Kummasutta

sn17.3:1.1 Sāvatthiyaṁ viharati.

sn17.3:1.2 “Dāruṇo, bhikkhave, lābhasakkārasiloko …pe… adhigamāya.

sn17.3:1.3 Bhūtapubbaṁ, bhikkhave, aññatarasmiṁ udakarahade mahākummakulaṁ ciranivāsi ahosi.

sn17.3:1.4 Atha kho, bhikkhave, aññataro kummo aññataraṁ kummaṁ etadavoca:

sn17.3:1.5 ‘mā kho tvaṁ, tāta kumma, etaṁ padesaṁ agamāsī’ti.

sn17.3:1.6 Agamāsi kho, bhikkhave, so kummo taṁ padesaṁ.

sn17.3:1.7 Tamenaṁ luddo papatāya vijjhi.

sn17.3:1.8 Atha kho, bhikkhave, so kummo yena so kummo tenupasaṅkami.

sn17.3:1.9 Addasā kho, bhikkhave, so kummo taṁ kummaṁ dūratova āgacchantaṁ.

sn17.3:1.10 Disvāna taṁ kummaṁ etadavoca:

sn17.3:1.11 ‘kacci tvaṁ, tāta kumma, na taṁ padesaṁ agamāsī’ti?

sn17.3:1.12 ‘Agamāsiṁ khvāhaṁ, tāta kumma, taṁ padesan’ti.

sn17.3:1.13 ‘Kacci panāsi, tāta kumma, akkhato anupahato’ti?

sn17.3:1.14 ‘Akkhato khomhi, tāta kumma, anupahato, atthi ca me idaṁ suttakaṁ piṭṭhito piṭṭhito anubandhan’ti.

sn17.3:1.15 ‘Tagghasi, tāta kumma, khato, taggha upahato.

sn17.3:1.16 Etena hi te, tāta kumma, suttakena pitaro ca pitāmahā ca anayaṁ āpannā byasanaṁ āpannā.

sn17.3:1.17 Gaccha dāni tvaṁ, tāta kumma, na dāni tvaṁ amhākan’ti.