Upādāniyasutta

sn22.121:1.1 Sāvatthinidānaṁ.

sn22.121:1.2 “Upādāniye ca, bhikkhave, dhamme desessāmi upādānañca.

sn22.121:1.3 Taṁ suṇātha.

sn22.121:1.4 Katame ca, bhikkhave, upādāniyā dhammā, katamaṁ upādānaṁ?

sn22.121:1.5 Rūpaṁ, bhikkhave, upādāniyo dhammo,

sn22.121:1.6 yo tattha chandarāgo, taṁ tattha upādānaṁ.

sn22.121:1.7 Vedanā …pe…

sn22.121:1.8 saññā …

sn22.121:1.9 saṅkhārā …

sn22.121:1.10 viññāṇaṁ upādāniyo dhammo;

sn22.121:1.11 yo tattha chandarāgo, taṁ tattha upādānaṁ.

sn22.121:1.12 Ime vuccanti, bhikkhave, upādāniyā dhammā, idaṁ upādānan”ti.

sn22.121:1.13 Navamaṁ.