sn20.2:1.1 Sāvatthiyaṁ viharati.
BAGIAN 1
sn20.2:1.2 Atha kho bhagavā parittaṁ nakhasikhāyaṁ paṁsuṁ āropetvā bhikkhū āmantesi:
sn20.2:1.3 “Taṁ kiṁ maññatha, bhikkhave,
sn20.2:1.4 katamaṁ nu kho bahutaraṁ, yo cāyaṁ mayā paritto nakhasikhāyaṁ paṁsu āropito yā cāyaṁ mahāpathavī”ti?
sn20.2:1.5 “Etadeva, bhante, bahutaraṁ yadidaṁ mahāpathavī.
sn20.2:1.6 Appamattakoyaṁ bhagavatā paritto nakhasikhāyaṁ paṁsu āropito.
sn20.2:1.7 Saṅkhampi na upeti upanidhimpi na upeti kalabhāgampi na upeti mahāpathaviṁ upanidhāya bhagavatā paritto nakhasikhāyaṁ paṁsu āropito”ti.
sn20.2:1.8 “Evameva kho, bhikkhave, appakā te sattā ye manussesu paccājāyanti;
sn20.2:1.9 atha kho eteyeva bahutarā sattā ye aññatra manussehi paccājāyanti.
sn20.2:1.10 Tasmātiha, bhikkhave, evaṁ sikkhitabbaṁ:
sn20.2:1.11 ‘appamattā viharissāmā’ti.
sn20.2:1.12 Evañhi vo, bhikkhave, sikkhitabban”ti.
sn20.2:1.13 Dutiyaṁ.