanāya nibbindati.

sn22.52:1.8 Nandikkhayā rāgakkhayo, rāgakkhayā nandikkhayo.

sn22.52:1.9 Nandirāgakkhayā cittaṁ vimuttaṁ suvimuttanti vuccati.

sn22.52:1.10 Saññaṁ bhikkhave …

sn22.52:1.11 saṅkhāre, bhikkhave, yoniso manasi karotha, saṅkhārāniccatañca yathābhūtaṁ samanupassatha.

sn22.52:1.12 Saṅkhāre, bhikkhave, bhikkhu yoniso manasi karonto, saṅkhārāniccataṁ yathābhūtaṁ samanupassanto saṅkhāresu nibbindati.

sn22.52:1.13 Nandikkhayā rāgakkhayo, rāgakkhayā nandikkhayo.

sn22.52:1.14 Nandirāgakkhayā cittaṁ vimuttaṁ suvimuttanti vuccati.

sn22.52:1.15 Viññāṇaṁ, bhikkhave, yoniso manasi karotha, viññāṇāniccatañca yathābhūtaṁ samanupassatha.

sn22.52:1.16 Viññāṇaṁ, bhikkhave, bhikkhu yoniso manasi karonto, viññāṇāniccatañca yathābhūtaṁ samanupassanto viññāṇasmiṁ nibbindati.

sn22.52:1.17 Nandikkhayā rāgakkhayo, rāgakkhayā nandikkhayo.

sn22.52:1.18 Nandirāgakkhayā cittaṁ vimuttaṁ suvimuttanti vuccatī”ti.

sn22.52:1.19 Dasamaṁ.

sn22.52:1.20 Attadīpavaggo pañcamo.