sn20.10:3.1 Evameva kho, bhikkhave, idhekacco bhikkhu pubbaṇhasamayaṁ nivāsetvā pattacīvaramādāya gāmaṁ vā nigamaṁ vā piṇḍāya pavisati arakkhiteneva kāyena arakkhitāya vācāya arakkhitena cittena, anupaṭṭhitāya satiyā, asaṁvutehi indriyehi.
BAGIAN 3
sn20.10:3.2 So tattha passati mātugāmaṁ dunnivatthaṁ vā duppārutaṁ vā.
sn20.10:3.3 Tassa mātugāmaṁ disvā dunnivatthaṁ vā duppārutaṁ vā rāgo cittaṁ anuddhaṁseti.
sn20.10:3.4 So rāgānuddhaṁsena cittena maraṇaṁ vā nigacchati maraṇamattaṁ vā dukkhaṁ.
sn20.10:3.5 Maraṇañhetaṁ, bhikkhave, ariyassa vinaye yo sikkhaṁ paccakkhāya hīnāyāvattati.
sn20.10:3.6 Maraṇamattañhetaṁ, bhikkhave, dukkhaṁ yadidaṁ aññataraṁ saṅkiliṭṭhaṁ āpattiṁ āpajjati.
sn20.10:3.7 Yathārūpāya āpattiyā vuṭṭhānaṁ paññāyati.
sn20.10:3.8 Tasmātiha, bhikkhave, evaṁ sikkhitabbaṁ:
sn20.10:3.9 ‘rakkhiteneva kāyena rakkhitāya vācāya rakkhitena cittena, upaṭṭhitāya satiyā, saṁvutehi indriyehi gāmaṁ vā nigamaṁ vā piṇḍāya pavisissāmā’ti.
sn20.10:3.10 Evañhi vo, bhikkhave, sikkhitabban”ti.
sn20.10:3.11 Dasamaṁ.