Gaṅgāsutta

sn15.8:2.1 “Sakkā pana, bho gotama, upamaṁ kātun”ti?

sn15.8:2.2 “Sakkā, brāhmaṇā”ti bhagavā avoca.

sn15.8:2.3 “Seyyathāpi, brāhmaṇa, yato cāyaṁ gaṅgā nadī pabhavati yattha ca mahāsamuddaṁ appeti, yā etasmiṁ antare vālikā sā na sukarā saṅkhātuṁ:

sn15.8:2.4 ‘ettakā vālikā iti vā, ettakāni vālikasatāni iti vā, ettakāni vālikasahassāni iti vā, ettakāni vālikasatasahassāni iti vā’ti.

sn15.8:2.5 Tato bahutarā kho, brāhmaṇa, kappā abbhatītā atikkantā.

sn15.8:2.6 Te na sukarā saṅkhātuṁ:

sn15.8:2.7 ‘ettakā kappā iti vā, ettakāni kappasatāni iti vā, ettakāni kappasahassāni iti vā, ettakāni kappasatasahassāni iti vā’ti.

sn15.8:2.8 Taṁ kissa hetu?

sn15.8:2.9 Anamataggoyaṁ, brāhmaṇa, saṁsāro.

sn15.8:2.10 Pubbā koṭi na paññāyati avijjānīvaraṇānaṁ sattānaṁ taṇhāsaṁyojanānaṁ sandhāvataṁ saṁsarataṁ.

sn15.8:2.11 Evaṁ dīgharattaṁ kho, brāhmaṇa, dukkhaṁ paccanubhūtaṁ tibbaṁ paccanubhūtaṁ byasanaṁ paccanubhūtaṁ, kaṭasī vaḍḍhitā.

sn15.8:2.12 Yāvañcidaṁ, brāhmaṇa, alameva sabbasaṅkhāresu nibbindituṁ, alaṁ virajjituṁ, alaṁ vimuccitun”ti.