Mīḷhakasutta

sn17.5:1.1 Sāvatthiyaṁ viharati.

sn17.5:1.2 “Dāruṇo, bhikkhave, lābhasakkārasiloko …pe… adhigamāya.

sn17.5:1.3 Seyyathāpi, bhikkhave, mīḷhakā gūthādī gūthapūrā puṇṇā gūthassa. Purato cassa mahāgūthapuñjo.

sn17.5:1.4 Sā tena aññā mīḷhakā atimaññeyya:

sn17.5:1.5 ‘ahamhi gūthādī gūthapūrā puṇṇā gūthassa, purato ca myāyaṁ mahāgūthapuñjo’ti.

sn17.5:1.6 Evameva kho, bhikkhave, idhekacco bhikkhu lābhasakkārasilokena abhibhūto pariyādiṇṇacitto pubbaṇhasamayaṁ nivāsetvā pattacīvaramādāya gāmaṁ vā nigamaṁ vā piṇḍāya pavisati.

sn17.5:1.7 So tattha bhuttāvī ca hoti yāvadattho, nimantito ca svātanāya, piṇḍapāto cassa pūro.

sn17.5:1.8 So ārāmaṁ gantvā bhikkhugaṇassa majjhe vikatthati:

sn17.5:1.9 ‘bhuttāvī camhi yāvadattho, nimantito camhi svātanāya, piṇḍapāto ca myāyaṁ pūro, lābhī camhi cīvarapiṇḍapātasenāsanagilānappaccayabhesajjaparikkhārānaṁ, ime panaññe bhikkhū appapuññā appesakkhā na lābhino cīvarapiṇḍapātasenāsanagilānappaccayabhesajjaparikkhārānan’ti.

sn17.5:1.10 So tena lābhasakkārasilokena abhibhūto pariyādiṇṇacitto aññe pesale bhikkhū atimaññati.

sn17.5:1.11 Tañhi tassa, bhikkhave, moghapurisassa hoti dīgharattaṁ ahitāya dukkhāya.

sn17.5:1.12 Evaṁ dāruṇo kho, bhikkhave, lābhasakkārasiloko …pe…

sn17.5:1.13 evañhi vo bhikkhave, sikkhitabban”ti.

sn17.5:1.14 Pañcamaṁ.