Vāsijaṭasutta

sn22.101:3.1 Seyyathāpi, bhikkhave, kukkuṭiyā aṇḍāni aṭṭha vā dasa vā dvādasa vā.

sn22.101:3.2 Tānassu kukkuṭiyā na sammā adhisayitāni, na sammā pariseditāni, na sammā paribhāvitāni.

sn22.101:3.3 Kiñcāpi tassā kukkuṭiyā evaṁ icchā uppajjeyya:

sn22.101:3.4 ‘aho vata me kukkuṭapotakā pādanakhasikhāya vā mukhatuṇḍakena vā aṇḍakosaṁ padāletvā sotthinā abhinibbhijjeyyun’ti,

sn22.101:3.5 atha kho abhabbāva te kukkuṭapotakā pādanakhasikhāya vā mukhatuṇḍakena vā aṇḍakosaṁ padāletvā sotthinā abhinibbhijjituṁ.

sn22.101:3.6 Taṁ kissa hetu?

sn22.101:3.7 Tathā hi pana, bhikkhave, kukkuṭiyā aṇḍāni aṭṭha vā dasa vā dvādasa vā;

sn22.101:3.8 tāni kukkuṭiyā na sammā adhisayitāni, na sammā pariseditāni, na sammā paribhāvitāni.

sn22.101:3.9 Evameva kho, bhikkhave, bhāvanānuyogaṁ ananuyuttassa bhikkhuno viharato kiñcāpi evaṁ icchā uppajjeyya:

sn22.101:3.10 ‘aho vata me anupādāya āsavehi cittaṁ vimucceyyā’ti, atha khvassa neva anupādāya āsavehi cittaṁ vimuccati.

sn22.101:3.11 Taṁ kissa hetu?

sn22.101:3.12 ‘Abhāvitattā’tissa vacanīyaṁ.

sn22.101:3.13 Kissa abhāvitattā?

sn22.101:3.14 Abhāvitattā catunnaṁ satipaṭṭhānānaṁ …pe… aṭṭhaṅgikassa maggassa.