sn22.116:1.1 Sāvatthinidānaṁ.
BAGIAN 1
sn22.116:1.2 Ekamantaṁ nisinno kho so bhikkhu bhagavantaṁ etadavoca:
sn22.116:1.3 “‘dhammakathiko, dhammakathiko’ti, bhante, vuccati;
sn22.116:1.4 kittāvatā nu kho, bhante, dhammakathiko hoti;
sn22.116:1.5 kittāvatā dhammānudhammappaṭipanno hoti, kittāvatā diṭṭhadhammanibbānappatto hotī”ti?
sn22.116:1.6 “Rūpassa ce, bhikkhu, nibbidāya virāgāya nirodhāya dhammaṁ deseti, ‘dhammakathiko bhikkhū’ti alaṁvacanāya.
sn22.116:1.7 Rūpassa ce, bhikkhu, nibbidāya virāgāya nirodhāya paṭipanno hoti, ‘dhammānudhammappaṭipanno bhikkhū’ti alaṁvacanāya.
sn22.116:1.8 Rūpassa ce, bhikkhu, nibbidā virāgā nirodhā anupādāvimutto hoti, ‘diṭṭhadhammanibbānappatto bhikkhū’ti alaṁvacanāya.
sn22.116:1.9 Vedanāya ce, bhikkhu …pe…
sn22.116:1.10 saññāya ce, bhikkhu …
sn22.116:1.11 saṅkhārānañce, bhikkhu …
sn22.116:1.12 viññāṇassa ce, bhikkhu, nibbidāya virāgāya nirodhāya dhammaṁ deseti, ‘dhammakathiko bhikkhū’ti alaṁvacanāya.
sn22.116:1.13 Viññāṇassa ce, bhikkhu, nibbidāya virāgāya nirodhāya paṭipanno hoti, ‘dhammānudhammappaṭipanno bhikkhū’ti alaṁvacanāya.
sn22.116:1.14 Viññāṇassa ce, bhikkhu, nibbidā virāgā nirodhā anupādāvimutto hoti, ‘diṭṭhadhammanibbānappatto bhikkhū’ti alaṁvacanāyā”ti.
sn22.116:1.15 Catutthaṁ.